就承諾在某年　某一天某地點　再見”

借梁詠琪的歌，和大家說一聲：再見！

「Add 名人時尚」 由2013年免費派發的一本時裝雜誌，轉為網上版，再回到報紙網上雙線，今日不是最好的時光，歷史讓蘋果完成了使命，我們也告別了。

當年創刊號是李嘉欣穿一條彩色Valentino高訂裙 、首個登封的男星郭富城戴住浪琴錶，記得劉嘉玲在3號風球下來廠房拍攝、以+0之名自己化妝（因為zing 無期），訪問過蘇菲亞羅蘭、Luke Evans、小田切讓，韓流熾熱時的李英愛、少時允兒、EXO 成員等等，太多太多。

蘋果日報是最早跑到紐約、巴黎，直擊4大時裝周的報紙，努力追趕過每季時裝潮流；也開啟報導明星穿名牌的潮流，從陳茵微婚紗衣角查到她穿Lanvin婚紗、舒淇穿環保H&amp;M、誰和誰撞衫，大大小小時裝八封，正路時尚消息。

從王菲、鍾楚紅，寫到今日BLACKPINK 、陀地歌姬Serrini，感謝讀者多年來和我們一齊呼吸過時尚，睇過靚衫、笑過鬧過快樂過，走過歲月，記憶只會剩下美好，今天蘋果時尚就暫時停在這一格。

蘋果App大升級 更簡潔更就手！<a href="https://hk.adai.ly/e/OtW3tq3FBfb" target="_blank">了解更多</a>（<a href="https://hk.adai.ly/e/yuOejIPKBfb" target="_blank">立即下載體驗</a>）

港蘋娛樂-add

add名人時尚｜從舒淇婚紗寫到MIRROR戰衣 感謝大家一起分享過 

下星期的6.30，是黃家駒的死忌。當年在新藝寶一手捧紅Beyond的陳少寶說，「我唔想再講任何家駒，好似覺得抽人哋水……」

但他前年推出的《音樂狂人》一書，卻盡訴無數歌星故事，「對唔住，我叫《音樂狂人》，冇任何一個黃家駒嘅字同相喺封面，只係故事裏面同呢啲人有關係！」最新的推演是，將故事拍成電影，「我唔會演啦，我依家出鏡都唔可以做𡃁仔啦，要講有一個咁癲嘅人，原來遇到一個Beyond、一個王菲……」

音樂狂人就是他。由電台DJ到唱片公司高層，由涉貪官司，天堂變地獄，再回歸電台，音樂狂人最狂邊一次？「我覺得依家係狂，我咁嘅年紀仲有好多戇居居諗法，我身邊啲朋友個個都同我講，休息啦、退休啦！我唔怕喎，有機會點解唔做呢，到我甩晒啲牙講都講唔到，我先走去做節目呀？」

生於樂與怒年代，如今66歳的陳少寶信了主，沒有怒，仍然狂。

港蘋娛樂-0623陳少寶

推出完《音樂狂人》一書，陳少寶原先打算將書中王菲的故事拍成網劇，更想找童童竇靖童來演後生版王菲。今天陳少寶說，網劇計劃暫且擱置，他有意將之拍成電影，人物更落在Beyond四子身上。他說已經找到國內投資者，早前因為疫情將進度放緩，現在是時候加緊進行，「有啲嘢會好好玩，你諗吓淨係搞一個『尋找黃家駒』已經好鬼好玩啦！」

至於取材自Beyond那個階段的故事，陳少寶心中有數，「我相信我哋會參考Queen嗰套戲（《波希米亞狂想曲：搖滾傳說》）。攞邊一段時間去做戲膽，倒不如話係邊幾首歌可以砌到個故仔，當然一定係《喜歡你》就加插一個愛情故事啦，當然個故事要係真，唔可以亂作啦！Queen套戲其實都係攞啲歌嚟砌故仔，講下佢點樣奮鬥，初初啲人點睇佢唔起，跟住幾個靚仔去咗唱片公司，錄咗一隻6分鐘《Bohemian Rhapsody》，跟住點樣派台，我哋認為好基本嘅唱片公司故事，外面嘅人可能好有興趣呢啲嘢！」

關於唱片圈的故事，陳少寶的確多的是。他在書中爆了一個王菲笑話，話說當年由北京初來報到的她，將名牌CHANEL讀成頻道channel，陳少寶說得淡然：「佢唔識就唔識啦，佢喺北京17歲幾落到嚟，嗰時乜都唔識！」

