踢爆俞宗怡黎年「緋聞」 - 李八方

蘋果日報 2002/09/09 08:00


八方寫過一九七三年係港大好時年,事關喺港府三司十一局中,就有一司三局長係當年嘅畢業生,包括梁錦松、馬時亨、葉澍堃同埋廖秀冬。原來七四年亦係好vintage,因為十六個常務秘書長之中,有三位同屬港大「七四年」出品,分別係工商及科技局常任秘書長俞宗怡、經濟發展及勞工局常任秘書長李淑儀、財經事務及庫務局常任秘書長黎年。
更湊巧嘅係,三位「常秘」都係修讀歷史,加入政府多年。俞小姐最高做過庫務局局長;李小姐做過經濟局局長;黎年曾任廉政專員。最後呢三位同班同學兜咗一個大圈,又齊齊做常秘,世事真係幾玄妙。
了解呢個背景,就會明白雲英未嫁之俞小姐同不談私事嘅黎先生,點解久不久就有緋聞傳出。原因係佢哋是同學,且一齊做官,自然比較投契,而兩人合擁一個高爾夫球會籍(呢樣嘢好常見啫,可以轉讓之公司會籍,許多都有兩個提名人,俞小姐冇理由一個人用),每年申報利益時,都會惹人遐想;其實就冇乜嘢。


傳真︰2623-9278
電郵︰[email protected]