侯志強稱被插眼 警察迅速拘捕劉婆婆
立場新聞 2015/04/10 18:53
晚上更新報導：
侯志強下午報警，報稱被人用手襲擊面部及眼痛，但拒絕送院。警方調查後，以涉嫌普通襲擊，拘捕86歲的劉愛嬌，她其後獲准保釋。
原來報導：
上水河上鄉88歲老婦村民劉愛嬌耕作多年的農地，2009年遭人倒泥頭破壞，及後被收回用作興建屋苑及馬路等，婆婆入稟控告村長兼上水鄉委會主席侯志強等人，今日獲判勝訴，可獲償140萬，但復原土地要求被拒絕。侯志強今午帶記者巡視現場，直指是劉的兒子霸地建屋。其間侯志強與劉愛嬌狹路相逢，二人越行越近，雙方口角，對侯指她們霸地，劉婆婆爆粗反擊，「我霸你個命，霸你老母！仆街，仆街！」及「你冇好死呀！」
《蘋果日報》報道，侯志強見狀即謂「等大家睇下邊個係弱者﹗」劉婆婆隨即用手指指向侯的臉部，侯遂指老婦「督我隻眼」、「報警呀吓！睇住佢打我，有冇影到？即刻報警，睇住佢打我一鎚架」，他報警求助，警員到場調查。最後警員用警車帶走劉婆婆。
《明報》片段顯示，侯在警方到場後向警表示，他與記者談及「霸地」事宜時，劉婆婆「用唔好聽嘅說話詛咒自己，但呢啲詛咒不緊要，如果詛咒到，就無咁多殺人的事件」，但認為「最唔能夠忍」的是她以手指「插我對眼」，「如果冇眼鏡咪盲咗」。
警員問侯傷勢，侯脫下眼鏡，「（隻眼）有無紅呀？」警察：「我睇就無喇，你可以搵人幫你睇。」侯即稱：「無紅都算襲擊吖，點解插我眼呢。」
劉婆婆兒子曾經被斬斷手筋
有線新聞報道，劉婆婆稱雖獲逾百萬元賠償，但失去耕種超過50年的田地，無法種菜感不開心：
「我都唔開心。有錢都冇我去賣嘢（菜）咁開心呀，我去到街有得玩，有得講笑。我而家坐喺屋企喊呀！
百幾萬好架勢呀？好巴閉呀？我賣七年嘢（農作物）呀，我都賣返嚟呀！你賠畀我，整成咁樣你都抵啦。」
侯志強則自辯，沒有填泥，只是按政府指示修復該地。
「（地產代理）萬振成填泥，唔係佢包庇我，事實係佢填，畀我哋捉住，佢想唔認都唔得呀。咁佢填完幾個月後，政府要求回復原狀，我走去回復原狀，by政府嘅order，為公益，為村民做嘢，而導至畀人哋屈，咁你話冤唔冤枉喇。」
劉婆婆兒子：表面上勝訴，實情是「輸咗」
侯志強又反問，「你覺得佢（劉婆婆）可憐咩？霸人地方喎，加埋8個仔1個女，個個二百幾磅霸地方喎！呢啲叫可憐咩？可憐蟲咩？有咁大條可憐蟲咩呢個世界？」
此外，報道引述劉婆婆的兒子侯太樂表示，雖然表面上勝訴，但實情是「輸咗」，「依家賠返百幾萬，塊地佢都攞咗嚟用，我冇得用，佢有得用，咁你話佢係贏咗定輸咗，我覺得佢係贏咗，因為佢唔需要畀返塊地我。」侯太樂直言以平常心看待判決，「我哋唔係想攞錢，係想攞返塊地，對塊地始終有感情，我哋係嗰度大。」
曾挺身阻止地產代理在村內非法傾倒泥頭，以及反對興建骨灰龕的侯太樂，家有10兄弟姊妹，他本身是扎鐵判頭，並擔任職工盟的香港建造業扎鐵工會理事，曾在扎鐵工潮領導工人罷工。2011年，他駕車停泊在上水港鐵站對開馬路時，被兩名持利刀及鐵鎚兇徒斬斷手筋，兇徒得手後乘私家車逃走。發生斬人事件後，河上鄉村民均不願多談，侯太樂的兄長則表示弟弟為民請命，不排除血案與非法傾倒泥頭及骨灰龕事件有關。