當年今日

  上海見市長
  廖秀冬透視裝遲到冇人鬧 - 李八方

蘋果日報 2002/09/19 00:00


環境運輸及工務局局長廖秀冬做咗問責局長個零月,終於有機會北上,今次重開正佢嗰瓣,同政務司司長曾蔭權齊齊去上海視察基建及運輸項目。不過,在正式到滬訪問前,局長原來已「秘密」飛咗去北京,所以連禮拜二行政會議復會首次會議佢都唔去。八方聽聞,佢上京主要係拜會對口單位,傾吓環保事務;至於有否講埋條港珠澳大橋,就冇人肯透露風聲。

上海大塞車
廖局長昨日到達上海,切身體會當地的交通問題──大塞車。話說佢遲煲呔一班機到達,本來都趕得切下晝兩點四十五分去市政府見市長陳良宇,點知一出機場撞正大塞車,結果遲大到,雖然趕到一身汗,但係廖局長一襲黑色透視裝(當然有打底)配黑珍珠項鏈,仍然十分搶鏡。
通常靚人遲到都唔使捱鬧,陳市長昨日果然攬晒上身:「上海交通真不如香港,香港的交通繁榮暢通,上海則堵得很厲害。」佢重話九二年時上海成日大塞車,其後已經改善,不過家陣起緊六十幾個地鐵站,所以又塞,希望大家見諒。有個咁識講嘢嘅市長,滬港大戰先畀上海贏一分又點話。
(圖)喺煲呔(右二)率領下,廖秀冬着黑色see-through襯黑珍珠頸鏈訪上海,寧舍sharp。 記者上海傳真


傳真︰2623-9278
電郵︰[email protected]