噚日天氣又焗又熱，但聯通（762）旗下中國聯通（香港）就請咗超過100人，去心曠神怡嘅將軍澳堆填區附近，出席環球中心嘅奠基儀式，順便幫平時坐得office多嘅上班族出番身汗。
出席嘅嘉賓大多數係電訊界嘅行家，仲有中聯辦、中企辦、銀行界嘅人士，但喺30幾度高溫下，好多人都忍唔住要除咗件西裝褸。而今次活動，最多人留意嘅，除咗有聯通總裁陸益民，仲有就係香港電訊（6823）董事總經理艾維朗，皆因佢哋啱啱宣佈供股。
不過艾維朗就好口密，唔多評論供股細節，又唔透露PCCW同CSL遲啲點樣整合，只係賣關子話好快有進一步公告。問到幾時有iPhone6，佢就話CSL同蘋果公司仲有合約，可能搶到頭啖湯喎。