【文：Herimon Au】

當我哋講「無控制過路處（講緊冇交通燈嘅過路處！）」你會諗到咩？「望左」「望右」路面標記？通常唔會停低嘅車流？中間狹窄嘅安全島？呢啲黑黑灰灰嘅過路處喺香港似乎只有一個功能—— 俾行人有一個停低等候車流適當時候過路嘅機會。

過路處應該係行人同司機互相協調嘅地方，但點解現時卻成為了行人司機均需要忍耐嘅設施，甚至有人寧願喺附近直接橫過馬路都唔使用過路處？根據政府資料，2019 年有 141 宗於過路處發生嘅意外。原因不乏車流過快過多、視線受阻，過路需跨越多條行車綫等。我哋應該要反思，目前的過路處設計係咪足夠保障我地嘅安全？

在此要向大家介紹一種更加安全嘅過路處設計—— 延伸過路處 (curbside extension)。

顧名思義，這個設計將過路的部份延伸向外，令行人過路嘅距離縮窄，讓司機能夠喺較遠範圍已經見到準備過路嘅行人因而減速。這種設計喺歐美國家已經廣泛盛行，包括紐約、三藩市等地均有使用。事實上，香港自十多年前起亦逐漸喺街口拓寬行人路、延伸過路處，但進度始終緩慢。有啲地方做咗都未必好覺，主要係因為延伸設計不夠突出（仍然容許違泊）以及行人缺乏優先權。

早前有香港嘅社會創新實驗室（創不同）舉辦「行多兩步實驗室」引入美國德州奧斯丁市嘅概念，希望鼓勵運輸署以低成本方法，透過地面畫上波點油漆及增添圓杆，簡單快速地喺深水埗違泊嚴重嘅過路處（例：福榮街及東沙島街交界）增設波點延伸過路處。儘管該實驗未能實地進行實驗，但仍然為我哋啟發咗一種新思路－或許可以以簡單方式選擇延伸工程嘅選址，以及測試「延伸設計是否足夠突出」，再根據行人和司機嘅自然反應深化設計，讓設計可以更以人為本，促進安全過路！