韓國整容風氣盛，就連藝人都會整容，不過近日就有病人嘅整容短片及相被外洩，有唔少網民批評相關人士冇職業道德。

據報道指，一名人氣歌手兼演員C某於上月中旬喺江南ID醫院接受整容手術，不過C某喺麻醉後做整容手術嘅短片、相就被偷拍，而相關內容亦被該醫院嘅護士A某洩露。報道續指A某將相關內容畀咗自己嘅男友B某，但B某就利用C某嘅整容短片及相去威脅醫院醫長，要求10億韓圜(約698萬港元)。

院方以非公開形式委託警方調查後，警方於上月尾以恐嚇及威脅罪拘捕B某，警方亦正調查A某係咪共犯，而相關案件亦會被移交檢察廳。對於病人資料被外洩一事，醫院方面僅表示：「無可奉告」，亦冇透露洩露短片嘅護士A某嘅去向。

據悉ID醫院係江南區出名嘅整容外科醫院，以正顎手術最為出名，而報道曝光後，網民亦紛紛推測C某嘅身份。

精選韓流，喺晒《娛果》
http://fb.com/appledailyent