好多人都覺得時下嘅細路或者青年人淨係識得追求吃喝玩樂，對社會上嘅事冷漠不關心。不過，大使就接觸到一個鮮為人知嘅溫情故事，之前西貢一名慈父崔先生為咗拎啲新鮮嘅午餐飯盒送畀兩個喺學校上堂嘅女，途中遇車禍身亡，呢段感人嘅新聞報道，除咗得到善長捐款令佢哋家人度過經濟難關外，亦得到唔少社會人士嘅關心。

感激咁多人關心
好似早前一間小學嘅師生們，為表達佢哋對社會上弱勢社群嘅關心，學校師生成二百幾人，每人設計咗一張心意卡送畀崔太同埋九歲嘅阿麗及七歲阿儀，每張心意卡嘅設計都好特別，有啲卡封面畫咗唔同顏色，部分就貼咗多款公仔貼紙，亦有啲送上親手摺嘅紙鶴，內頁重寫埋鼓勵嘅字句，叫佢哋要：勇敢面對將來，千祈唔好放棄，並鼓勵兩姊妹更要畀心機讀書。
崔太接過心意卡之後，同大使講真係好感動，有咁多人關心佢哋，而阿麗同埋阿儀更即刻寫咗張卡多謝哥哥姊姊們嘅心意，在這個寒風凜凜嘅冬天，佢哋彼此互送關懷，令旁人也感受到絲絲暖意。

暖流熱線
電話：29908688
傳真：23702192
電郵：[email protected]
網址： http://www.charity.atnext.com