成名要趁早，眼前20歲的顏卓靈是本地新人辦。
14歲從𡃁模做起，拍過街知巷聞的快餐與相機廣告。19歲拿下香港電影導演會年度新演員獎，20歲提名金馬獎、金像獎影后。從𡃁模轉型成實力派演員，不是光靠袒胸露臂就做得到；有運氣有潛質，顏卓靈沒有說要去到幾盡，她單純地想發一個演戲夢。是發演戲夢而不是發明星夢，就是這一點點差異，追夢就在起跑線上有分野！
統籌：林妙萍
撰文及造型：趙潔恆
攝影：周樂恒
化妝：Linfa of Il Colpo
髮型：Man Chan of Touch Up

有人話香港娛樂圈出現斷層，難得一見有年輕新血彈出，顏卓靈憑一戲火速揚名是夾準時辰的。一切由《狂舞派》上映口碑載道開始，工作機會接踵而至。

告別爆牙

觀眾起初對她印象模糊，很多人覺得她長得像湯唯，也有人認錯她是薛凱琪。「俾人話我似靚女唔會唔開心，仲好開心可以同佢哋比。當未有好多觀眾知道顏卓靈係邊個嘅時候，有記者朋友願意報道我，『顏卓靈』呢三個字好陌生，就幫我製造咗gimmick（噱頭），我好多謝同埋感恩，冇佢哋我都冇今日。」口齒如此乖巧是天生吃這行飯的特點，難怪連杜汶澤都曾大讚這位初生之犢有點像當年的蔡卓妍。
連環於兩大電影頒獎禮上與章子怡同場較勁，她的名字與臉孔更廣泛滲入大眾腦海，人人都記得那位可愛的爆牙妹叫顏卓靈。可是這位對演戲懷着野心的90後，有可能會同自己最具代表性的爆牙say bye：「大家都覺得好可愛，但如果有機會繼續演戲落去，要接唔同角色，加上隨住自己年紀大，爆牙就會影響到工作。我個樣好似成熟唔起，會限制我演嘅角色，所以會再諗諗箍牙。」

出書剖白

就到7月書展，不少女星𡃁模每年都一展所長，有賣弄性感拍寫真，也有販賣文藝氣息，寫書做才女。滿腔熱血甚麼都肯試的顏卓靈，去年開始執筆以書信形式抒發少女情懷，趁機告訴大家她的真實一面：「公司同我講既然我咁鍾意喺facebook寫嘢，不如試吓啦！將我呢兩年對事業、現實同夢想嘅感想寫落嚟，寫信畀唔同嘅人、事、物，好似死亡、青春、美少女戰士同埋我去過嘅尼泊爾。其實啲信會有酸酸哋嘅感覺，我始終唔似阿花咁百分百正面，我有少少悲觀底嘅。我想借呢個機會同大家講我顏卓靈並唔係阿花，我份人都幾極端，有時好大膽唔怕醜，熟人面前好直好寸，但係喺陌生人面前比較內斂。我其實幾鍾意思考同獨處，可以清理吓思緒。」
顏卓靈渴求走出陽光少女的框框，8月將會接演一個極具挑戰性的角色：「拍戲冇話要去到幾盡，我鍾意感受個角色，下部戲係一個好黑暗、分裂、有非人經歷嘅角色，會花多啲時間讀劇本，仲會睇多啲相關嘅書。」

更多精采時尚內容，盡在 http://add.appledaily.com。

識睇　一定睇蘋果嘅足動世盃：
http://worldcup2014.appledaily.com/