他應該是第一個圈中人見王菲，「我唔係好清楚，佢搵得戴思聰教唱歌，除咗覺得佢教到唱歌之外，亦都因為戴老師同唱片公司關係唔錯，學唱歌嘅人其實都係想做歌星啫！戴思聰周圍打電話問唱片公司有冇人有興趣，我係極度有興趣嘅一個囉！」

發掘王菲，陳少寶說等於當年發掘張敬軒一樣，「我簽張敬軒嘅時候係2002年，我覺得香港歌星嗰種魅力喺二千年已經過咗，嗰時有條𡃁仔整咗隻歌，喺廣州No.1咗，首隻叫做《My Way》，我話呢條友邊個嚟，隻歌OK喎，捉佢嚟啦，佢又恨不得簽俾我！其實王菲係同一個故事，我簽佢係80年代尾，我又覺得佢聲線技巧樣樣都OK，我覺得係跟潮流行走！」

陳少寶坦言，不用神化他有眼光乜乜乜，說穿了，其實一切只是marketing。「通街都係唱到歌嘅人，通街都係靚女，通街都係有魅力嘅靚仔，問題係，你可唔可以天時地利人和一齊夾得到呢，你係咪食到個潮流呢，流行曲就係要夾潮流，叫得做流行曲嘛，大佬！」

天時地利人和，講完。陳少寶由新藝寶到寶麗金到環球，張國榮王菲Beyond到張敬軒Juno，他說和巨星們，從來都保持距離，「我唔係一個循規蹈矩去做我嘅東西，總之就係癲癲地！你見我唔埋堆㗎，理論上我係好低調，起碼我唔埋堆先啦，當年都係，真嘅，你睇我同啲歌星嘅感情，無論幾好基本上我都保持我係老闆、佢哋係歌星嘅距離。如果你同佢太過好朋友，其他歌星可能會同你呷醋，當然會有三幾個特別好傾，但我都盡量唔想做到好攬頭攬頸！我喺娛樂圈裏面唔會發達，或者唔會太紅，可能真係唔係好鍾意黐到咁埋，你話我儍又好乜嘢都好啦！」

君子之交，連鬧交意見分歧炒大鑊都甚少發生。「大家對歌星唔好有太多幻想，其實都係一盤生意，當然因為你面對嗰個product係一個人，人與人之間，你點樣去氹吓佢或者點樣去嚇吓佢，呢啲一定會有！你睇返我嘅歷史，我唔去搶人哋嘅歌手，因為我好相信，由你自己一手一腳湊大，又或者佢嚟敲你門，無論日後發展順利與否都好，大家始終坐低有偈傾，你用一個高薪挖角，去到尾，嗰個人係嚟咗，但佢個心冇嚟到，你只係用錢去買佢！」

造星無數，陳少寶覺得香港最後一個巨星出現，是鄧紫棋。「我自己喺新城嘅時候，我第一次見鄧紫棋係好早期，嗰時已經話佢賣得。我話好想同呢個女仔做interview，當時好多人都覺得好出奇，個𡃁妹唔知會唔會接受你訪問喎，你咁老鬼！我又覺得嗰樣嘢令到我年青囉，橫掂我覺得佢好有興趣，我就去睇佢第一次紅館演唱會，我直頭驚為天人，我覺得佢好勁，結果佢真係爆，佢唔係參加咗《我是歌手》爆㗎，佢不嬲都喺香港爆，只不過去到《我是歌手》再爆咁解。」

看見人成功，陳少寶想照辦煮碗卻失敗了，「之後我自己喺內地做過兩個歌手都唔成功，我自己中咗互聯網陷阱，你要做好多同互聯網有關嘅活動，除咗你要唱得睇得，最重要做好多互聯網相關配合，我當時冇呢方面認識，我多多少少仲用返以前做唱片公司嘅模式，我覺得係我自己發現嘅錯，因為互聯網係另外一件事。我好反喺互聯網上面做炒作，因為我一路以嚟都唔係做炒作，嗰時要做嗰啲橋，我自己唔係好接受，我當上咗一課！」

