袁仁祥帶隊到海防道食橋底牛丸，有佢帶路實唔會去錯另一檔，飲埋正宗藥煲奶茶真係冇得頂。袁仁祥話佢啲日本生意老友嚟親香港例必一次過食三碗先夠喉，加埋平時日本餐餐牛肉飯，成個月都與牛為伍。
三碗牛丸落肚，袁仁祥點起水貨煙吐真情，「成日話巿道差，工廠冇單接所以裁員，其實假嘅！最近我有資金想搞批波鞋，搵咗唔少廠都冇人肯接，又話手工多又話做唔到，其實嫌我張單細，講多兩講直頭趕我出門口。」
原來袁仁祥想學日本猿人整對「悲．時打」，到時出自己牌子之餘又可同人乘一乘搞時下流行的所謂別注或時空交錯版（Crossover），信心十足肯定有Noise。
「不過我哋啱啱起步，點輕易吞得晒個貨量？其實政府好應支持吓我哋中小企。」袁仁祥開始激動。學日本仔好難學，人哋寧願做貨五千，但只賣一千，嚴格控制巿場流量，價格好易炒上，點同哋我哋香港商人咁眼淺，掠得就掠？

主持人：大食Jack
八卦熱報：[email protected]