夏日球驗客:阿加斯幫仔剃雞冠頭

蘋果日報 2002/07/21 00:00


阿加斯無疑係位好出色嘅運動員,但係講到做老竇,似乎重差啲。
話說只得九個月大嘅小阿加斯,一直都係由阿媽嘉芙幫佢剪頭髮;點知有日嘉芙出咗街,阿加斯見悶悶地,咪幫小阿加斯剪髮囉。但係阿加斯佢又懶醒,唔用鉸剪而用電剃刀,重愈剃愈過癮,卒之幫小阿加斯剃咗個雞冠頭出嚟。
嘉芙返到屋企見到小阿加斯個頭搞成咁,當堂眼都突埋,省咗阿加斯一餐之後,重立即幫小阿加斯剃光頭。
記得「萬人迷」碧咸早排講過,唔會幫佢個仔布魯克林剪啲標奇立異嘅髮型,費事俾人講閒話;阿加斯年紀雖然比碧咸大,但係夠膽死將個仔搞到鬼五馬六,似乎唔係太過成熟;咁樣睇嚟,佢喺做老竇呢方面應該向碧咸學習吓。

富咸必勝客拆檔互踩
啱啱搵到網上博彩公司betfair.com贊助嘅富咸,同必勝客(PizzaHut)合作咗一年就玩完,有傳話因為必勝客唔滿意富咸成績差,所以唔續約;但另一版本就話係富咸嫌必勝客個標誌唔夠嚴肅喎。其實今次緣盡唔等於冇下次,使乜互相數臭對方呀。
陳慧琳新歌唱球星
○二年世界盃雖然完咗,但香港嘅足球熱潮似乎重未有減退。好似陳慧琳有首歌叫《想再見到你》,裏面啲歌詞提到費格遜、侯利亞、龍格保、荷杜同埋魯爾,反映咗港人對足球係幾咁狂熱。啲歐洲波喺下個月就陸續開返,港人到時又有排忙啦!

國米為尼斯達留13號
國際米蘭雖然早排向拉素斟尼斯達失敗,但佢哋對呢位意大利國腳後衞念念不忘。事關國米喺日前公布咗○二/○三球季球員嘅號碼,「13」號球衣重未有人着。係人都知尼斯達喺拉素同意大利國家隊都着開「13」號,睇嚟,國米重好堅決想邀尼斯達過檔。