自稱為音樂狂人的陳少寶，狂在那？「我諗我狂在幾勇囉，我認為係啱就去做，我唔係必定成功，我都碰過好多唔好嘅嘢啦，我覺得我咁嘅脾氣都行咗咁多年，唔通依家六十幾歲先嚟大改革自己咩，我覺得冇咩必要！做音樂，我唔會點變，我一路都唔相信一個靠賣樣但唱唔到歌嘅人，會行到一條好長嘅路，對唔住，我唔識同呢啲人做公關，我唔識做呢啲歌星！我最叻做啤酒，我就唔好心花花走去做茶，我唔係嗰方面專家，我專心於做返我自己嘅啤酒。」

心思思想再戰唱片圈？陳少寶答得老實，「第一，依家唱片根本唔係一盤生意，有冇唱片公司仲需要我，我亦唔知道；第二，我依家想全神貫注睇吓個戲點樣搞！」與他份屬同行的何哲圖（Herman）敗走無綫離開星夢，被網民狠批他是近年搞衰香港樂壇元兇之一，自言與何哲圖相熟的陳少寶說：「我冇意見，我只係覺得佢喺一個咁大機構TVB，俾佢搞咗咁多年，我又唔覺得有乜好石破天驚嘅嘢出現，我唔係話佢渣，只係我唔見有啲乜石破天驚嘅嘢出嚟；同埋嚴格嚟講，Herman係屬於我哋後一輩，Herman係Paco（黃柏高）後期請，我同Paco差唔多同一輩，Paco比我早少少出嚟做唱片，佢做唱片嘅時候，我已經做到DJ尾期！」

陳少寶最enjoy的始終是可以開咪做DJ，「我最enjoy做節目主持，我做talk show同做播歌都咁enjoy。我實際上做咗呢個行業好耐，我1978年開始喺港台做，做咗唔夠一年，我就去咗商台，我做到1985年之後離開商台，我轉做唱片，我做唱片做咗唔夠年幾，我又走返去電台一個禮拜做返一兩次，然後渾渾噩噩到二千年我做環球，我做香港Chairman，梗係唔可以做電台啦，停咗幾年跟住我又出咗事，環球我又冇得做，之後等我休息咗三幾年，返嚟我又做返新城再到依家港台，我冇離開過電台，我係好開心！」

出事，當然是2003年廉署「舞影行動」的反貪污拘捕行動，不過最終因為廉署程序出錯，陳少寶最後冇事。是人生中最大打擊嗎？「係我工作上最大打擊，因為我好鍾意做唱片，官司之後我冇乜機會再做。如果我再去做返DJ，根本由頭到尾都冇影響，好老實，廣播都已經唔再係一個當起事業啦，我有諗過每日開返一節YouTube做吓KOL㗎，我乜都噏得餐死，廿年前《少寶與文狄》講過嘅topic，我哋今天再講係完全唔同，因為個人的確係成長咗！」

陳少寶在官司後信了主，人生又有另一番感悟，「當我有咗信仰，我更加覺得唔好去決定一啲嘢，總之唔係作奸犯科嘅嘢，你咪去做囉，做咗之後，得唔得，過唔過到關，你交俾個天啦，冇人知㗎喎，真係冇人知，你覺得你做緊嘅所有嘢，都係自己決定㗎咩？」

陳少寶主政唱片公司的年代，歴經了香港樂壇最風光歳月，今時今日，他說：「根本好多嘢都變晒，由網主導，唔係以前做藝人嗰種方式，以前我哋真係好似湊仔湊女咁，要教佢點樣做人、點樣面對記者，依家你教都冇用！」

有留意依家個樂壇嗎？「唔到你唔留意啦，依家最紅係姜濤呀、MIRROR 、ERROR嗰啲啦！但係我就覺得萬變不離其宗，如果你講MIRROR，我冇好深入研究啦，我印象當中嘅MIRROR，佢咪就係當年Cookies咋嘛，只不過係男裝版，香港飢餓咗好耐都冇新一代年青偶像出現，出返一大班男仔囉！」

真係要唱返句「油～不是80年代」囉！

撰文：文嘉龍<br>
場地提供：Amelia by Paulo Airaudo<br>

一手捧紅Beyond王菲 陳少寶回首歌壇高山低谷

蘋果廿六年，走到今天終避不過「被禁了 絕唱了 旋律給消滅了」，這些年來在娛樂版中有歡笑有淚水。離別在即，一些朋友向廣大讀者分享留給《蘋果》的說話，為這不平凡的旅程作結。祝願各位香港人平安，祝願《蘋果》即使消失這晚風雨內，還望可再生在某夢幻年代。

杜汶澤︰《蘋果日報》唯一控告過的人相信就是我，俱往矣，一切都不再重要。不必憂懷喪志，香港如今走到這一步，已經沒有甚麼事情不可能發生。員工是最無辜的，希望大家保重。

