估唔到何韻詩（阿詩）嘅「忍」功係咁了得！阿詩日前因為感冒菌入腸屙到七彩，但前日佢都要喺電視城拍新歌《水花四濺》MV，結果拍到中場，阿詩難忍肚痛之苦，中途走咗去浸會醫院睇急症。
返廠後再拍到夜晚，阿詩個肚又唔生性，雖然佢喺無綫個更亭出面拍，行幾步就去到廁所，但阿詩寧願肚痛到吔吔聲，都唔肯去廁所解決。
原來外表硬朗嘅何韻詩好驚鬼，咁啱最就腳嘅廁所係傳說中嘅猛鬼廁所，肚屙遇上猛鬼女廁，對阿詩嚟講簡直係慘絕人寰。
保母陪壯膽
不過阿詩最終都忍無可忍，拍完MV之後即刻要保母同化妝師陪佢如廁壯膽。點知阿詩去咗幾十秒就走番出嚟，原來佢愈諗愈驚，所以都係「放水」就算，「大事」就點都要忍到返屋企先解決。唔知佢喺猛鬼廁所「放水」時，有冇驚到水花四濺呢？
成龍二百臨記攻韓
成龍最近喺曼谷拍咗佢第一個韓國廣告，聽講重破晒韓星嘅廣告酬勞紀錄，酬勞超過三百萬港幣，合約為期半年。
成龍拍嘅係一間叫SK交通情報服務中心嘅廣告，除咗佢份人工，淨係製作費都超過六百萬港幣，重動用咗二百個臨記拍攝。廣告會喺下個月開始播放，中間重會加插好多成龍過往電影嘅片段，絕對令人期待。
劉錦玲樂製福音VCD
劉錦玲𠵱家拍緊無綫套《絕世好爸》，自從佢信咗基督教之後，就積極參與傳教嘅工作。佢同馮仁昭講話籌備緊一隻分享見證嘅VCD，自己有份做幕後工作，重揸埋機拍攝㖭。雖然資金唔夠，好多嘢要親力親為，佢話一定唔會放棄，因為畀到佢好大嘅滿足感。
張慧儀驗身惹猜疑
張慧儀噚日突然喺九龍塘浸會醫院出現，難免令人擔心佢所為何事。馮仁昭於是打電話問候張慧儀，睇吓佢有乜事，張慧儀話：「我冇嘢噃，去醫院只係做例行身體檢查，千祈唔好嚟搵我，因為我希望有多啲時間休息。」
陳錦鴻剃頭積福
陳錦鴻前晚喺銅鑼灣拍亞視電視劇《尋找李商隱的愛》煞科戲，錦鴻話下個月會去新加坡演出一個慈善佛教話劇《聖僧羅拾傳》，呢個劇係為當地嘅福海禪院籌款，個角色要佢剃頭演出。錦鴻話因為個話劇係慈善，覺得好有意義，所以剃頭都冇所謂，當係做功德回饋父母。
羅慧娟同中年男友搵食
羅慧娟同周星馳分咗手咁多年，一直都冇乜緋聞傳出。早排馮仁昭喺跑馬地，見到佢同一個中年男子喺一間賣健康食品嘅舖頭睇嘢，男方都有四、五十歲，馮仁昭聽到佢同對方用英語溝通，阿娟成日周圍望，警覺性好高。唔知呢位係咪娟妹嘅男朋友呢？