美國駐港總領事夏千福識飲識食，facebook成日見到佢嘆地道美食。噚日佢就出席鯊魚保育活動，用齊英文、廣東話同普通話承諾以後都唔食翅。千福BB好誠實咁話以前食過翅，但已經係過去式喇，佢又中英夾雜話「That's why我不吃了」。查實千福BB唔食翅仲有好多好嘢食，網民繼續熱切期待佢去明將壽司挑機。

「沙龍相」一個鐘影完

千福BB原來主動聯絡保育團體「護鯊行動」，粉墨登場幫佢哋拍攝宣傳照。「護鯊行動」項目主管何旖澄憶述，上周五成班義工去美國駐港總領事館影「沙龍相」，拍攝地點只係領事館餐廳，用咗一個鐘就完成。宣傳相中嘅千福BB比較嚴肅，同平時笑笑口唔同，佢爆料話其實仲影咗一款「千福style」，由總領事自行決定拍攝姿勢，千福BB亦好有諗頭，用筷子代手指打交叉，何旖澄大讚千福好型。何旖澄話嚟緊想請政府高官影同系列作品，宣揚「一翅都唔食」訊息，初步諗住搵環境局副局長陸恭蕙。千福雖然幫鯊魚發聲，但被問到6.22投票問題，佢只話集中討論保育議題，唔肯多講。

李八方
mailto:[email protected]

識睇　一定睇蘋果嘅足動世盃：
http://worldcup2014.appledaily.com/