阿根廷輸波，對阿根廷擁躉嚟講未必係壞事，經過對英格蘭一役輸波之後，呢支南美區外圍賽冠軍隊嘅奪標賠率連隨降溫，由四、五倍即時跌到落去九倍，諗真啲其實冷得有點過份；𠵱家隊波又唔係無出線機會，只係輸咗一場，重要唔係話打得太差，成隊波仍然係咁有實力，九倍真係超吸引！
入決賽已有得執
既然有九倍咁不俗嘅分頭，就算博埋佢哋「披士」都重有着數。呢種好似賽馬咁嘅位置玩法，就係只要隊波入到決賽，就已經可以收錢；回報計法係冠軍賠率除以二，即係都重有四倍半，相當於之前佢哋嘅奪標分頭，認真抵玩，贏埋個冠軍就重唔止㖭。
德國「披士」更值博
阿根廷條線喺殺入決賽路途上，將會遇到A、C及H組出線隊伍，唔想捉蟲自己減少自己嘅贏面，就當然唔好又同時博法國（都唔知出唔出到線！）及巴西捧盃啦。另一條線，幾已篤定出線次圈嘅德國，到𠵱家仍然有十五倍奪標分頭，亦係值得博「披士」嘅半冷之選。
至於大熱門嘅意大利同埋巴西，得嗰三、四倍，玩「披士」更毫無分頭可言，留番嚟逐場博佢哋WIN重化算。聽日同大家分析吓世界盃連贏位嘅形勢。 文：華度