繼《真．三國無雙3》後，緊接着最受機迷歡迎嘅，肯定非《第二次超級機械人大戰α》莫屬。廠方號稱今集將原點大幅改良，更引入嶄新嘅小隊概念，成為最完美嘅一集。今日《打機樂園》打破着重介紹新Game嘅慣例，以較深入角度探討《機戰αII》，分析一下呢隻Game嘅優劣。
記者：徐影龍

遊戲類型：SLG
對應機種：PS2
遊玩人數：1人
售價：$399（行貨普通版）
開發商：BANPRESTOCO.,LTD.

《機戰》系列最大魅力所在，肯定係每集有乜機械人登場。今集除「穩膽」萬能俠及高達系列外，新登場最矚目可算勇者王、海賊高達及金剛飛天鑽（又名磁力鐵甲人），加上大量名作機體復活，如戰國魔神、帝皇萬能俠、鬥將大武士等，最感動係連筆者至愛嘅大空魔龍都翻生（港譯宇宙飛龍），之前因《機戰S》超慢Load碟而被迫放棄，今集終可一償心願。《機戰αII》總數共有十五套登場動、漫畫作品，Fans年齡層極廣闊，難怪紅足咁多年。

育成系統弱機變主力
其他系統改良方面，主要有機師育成元素。過往要提升機師能力，除賺經驗值升等級外別無他法，今集就加入P.P.數值，作提升機師各種能力之用，如攻擊力、地形適應、特殊技能等，機迷大可集中培訓喜愛嘅角色，就算弱如波士嘅大鐵牛都可成主力機體。P.P.值可由擊落敵人、達到熟練度條件而獲得，而熟練度亦係平衡遊戲嘅重要元素，除一般過關條件外，若達到每關嘅額外要求，如七回合內敵全滅，便獲得熟練度，達到指定數值，便會有各式隱藏機體加入，令機迷可決定遊戲難度。
最值一讚係操控嘅改良，基本上DualShok2手掣所有按鍵都用得着，如△快速變形、□快速轉小隊長等，R1＋Start更可跳過每段對話及劇情，最特別係喺地圖打記號嘅R3，用作標示首領射程範圍一流，免致一時大意踩入「禁地」。