田蕊妮︰無論結果係點都好，我由心respect每一位《蘋果》嘅新聞工作者！

黃秋生︰若真係停刊，我會非常懷念。

何韻詩：知道呢個消息好傷心同憤怒。無論最後結果係點，都好想多謝《蘋果》上下所有人嘅付出，感謝你哋堅守崗位到最後一刻。喺呢段艱難嘅日子，你哋嘅專業為香港人帶來好大嘅力量。有種堅持叫《蘋果》，多謝你哋。

潘源良：寧鳴而絕！不黙而存！

周博賢：感謝《蘋果》26年來為真相和公義發聲，縱然要這黑暗的時刻無奈退下，但亦已超額完成歷史責任！也向全體《蘋果》員工致敬！你們辛苦了，無論你們決定如何也會支持，請好好保重，留有用之軀，他日煲底相見！

藍奕邦：這26年，香港一直在變色，但《蘋果》是一直立場鮮明地站在香港人這邊。感謝你們陪伴香港人經歷風雨，感謝所有員工的付出與堅持。信念仍會遍地開花，再艱難香港人仍然願意用最後一分力去守護真理與真相。我相信後會一定有期。

6號@RubberBand：多謝你們一直以來的堅持，路仍要走，一起互相支持。

泥鯭@RubberBand：感謝《蘋果日報》響呢個荒誕嘅時代堅守到最後一刻。

小肥：樂器都弄碎了，全部唱機燒了，也會化做野火燒～

邵仲衡：行無愧怍心常坦，身處艱難氣若虹，披星戴月廿六載，一切都已在心中。

黃夏蕙：喺度，我好感謝《蘋果》咁多年對我嘅幫忙同支持，去到呢一刻，我送一句說話畀所有員工，但願人長久，千里共蟬娟！

劉天蘭：千言萬語…..在心中。

吳日言：我入行時，是你讓讀者認識我，報道我嘅高低起跌，堅持到現在，我擁有家庭和事業，你卻要離開我們，這刻我真的哭了。感謝你看着我成長，陪伴我們26年。

朱薰：請大家保重，好人一生平安。

石天欣：由細到大屋企都係買呢份報紙，無諗過呢件事會變成「曾經」，雖然嚟緊我哋未必再買得到，但我相信喺我哋嘅心裏面，嗰份信念同精神可以繼續落去，香港加油。

岑珈其：頂住加油，短暫嘅休息係為咗行更遠嘅路。

阮民安：多謝《蘋果》26年的盡力報道！積極揭發香港社會真相！香港人愛你哋。你哋絕對係「風光到最後 ！！！」

J.Arie︰只想講一句，多謝你的堅持，辛苦了！

莊韻澄：我而家都真係喊，估唔到原來離別咁傷感！曾幾何時好怕「蘋果照妖鏡」，好怕記者會唔知點寫自己，今晚不停搵返自己喺《蘋果》嘅報道，無論好定壞，靚定醜都一一截圖保存。我怕再冇機會了！榮幸曾經踏進蘋果大樓做專訪，有機會跟杜生（杜汶澤）為《蘋果》春茗演出、近距離跟黎智英先生打招呼。希望黎先生跟所有《蘋果》員工都要加油，無論發生甚麼事都要安好。

張惠雅：香港言論自由沒有了，我看到的都是白色傷痕、白色血液，白色的。

林泳淘：自出社會以來，《蘋果》陪伴過我無數個返工放工迫地鐵嘅時間，每日一《蘋果》本是一件如此理所當然嘅事…多謝《蘋果》上下所有嘅員工，你哋每一個人嘅努力都帶畀我哋香港人好多好多見證同回憶。也許未來真實嘅聲音會越來越少越來越難，但我相信香港人一定唔會忘記《蘋果日報》。願你們平安、未來一定會再相遇。

蘇慧恩：好多謝《蘋果日報》一直以來嘅支持，由我出道以來，好多活動你哋都會到現場採訪，記者們全部都好Nice，個個都好盡責。次次響新聞裏面見到《蘋果日報》攝影師影嘅相都係好靚靚嘅，所以我知道新聞出嘅時候，都會叫媽咪買份報紙留低keep record，多謝《蘋果日報》每一次帶畀我好嘅回憶。

