由劉德華、梁朝偉、黃秋生及曾志偉四位影帝合演的《無間道》，在香港叫好叫座，昨日華仔到商台出席廣播劇《仙樂都》記者會時透露，《無》片將參與角逐奧斯卡最佳外語片，而該片所屬的寰亞電影負責人莊澄亦表示《無》片能入圍的機會頗高。

由劉德華、梁朝偉、黃秋生及曾志偉合演的《無間道》，在香港上映時口碑與票房大豐收，開拍該片的寰亞電影即時加碼投資開拍《無間道II》及《無間道III終極無間》，有美國電影公司更購下該片版權準備翻拍，找來畢彼特飾演梁朝偉的角色，而《無間道》還會參與角逐今屆奧斯卡最佳外語片，為港產片爭取殊榮。

先橫掃亞洲各獎
劉德華昨日與朱茵、鄭中基及古巨基到商台出席《仙樂都》廣播劇記者會時，表現相當雀躍，他說：「我都係接到岳少（林建岳）電話先知，我當然覺得好開心，而且我都好有信心，但係入唔入到圍就未知，所以我都希望往後嘅電影喺國際都能獲肯定。」問到華仔有否想過一償當選奧斯卡影帝的滋味，他笑說：「我真係冇諗過呀，等我攞晒亞洲啲獎先啦，我連金馬獎都未攞。」
提到華仔將參演張藝謀的新戲，他說：「雖然我未簽約，但係都有百分之九十九嘅成數會拍，其實之前張藝謀一直都覺得我係偶像派演員，直至佢睇完《無間道》之後，都讚我做得好精采，我聽到當然好開心啦，所以就即刻三步檻埋兩步走去同佢傾啦。」
華仔亦透露前日欣賞利物浦球賽時發生了一件趣事，他說：「我去到停車場門口時，有個啹喀兵問我『AreyouAlanTam？』，我諗佢係等緊阿倫啦！」

安排在美國上映
寰亞電影負責人莊澄昨日接受電話訪問時說：「套戲已交咗畀香港評審評選，贏嘅機會好大，有美國公司都買版權再拍，美國方面應好有興趣，我哋亦安排緊套戲喺美國上，入唔入到圍八月就知，我哋對部戲好有信心，有望向奧斯卡進發。」
而鄭中基昨日對於有報道指楊千嬅拒絕與他一同擔任港姐表演嘉賓一事說：「我一直都冇聽過千嬅會做嘉賓，我亦唔介意同佢合作，因為我同佢都合作過好多次。」
此外，華仔日前到台灣時，遇上正在當地宣傳韓劇《今年》原聲大碟的韓國歌手朴龍河，兩人惺惺相惜，除一同合照外，更交換電話號碼，期待有機會再見。
採訪：李珮洳
攝影：甄朝健