當年今日

一味窩輪:九倉升 買9190

蘋果日報 2002/02/16 00:00


馬年第1個交易日,有個好開始,升幅超過1成嘅窩輪,差不多有30件。
9字頭新輪有啲可能因為成交疏,幾乎牌下只見莊家活動,冇乜外人參與,輪價冇跟貼正股。
例如九倉(004)昨升35仙,有兩隻九倉Call輪,照正兩隻都應該跟正股升。實情係1升1跌。9149收23.4仙,升8.3%,但9190則收31.5仙,反跌1.6%。
9190溢價等數據並冇唔妥,唔跟正股升,就啱晒趁低買入。9149今年8月到期,溢價9.1%,槓桿率7.5倍。9190去到11月至到期,溢價6.2%,槓桿率5.6倍,抵過9149。第日交投熱番啲,9190會跑番快啲。
是日輪王係摩台Call輪2270,收1.5仙,升36%。
2270今個月27號最後買賣,溢價8.2%,槓桿率63.7倍。

輪王遲早再死火
台股仍然休市,假期內美股急升,台股復市預咗會追番啲升幅。但要升8.2%以上,唔多實際,2270好快會做番死火輪,咪諗住刀仔可以鋸大樹。