李綺雯：多謝《蘋果》仝人一直在艱難之中，不畏強權，謹守崗位。

駱胤鳴：多謝「蘋果照妖鏡」曾經給我們帶來無數歡樂，以後沒有「蘋果照妖鏡」，是人是鬼我們要自己睇啦！

戴夢夢︰《蘋果日報》都陪伴咗我哋好多年，由我初初出道到而家都已經有，可惜香港又少一份報紙了。無奈我亦都好擔心我的記者朋友們，在現在的經濟環境下失業，確是令人憂慮。希望大家可以振作，盡快離開憂愁。

曾志豪：《蘋果》即使落下，種子已種在香港人心中，永生不死。

黃婉曼︰永遠記得，《蘋果日報》是第一間媒體，報道了有一個『跳』住講天氣的黃婉曼，已經是超過十年前的事了。但永遠，我們都需要跳出框框的思維，需要多元的角度，需要記住不忘初心的最真實的聲音。

樂隊Mr.成員MJ：作為音樂人，我想多謝《蘋果》一直以來盡力報道音樂嘅新聞， 推動咗樂壇好多好多！

林盛斌：好多謝每一位曾經訪問同報道過我嘅娛樂版記者朋友，因為你哋，令更多讀者有機會認識到我。衷心感謝你哋，亦誠心祝福你哋每一位，多謝！

田啟文︰聚散總有時，祝願每位員工，早日找到新工作！

林子博：2013年TVB選秀節目《星夢傳奇》播出期間，我除咗想多謝本人前公司TVB曾給予機會之外，亦想多謝貴報當時幾乎每一個星期嘅廣泛報道。當年嘅報道，除了令讀者關注及不斷追看《星夢》節目之外，同時亦令到廣大市民透過你哋嘅報道，加深認識多年嚟一直默默耕耘嘅一眾藝員，深入了解佢哋嘅才能同背景，當年我亦有幸成為其中一人！衷心感謝你哋多年嚟嘅支持同鼓勵！感激！

黃冠斌：呢段說話應該係我最唔想錄嘅，因為如果有得揀我真係唔想《蘋果日報》離開我哋，對住《蘋果日報》，小弟有三個讚 讚。嘆嘅係《蘋果日報》喺大風大浪大嘅時間依然可以守護香港人真正嘅核心價值，喺紙媒式微嘅年代可以串連香港人眾志成城；讚賞嘅係《蘋果日報》上上下下所有專業嘅媒體工作者，喺今時今日巨大壓力之下依然堅持，除咗真心佩服之外，只有無言感激；贊助嘅係如果仲有一絲機會，我好希望《蘋果日報》可以繼續營運落去，哪怕要用另一種方式，《蘋果日報》，多謝。香港人應有此「報」，時代欠你哋嘅，歷史會告知各位同業，江湖再見。

鄧達智︰「大佬，有冇嘢同《蘋果》講呀？我哋可能行到最後的日子了⋯⋯」林妹妹WhatsApp 這樣說。鼻子立時酸了⋯⋯傳聞好幾天，來到今天已被傳至猶如確實了；仍未相信。但林妹妹傳來如此內容的 WhatsApp，不信又如何？午夜後回家，審視書房內一叠又一叠整張舊稿的報紙；效力廿載撰文「自遊」，可想而知份量堆積如小山。還有多年下來合作無間，每有相關時尚與服裝的新聞，《蘋果》仝人首先想到便是我；感謝同事的認同，留下數不清果實纍纍的互動成績。說再見的時間再不願，也已臨門；期望風不傷你心，雨不擋你路甜夢佈滿冰冷漫漫長夜還願星光因你閃，指引你路期望你每天色彩裏走過，達智。

梁芷珊︰記者來短訊：「你有沒有想對蘋果說或寫的?」 我回：「寫。」想看完《蘋果930新聞》才動筆，惟節目完結後更舉筆維艱。第260回晚間新聞，忽然來到最後一次，編綵、剪接、主播仍然專業盡責。《蘋果》最快於星期六停止網頁更新；極大可能同日出版最後一次實體報紙。無法想像今天在蘋果大樓內情況，員工情緒一定激動，氣氛一定悽怨：有人執拾，有人埋頭完成手頭工作，有很多交頭接耳，很多道別，很多淚水，很多抱頭痛哭，莫須有殺到埋身的悲愴。公司今天offer給員工的兩個選揀：即時離職，可不需理會一個月代通知金，可不離職，等候公司安排遣散。我聽說有高年資的員工選擇即時離職，原因是疼惜公司，不想留下來處理結業的同事和公司負擔沉重。多謝《蘋果》人超過1/4 世紀，跟香港人風雨同路，想起未來沒有了《蘋果》，非常難過，各位，請多多珍重。

