李璨琛擔任監製兼主演的賀歲電影《大盜演》，前晚在奧海城舉行首映。面對賀歲檔的對手，包括黃子華自導自演的《乜代宗師》等，李璨琛坦言不會硬碰：「我哋安排賀歲第二檔期上，壓力冇咁大，當然我哋呢部戲係主打香港市場，因為係一部本土電影，但對住子華好似蝕喎，所以我退而求其次，第二檔都OK，就算子華殺到落嚟繼續上，佢都已經上咗一輪。」

想香港人放鬆

問到會否擔心最近的社會氣氛令人沒有意欲入戲院？李璨琛說：「冇諗得咁多，只係希望大家可以搵個位輕鬆吓，𠵱家香港都冇乜娛樂。」他表示會多做謝票活動：「如果時間啱，帶埋Lucy去都得，但睇戲就唔得，因為熄燈會驚，佢實扭計。今年喺香港過，等Lucy𢭃吓利是先，係時候要出動。」身邊的樂瞳則笑言想避年，因為經常被人催婚。

秦沛支持港片

另外，同場的秦沛提到與子女姜文杰和姜麗文首次合作，他們異口同聲表示很開心。身兼執行監製及演員的姜文杰指邀請爸爸拍戲時感到很緊張，秦沛卻大派定心丸說：「我好希望幫個仔完成呢個夢，佢又做監製，又做後期，我一定支持佢，就算唔係為個仔，作為一個香港電影工作者，我哋係老一輩，都應該支持香港電影。」問到是否滿意兒子的表現？秦沛笑說：「希望再有下一部，即係功夫好囉！」