新民黨主席葉劉淑儀早前在Viu電視台節目《晚吹 一帶一路》，接受一班小朋友訪問，節目昨晚播出。葉劉淑儀在訪問中，向小朋友形容「蛇齋餅糉」為政黨拉票手段，「人人都用」，「有時係禮貌啫」。至於梁振英幼女梁頌昕的行李門事件，葉劉說「其實係禮遇，唔需要太執著。」

葉劉淑儀被小朋友問到什麼是蛇齋餅糉時，她形容蛇齋餅糉是政黨拉票常用的手段，「有啲人請街坊食蛇宴，請佢哋食齋，端牛節派糉，中秋派月餅，俗稱蛇齋糉餅囉。…其實人人都用，有時係禮貌啫。」她續說，「帶你哋去旅行咁解啫，冇乜問題嘅。」

對於梁振英幼女梁頌昕的行李門事件，葉劉指出，「原則上冇人有特權，不過好多地方元首，按國際慣例，好多時組織會畀佢一啲禮遇，見你咁忙趕住開會，你成家都吸引人注意，所以有特別安排。我舉個例，英國外交部長訪緊港，可能佢行程匆忙漏咗件行李，佢叫人幫，我諗啲人都願意幫，我講緊其實係禮遇，唔需要太執著。」

葉劉形容，事件乃「小事」，可能有些人以為特首施壓，她相信梁振英沒有施壓，「當然謹慎啲，就唔好打電話。」

再被問到任保安局局長期間如發生暴亂，會否施放催淚彈，葉劉指出，施放催淚彈無問題，形容「噴啲嘢等人走開」，做法較善良，「絕對無問題，全世界都有，催淚彈其實唔係彈來的，係一種化學氣體來的，不會造成永久傷害。你見歐洲警察騎住馬，攞棍扑，好危險。馬會踢人，棍會扑人，美國警察會拔槍，仲危險。如果你噴啲嘢，等人走開，其實係比較善良的做法。」

又有小朋友問到，葉劉為何28歲才有初戀，何以一直沒有人追求，「因為工作太忙，入政府差不多朝八晚八，嗰時得我一個當家。咩叫當家你明唔明？即係搵錢得我一個。」她續說，後來母親心急，周圍向姨媽姑姐推銷她。

被問葉劉以前的髮型被形容是「掃帚頭」，葉劉亦輕鬆作答，「我話畀你知，點解梳之前的掃帚頭，因為我發現電攣，落雨不會撻落嚟，出門無時間洗頭都有個型，一起身鑞下就得，方便嘛。」

葉劉透露，初時得知被指「掃帚頭」，有人以此出版書籍，在書展賣了幾萬本，因而「喊出來」，「我個女被話係『小掃帚』，當時好嬲，好尷尬。你哋話笑小朋友，啱唔啱？不過，都過咗去。」