新登場:
日式放題回本搵食攻略

蘋果日報 2002/01/26 00:00


市道不景當然要應慳則慳,要搵間價錢合理兼且食物要有水準的餐廳食飯,難!重要食日本菜?難上加難!不過位於銅鑼灣新張的日式自助餐廳,全部菜式由日本人親自主理,加上一個大眾化價錢,重有多款好似阿拉斯加蟹、紅雪蟹等回本食物任食唔嬲。點先食回本?究竟有幾抵?畀埋個同區價你格吓價就心裏有數啦!
記者:莫麗嫦
攝影:陳智良
北極紅雪蟹腳
(同區價:約$220/3隻)
阿拉斯加巨蟹腳
(同區價:約$160/3隻)
全場最矚目兼搶手都莫過於Buffet枱上堆積如山的紅雪蟹腳同阿拉斯加蟹腳!由於老闆在美國的分店眾多,可以大量入貨,成本因而較低,一堆堆新鮮由美國入口的蟹腳任食唔嬲,正如店舖的口號:AllYouCanEat,食得幾多得幾多!
試味報告:蟹腳肉厚,且極之鮮甜!
天婦羅烏冬
(同區價:每碗約$30)
日式拉麵同烏冬,外面食閒閒哋都要三四十蚊一碗兼且口味未必正宗。反觀這裏的拉麵同烏冬雖然只得三款選擇,但口味地道,湯底已經用三款魚熬製而成,兼且每碗烏冬都有天婦羅大蝦一隻,材料十足。
試味報告:湯底鮮甜,烏冬亦極之幼滑,不過分量較少,要攞多幾轉先夠。
海鮮番茄湯
(同區價:$50/碗)
自助餐中,餐湯向來只屬配角,你以為日式自助餐淨係可以飲到味精麵豉湯?咁你就大錯特錯喇!一個巨型大盆盛着火紅熱湯,數一數湯內材料:蟹、青口、魚肉、蜆……名副其實的海鮮湯,落足材料,問你服未?
試味報告:湯底鮮甜不在話下,就連湯渣都不容錯過。
壽司
(同區價:十件拼盤約$100)
壽司吧上有約四十多款壽司,魚生壽司、手卷及卷物樣樣有齊,連香港人最愛的海膽、三文魚等都乖乖列隊等你攞埋位。當中尤以最大件的萬福招牌壽司最搶眼,裏面有蘆笋、鰻魚、辣三文魚、煙肉等材料製成,足足比其他卷物大一倍。
試味報告:招牌壽司卷材料豐富之餘口感亦多樣,還有多款店舖獨有的卷物如炸蒜及芝士卷同樣精采。
甜品
(同區價:小甜餅約$12/6件芝士蛋糕約$18/件)
色彩繽紛的甜品分別由四位日籍師傅不停炮製,芝士蛋糕、Tiramisu、鮮果小甜餅……就連近來極人氣的CreamPuff都有,而且全部Homemade,專攻甜品的朋友亦唔會失望。
試味報告:每件甜品都係迷你size,一口一件,可以試勻咁多款都唔覺膩。特別推介生果甜餅同芝士蛋糕。
燒章魚丸
(同區價:約$6/3粒)
全店的醬油代理商佐佐木先生,專程帶同章魚燒的師傅由日本來港,傳授章魚燒製法。以往章魚燒都是由人手將粉漿打轉製成球狀,但店中卻用自動的章魚燒機,一按掣,一粒粒章魚燒會一邊彈跳一邊變得圓渾,十分有趣。
試味報告:熱辣辣的章魚丸食落沒有糊口感覺,配合酸甜的醬汁完全日本風味。







中日食客直擊




員工有嘢講



店名:萬福
地址:銅鑼灣廣場1期6字樓
電話:25784447
營業時間:上午11時半至下午2時半,晚上5時半至11時半。
座位:約280個
付款方法:現金或信用卡(Visa,Master,AE,JCB)
價錢:午餐星期一至五$98,星期六、日及公眾假期$118;晚餐星期一至四$198,星期五、六、日及公眾假期$218。
備註:65歲長者可享八折優惠,身高1米以下小童半價。
全餐同區價約$596放題價$218平足一倍