林峯近日忙拍新劇《回到三國》，但前日仍抽24小時空檔到大陸搵人仔，先後到佛山和雲浮市為珠寶店剪綵，只是雲浮市一站由於街上逼滿過萬人圍觀，開幕儀式最終被公安下令取消。而林峯在佛山現身時因被眾人圍攻，怕人多手腳亂，惟有出手保護「小峯峯」以免無辜受襲。

最近林峯忙於拍無綫古裝新劇《回到三國》，但前日仍旋風式到佛山及雲浮市為珠寶店剪綵，實行賺人仔搵真銀。前日下午林峯先到佛山，由於剪綵儀式在大廣場舉行，即使現場有近2000市民圍觀，林峯亦能順利現身跟fans見面。

稍後林峯入店內為VIP客人及fans簽名，步行入店期間因市民及fans逼埋身，雖然有保安貼身保護，但林峯為免「小峯峯」無辜受襲，他即時雙手護着重要部位；由於有過千人把現場逼得水洩不通，工作人員見狀惟有落閘以免人群衝入店內。

公安下令取消儀式

簽完名後林峯即要坐兩個鐘車前往雲浮市，至晚上到達雲浮市，剪綵未開始珠寶店外的街道已塞滿過萬人，連馬路也企滿圍觀市民及fans，釀成人車爭路，車輛全部被迫停低，即使大會作出多番勸喻，過萬人依然塞滿現場，最後公安為安全起見下令珠寶店取消剪綵醒獅等儀式。
連踩兩場的林峯只得呆等大會安排，當得知剪綵取消他亦感到可惜，直至兩個鐘後人群才漸漸散去，最後大會只能舉行一個閉門剪綵儀式。問到林峯是否酬勞理想才如此頻撲？他稱已擔任此珠寶店代言人多年，除了酬勞理想外，亦因合作愉快，故只要時間許可都盡量配合。提到他要出手保護「小峯峯」，林峯聞言笑說：「唔係刻意，其實有咁多保安喺身邊我冇擔心過，雙手只係自然咁放喺前面咋。」有否被人「鹹豬手」？林峯謂臉及膊頭會被摸，但「小峯峯」卻未有試過。
撰文：葉雪