周三晚可能大部份球迷嘅焦點到落喺「曼市打吡」，但同時間喺西甲賽場，中國前鋒武磊喺愛斯賓奴主場對切爾達嘅比賽，再次獲得正選上陣機會。而且，佢喺33分鐘接應隊友的長傳，射入一球靚絕嘅凌空掛射，係「武球王」轉投西甲以後嘅第二球。賽後，中國媒體同埋網民當然係瘋狂吹奏「武球王」嘅神勇表現喇！

周三愛斯賓奴主場鬥切爾達嘅比賽，武磊重返正選陣容，而且表現非常活躍。到咗上半場33分鐘，愛斯賓奴前場幾次短傳配合，中場馬克洛卡見到武磊由禁區外入楔，乖巧咁送咗個過頭波入禁區。而「武球王」控都唔控，快對手出迎嘅門將魯賓白蘭高一步半車身掛射入網。武磊上一次喺西甲入波已經係3月2日嘅事，最終相隔54日終於成功打破入球荒，入波之後佢都相當興奮，除咗振臂高呼之外，仲猛錫球會會徽表忠！

雖然最後雙方打成1:1平手，但「武球王」嘅表現已經受到各方高度評價，其中中國媒體當然不遺餘力猛吹「武球王」，有啲就指武磊嘅入球係贏在佢嘅世界級走位，而且射術一流、有啲就話武磊入波之後全場狂嗌佢個名四次，成功用表現證明自己喺西甲賽場值得佔一席位，可以成為球隊常規正選、仲有唔少講希望佢可以好似孫興民咁，成長為擔起球隊嘅巨星。

不過，變得最快嘅都係廣大中國網民。話說周日愛斯賓奴作客鬥利雲特嘅西甲比賽，武磊喺後備席坐足90分鐘，係佢自1月尾加入球會之後首次一分鐘都未踢過。賽後憤怒嘅網民就走去愛斯賓奴嘅微博留言討伐教練魯比，仲表明「要不是有武磊，誰理你愛斯賓奴的死活！」但噚日愛斯賓奴喺武磊入波之後出咗個「請！相！信！他！」嘅貼文，大家就好似咩事都無發生過咁去留言吹奏「武球王」，唔少網友都話見到「武球王」入波，真係無白熬夜。有啲仲話睇到入波之後激動到喊，興奮到瞓唔着，認真誇張。

--------------------
星期一至五晚上10點半
《動腦Q》Let's Q the money！
http://bit.ly/2QW8LcI
--------------------
係你！打造星級球隊，征服各地聯賽！立即加入『BFB CHAMPIONS 2.0』！
http://bit.ly/2BUtLvW
--------------------
《體蘋果》陪你睇波講波
https://www.fb.com/appledailysports