【文：Justin Yim】

有無試過喺街見過呢啲「慢駛」路面標記呢？唔少行人過路處前面，又或者學校、診所同住宅區等等嘅街道上都可以見到。佢地嘅作用，當然係提醒司機收慢車速，留心過路嘅行人。但你話慢駛，唔通個個都真係慢駛咩？唔少司機或者會加倍留心，但減速就未必了。[1] 只靠提醒而無實質措施，又點會令司機真係跟從，有效地保障行人安全呢？

設置交通緩行措施 (traffic calming)，係公認促使街道車輛減速嘅最有效方法。交通緩行措施源於六十年代嘅荷蘭，主要透過改變實體嘅路面設計，例如設置減速平台 (raised table)、路拱/減速壆 (speed hump) 同收窄車道 (lane narrowing) 等，令司機收慢車速。唔少外國城市，至今已經廣泛地喺街道運用交通緩行措施，減少意外機率同嚴重程度，以保障行人安全。

既然咁有用，點解香港仲唔做？有嘅，喺二千年代，運輸署曾經推行過「行人環境改善計劃」，將多個購物區內街嘅車道收窄、配合少量減速平台，改造成「悠閑式街道」。[2] 然而，署方嘅思維始終保守，優先考慮車速同車流，盡量減少對車輛嘅限制。所以咁多年黎，香港絕大部分街道依然被忽略，未有設置交通緩行措施。

最近運輸署嘅「香港好易行」計劃，就終於再開始喺少數路口加設減速平台，但仍然喺試驗階段。但喺元朗，當區議員同樣要求設置，署方卻依舊以「會對乘客造成不適」、「製造噪音」同「對車輛造成損壞」為由，拒絕設立減速壆。[3] 或者喺運輸同路政部門內部，傳統「車輛優先」嘅諗法依然係主流。喺街道上，要真正令司機慢駛、達致行人優先，睇怕仲有一段時間。

嚟緊五月，我地將會講多啲有關低速街道、交通緩行措施嘅資訊。想知多啲，就記住密切留意我地個 page 喇。

[1] 「慢駛」路面標記、配合警告標誌，喺郊區公路嘅特定危險路段效果較理想。但市區街道嘅安全問題，需要在大範圍地降低車速才能夠有效改善。大量使用「慢駛」路面標記並不實際，更會造成駕車者麻木。
[2] 行人專用區 (運輸署)
[3] 洪水橋輕鐵站與馬會過路處 運輸署放棄技術專業，拒絕設立減速壆及斑馬線 我們要求試驗「行人過路平台」 (屏山南梁德明)