膠燈討論區:季軍戰買定7+

蘋果日報 2014/07/10 05:20


艇仔張:德叔,幫我開7支德國啤,我請咁多位街坊飲!
福 嬸:張生,咁闊佬,贏大錢呀。
肥 頭:唔係喎,你前日先講買巴西晉級㗎喎,唔係咁快就今日的我,打倒昨日的我呀。
艇仔張:邊個話畀你知我贏先,巴西對德國(圖)我就梗係輸錢啦,買一注晉級一注讓球,德國領先一球,我仲追多注巴西下一隊入球,話咁快又輸埋,好彩德國連珠炮發入4粒,我嗰部手機又慢,未更新到賠率,唔係輸多幾注下一隊入球㖭,既然啲錢唔使輸,就請大家飲啤酒啦。
肥 頭:我有個朋友之前德國對葡萄牙嗰場又係咁,葡萄牙輸一粒就博反底,買葡萄牙下一隊入球,結果德國大炒4粒,佢唔見幾千銀呀。
德 叔:我幾時都話賭波要睇個勢,輸緊嗰隊處下風,莊家又唔見畀好高賠率你,追強勢始終好過追弱勢。
艇仔張:我都知錯啦,如果呢場我唔拗頸,改為追「大」,贏番開波前嗰兩注巴西,一路追贏番突有餘啦。
肥 頭:咁又好難怪你,邊估到呢場波會踢到七個一皮,話晒世界盃準決賽喎,而且德國以前一向好穩陣,一、兩粒就夠皮嘛。
德 叔:不過今屆德國又唔同風格喎,炒葡萄牙、巴西已經多波入,對加納都開「大」,似乎班後生仔唔識留。
艇仔張:決賽我就唔諗住,季軍戰就一定捧「大」,巴西呢場輸到大大鑊,點都要挽回面子,總入球買7+都唔過份。
德叔
旺角茶仔老闆
肥頭
吹水怪
祥Hi
肥頭屋村老友
福嬸
茶餐廳侍應
艇仔張
扮專業賭友
大食肥牛
賭精一名,命中率甚高
【依波Live】即睇直播:
http://worldcup2014.appledaily.com/match/live
http://bit.ly/EballLive