零宣傳價值Vs冇家教山寨廠
余文樂、蕭正楠掀兩主罵戰

蘋果日報 2002/09/09 00:00


余文樂與蕭正楠近日屢傳不和,二人所屬的兩間唱片公司高層更針鋒相對,展開罵戰。但余文樂和蕭正楠昨日在活動上卻握手表示友好。
余文樂與蕭正楠昨日一同出席假九龍灣展貿中心舉行的「中銀愛心活力Team」壓軸嘉年華,余文樂在演出後,記者拉攏他與蕭正楠合照,他主動與對方握手。但對於他們所屬的兩間唱片公司對罵,余文樂說:「兩間公司有啲小誤會啫,冇乜大不了,希望大事化小,小事化無啦。」
蕭正楠則說:「我哋冇芥蒂,頭先阿樂重同我講,叫我唔好放喺心度,可能係公司安排協調唔到,我冇敵視阿樂㗎。」

「攝石人博影相」
不過,余文樂所屬環球唱片部經理黃健豪昨日卻在電話中說:「佢哋一邊批評我哋嘅歌手,一邊又喺台下等合照(指蕭正楠),攝石人要博影相,唔通推開佢咩?」而環球唱片總裁陳少寶,昨日在電話中亦說:「第一,係佢哋﹙MusicNation)由頭到尾撩我哋,又話蕭正楠嘅HMV簽名會請我哋啲歌手觀禮,『可怒也』呀,世界上邊有啲咁嘅事!話我哋啲歌星係紙上明星冇料到,咁講令我極度失望,電訊盈科旗下嘅公司,做嘢連山寨廠都不如,冇家教。第二,叫佢哋嘅歌手出嚟跳兩隻舞睇睇,有冇歌藝先,唔好拗咁多啦!第三,環球現階段唔歡迎蕭正楠,佢唔好走埋嚟同我哋啲歌星影相呀。」

「我哋係PCCW」
蕭正楠的經理人Blanche昨亦在電話中說:「乜攝位呀?應記者要求影相咋,我哋使唔使借其他人上鏡呀,余文樂係零嘅宣傳價值,話我哋山寨廠?我哋係PCCW(電訊盈科)呀,佢哋鍾意講乜就講乜,Frankie(李進)都不屑出鬥嘴呀。