自踏入2002年後，各大車廠都紛紛推出新車，以爭取更高嘅市場佔有率；就連向以生產高性能跑車嘅雅士頓．馬田亦唔例外，最近外國方面就有消息傳出，謂廠方正研製一部身形較為細小嘅跑車，除預計於2004年底推出外，更視保時捷911為假想敵㖭！
從電腦模擬出嚟嘅圖片中可以睇到，呢部暫時被廠方稱為AM305嘅縮水雅士頓．馬田跑車，其造型設計與現有嘅DB7跑車相近，除擁有極具流線型嘅車體設計外，低斜嘅頭燈襯以「招牌式」鬼面罩，望落可謂既突出又吸引；車廂布局方面則未有進一步嘅資料，但可以肯定嘅係，新車只會有雙座位配搭，兼且會被鋪排得極具跑車氣息。
而該消息又指出，新車將會起用一台4.0公升V8引擎，馬力輸出高達360匹外，配合極輕嘅車身，難怪新車嘅極速可高達約262km/h咁快啦。有興趣嘅車迷，不妨留意新車嘅確實推出日期喇。