建制派唔妥成日被班維園阿哥狙擊，揚言杯葛《城市論壇》，但事實證明，唔同聲音即場互片不但可以提升論壇嘅可觀性，仲可以提升與會嘉賓嘅水平，連一向有「人肉錄音機」之稱嘅林D9，都當場精靈咗，居然識得駁嘴駁舌，與過去無論對方講乜佢都係講番同一條line嘅表現相比，進步到可以攞獎。

論壇噚日火花四濺，但最令人拍爛手掌嘅一幕，係公民黨黨魁余若薇發炮，擊中林D9要害。話說Audrey聽完林D9施展其人肉錄音機絕技後，回應時直呼林D9做「林公公」，立即引來全場掌聲。
林D9嘅表情先係錯愕，然後黑面，定一定神後，就向主持要求發言，扮晒不經意咁講：「順便回應一下，呢個論壇真係近朱者赤、近墨者黑，可能近日公民黨近得長毛佢哋多，佢（余若薇）跟埋陳偉業叫我外公喎。大家係平輩，就唔使咁尊重嘅。」林D9呢招阿Q式將「公公」演繹為「外公」，手法同中央釋法扭曲《基本法》一脈相承，講完佢個表情仲好自鳴得意。但現場嘅香港人又點會畀林D9一時寸嘴得逞，立即報以強勁噓聲。
除咗「民主女神」同「林公公」正面交鋒，維園阿哥同維園阿伯亦炒鑊勁。開壇前，維園阿哥任亮憲、莫乃光、「星屑醫生」歐陽英傑先開記者會，宣佈發起「全民發聲」運動，鼓勵全港市民喺不同傳媒同渠道表達意見，捍衞言論自由。維園阿伯即時響應，紛紛表達意見，例如「當年你咁講，你已經人間蒸發嘞」、「仆街」、「冚X鏟」等等，未開壇先興奮。

對於阿伯低水平嘅攻擊，阿哥當痕，集中火力反擊保皇派屈佢哋暴力嘅言論。何鍾泰早前聲稱被跟蹤，班阿哥就話，當日只係向公民黨交還一幅橫額後巧遇何議員，過程仲有傳媒實，冇得屈，所以決定贈何議員兩句打油詩：「銅鑼灣我行晒，因為我係何鍾泰！」
另一位叫「可樂」嘅阿哥仲絕，保皇派話杯葛，佢就飾演埋保皇派嘅角色，讚揚保皇派「成功爭取綠化城市論壇」，搞到論壇多咗咁多盆栽，又大嗌「先有銀紙，後有民主！」唔少維園阿伯居然跟住佢嗌，笑死唔少記者。

mailto:[email protected]