李鵬今日就會抵達澳門，第一次到訪呢個東方拉斯維加斯。雖然係一次處女訪問，澳門嗰邊啲警察又好緊張，但啲香港傳媒就好似唔多理佢，大家關心場外示威者多過李鵬本人。
點解八方咁講？唔係亂估，有根有據㗎！澳門新聞局前幾日向本港傳媒發咗張報名表，每個李鵬參觀的採訪位置都有記者限額，由兩個到七十個不等，八方見班同事報名時，諗住多數抽唔到位置採訪，邊有咁好彩吖，國泰抽一萬張機票都冇份啦！
點知噚日公布抽籤結果，全部報名的位置都有《蘋果》份，亦都有《東方》份，至於香港六間電子傳媒亦全部入圍！點解大家都咁好彩呢？原來因為香港的中文報紙就只有呢兩份報咗名，其他報紙呢，就完全當李鵬冇到，甚至連香港《文匯報》、《大公報》都唔理佢！
噚晚有行家同八方講，雖然明知李鵬唔會同傳媒點講嘢，但係佢哋都唔想咁唔畀面，邊個叫澳門新聞局傳真表格來香港，揀正新春休假期間，截止日期又急，想補鑊都嚟唔切啦！


E-mail：[email protected]