當年今日

父母入獄貧困姊弟獲助修廚盆

蘋果日報 2002/08/11 08:00


「廚房嘅水龍頭一開,水就慢慢由個洗手盆下面漏出,浸濕晒爐具,每次開完水喉,我都要用大半個小時拖地,煮飯同埋洗煲惟有去廁所,邊敢叫師傅上門修理,因為淨係上嚟睇,都要畀五十蚊,維修費又要幾百蚊,真係唔捨得畀呢筆錢。」阿怡無奈歎道。
阿怡的父母在港非法居留二十多年,去年十一月他們才向入境處自首,盼可為三名在港出世的兒女取得居港權,早前他們被法庭判入獄十個月。
阿怡惟有向幼弟騙稱父母現時在北京工作,身兼父母兩職的她,每日除了照顧弟弟的起居飲食外,還要教導他們溫習中英文課本,而每兩個星期亦要到監獄探望雙親。

「大細孖」入讀小二
「成日要湊住兩個細佬,又要教佢哋讀書,我真係覺得好攰;下個月佢哋開學,又擔心細佬唔適應,跟唔到學習進度,好想阿爸同阿媽快啲出嚟!」面對沉重的生活擔子,瘦削的她盼望地說。
下個月「大細孖」終有機會初嘗校園生活,他們獲安排入讀小學二年級,而她則升讀中三。近月,他們獲社會福利署資助購買校服及書本,助紓經濟壓力。為節省開支,懂事的阿怡目前仍四出購買二手書。

生活困苦省吃儉用
「每個月要交屋租同埋水電雜費都要成幾千蚊,每餐餸我哋都盡量食少啲,有時買啲菜、薯仔或者芽菜,都會分兩、三餐,希望慳番啲錢可以買個書包、鞋同埋水壺畀細佬開學用。」一臉倦容的阿怡憂心忡忡地道。
記者了解阿怡的經濟困境後,即時向蘋果日報慈善基金「家電維修專戶」申請撥款,資助其維修廚房洗手盆的費用。
「家電維修專戶」至今收到讀者捐款累積達一萬二千五百多元,旨在紓緩貧窮家庭在家居維修方面的經濟壓力,善長的慷慨捐款,將可以改善這班弱勢社群的生活。
該專戶的資助範圍包括:維修損壞的家庭電器、廚房及浴室的基本修理等。社會服務機構可轉介有需要的個案予蘋果基金跟進協助。
阿怡捐款編號:C0627

暖流熱線
電話:29908688
傳真:23702192
電郵:[email protected]
網址: http://www.charity.atnext.com