捷美香港（702）最近又蠢蠢欲動，有份幫手嘅經紀又周圍放風話要炒上，雖然小初唔敢駁嘴話冇得炒，但係就有些少保留。
捷美馬年第一個交易日表現唔錯，升5.1%，收1.24元，成交327萬元。

PE高逾千倍
捷美由以前賣芝麻糊到𠵱家做能源石油業務，股價一直只係識升唔識跌，而PE高逾千幾倍。如果散戶由上市揸到今日嘅話，當然係發大達，但小初就唔信有咁嘅人。
其實，捷美早排都講明，街貨原來集中喺少數人手上，換句話說，即係大戶散唔到貨咁解。小初聽聞呢隻股背後有唔少大陸佬揸住，但揸咗咁耐，佢哋都好想走。
如果想走得成嘅話，必定要炒上放一陣煙花先至有人肯跟，但捷美股價咁高，究竟重有幾多水位可以再升呢？重有係捷美有得炒嘅消息傳到周圍都知，更令小初感到擔心。