金融海嘯再加上油價大幅波動，對環球航空業打擊甚大，年內散戶每次想炒航空股，都特別關心所謂的燃油對冲合約究竟令有關公司「揩」幾多，由於個別公司係在油價高企時簽落有關合約，油價在去年高位147美元見頂後，家陣得50元美元左右，航空公司都幾傷。
近期上市公司排隊派成績表，好多散戶想知的事都漸見浮面，好似講到燃油對冲問題，中國國航（753）去年扭盈為虧，蝕92.55億元人民幣（下同），其中燃油對冲合約賬面虧損達74.72億元；由於今年首季錄得9.89億元燃油對冲合約賬面虧損回撥，加上航油成本減少16.5億元，首季盈利有9.81億元，較上年同期跌5.6%。

經營環境仍差

國航股價踏入3月以來表現有目共睹，現價已升至4元水平，累積升幅已不小，估計短期或要先作調整。
中央政府去年底先後向南航（1055）及東航（670）注資，國航雖然都有申請，但目前為止仍未獲得注資安排。今年公司擬把資本開支下調約三成至90億元，目的係作「過冬」準備，始終經濟前景仲要捱幾耐無人知。油價大幅回落雖令航空公司在營運上獲得一絲喘息，但經濟難以霎時大幅回升，行業環境嚴峻，唔建議現價追入國航。
方星俠