真係勁！我求大俠今次要讚嘅唔係足球員，而係泳手費斯。呢位擁有18面奧運金牌嘅美國「飛魚」退休後復出，喺周四相隔20個月嚟首次正式比賽，結果就喺美國格蘭披治泳賽亞里桑那站嘅男子100米蝶泳中得第2。第2都要讚？梗係啦！因為費斯只係輸畀國家隊隊友洛捷迪，而洛捷迪游出嘅51秒93仲係今年第2快嘅時間，而費斯嘅52秒13則係今年第4快嘅時間，你話勁唔勁呢？不過，對於係唔係想參加2016奧運，費斯喺賽後仲係帶記者遊花園，淨係話好滿意自己游出嘅時間。唔通費斯係想游埋之後嘅50米同埋100米自由式，先作出公佈？費斯仲話為咗想游得順啲，喺50米自由式預賽，會游蝶式㖭！（賽會係容許㗎！）