湯駿業︰若果人生比戲劇更戲劇，那麼在荒誕的世代要靠每日吃一口蘋果來續命的我們，對於您/您們要退出這個舞台，除了一句「感激不盡」之外，就是「我愛你們每一位」。請好好休息一下；離別是為了更好的重逢，大家加油。萬謝。

艾威：對推動香港演藝事業發展，《蘋果日報》，是功不可沒。

葉昇瓚︰致《蘋果日報》的話：感謝《蘋果日報》多年嚟盡忠職守，不畏強權、追求公義、尋求真相能夠有幸曾經接受《蘋果》／壹傳媒訪問，實在係一個寶貴既經驗面對風雨飄搖既日子，再次多謝《蘋果日報》嘅付出祝各位平安，有緣再見。

葉昇瓚太太︰致《蘋果日報》的話：多謝《蘋果》26年來陪住我成長，由創刊開始我就幫爸爸買報紙，好記得全彩色嘅印刷好eye catching，咁多年嚟《蘋果》改革咗香港新聞，為香港新聞創造好多新紀錄，高低起跌都陪住香港人，《蘋果日報》多謝你！！我會等你歸來！！

商台Vani：致一直捍衞及尊重新聞自由的人，「抬頭尚有天空敲不碎」。

晴天林：有幸在《蘋果》做過幾次大大小小訪問，多謝你們！感激你們一直盡力堅守崗位，我相信好多真香港人都好難過好傷心，希望可以後會有期送上昨晚寫的歌詞：「藍灰暗的天 蹤使有一些風雨也不緊要 別害怕 你手我心 可企穩才能黑暗內種出樹苗 堅強笑」。

Serrini：父母（長期讀者）喺《蘋果》見到我concert嘅美照佢哋好開心，我希望佢哋可以一直睇落去，無論係照妖鏡定係美照。

《邊緣人》導演章國明︰除咗講可惜之外，我會突然好悶，因為《蘋果》實在太多嘢睇，由報紙開始，到網上短片，相信冇一份報紙或者電視台會做得比佢更加生鬼，更加好玩！

馬米高：You reap what you sow 「種善因得善果」，感謝蘋果與香港人同行，默默耕耘，播下的種子我們會好好留住。順帶一提，呢句英文亦都解「種惡因得惡果」，祝大家嘅種子都快高長大。

KOLOR：就算天誅地滅，不要心碎，不要冷水。香港人，繼續堅持，加油，願大家身體健康，長命百歲」

Candy：一定會再見，大家一定要身體健康

茜利妹：曾經與蘋果共事係我人生中最有義意嘅一頁，與有榮焉。（除咗《懶茜廚房》，其實我97年喺長沙灣《一本便利》返過三個月copywriter，專寫「客戶特約」繕稿～喺個partition 度做做吓嘢突然間周圍靜晒就知係神童輝經過）

蘋果娛樂福壽

娛樂名人丨一人一句留給《蘋果》的說話

劇迷等足一年，終於等到韓國女神全智賢回歸公仔箱，由全智賢孭飛的《屍戰朝鮮》（Kingdom）特別篇<a href="https://hk.appledaily.com/entertainment/20201102/LVBZPP5RYBCNHHQWGZ4CUYAXVY/" target="_blank">《屍戰朝鮮：雅信傳》</a>（Kingdom：Ashin of the North）鐵定下個月開播，之前女神在《屍戰朝鮮2》結尾亮相，今次特別篇全智賢將會帶領尋找喪屍感染源的故事，令劇迷超級期待。

（一）tvN《惡魔法官》（首播日期：7月3日）

圈中模範爸爸及老公池晟事隔兩年攜新劇回歸公仔箱，於劇中他飾演毫不留情懲罰貪婪權力者的「惡魔法官」，他有着可怕的童年，本身有一個黑社會父親，更親眼目睹兄弟被殺，於是決心成為一名鐵石心腸的法官。不過男團GOT7成員珍榮卻質疑池晟的動機，因而努力尋找真相，希望揭開池晟的秘密。

港蘋娛樂-韓娛202107017月韓劇

（一）TVING《來魔女餐廳吧》（首播日期：7月16日）

TVING原創劇《來魔女餐廳吧》由宋智孝、南志鉉、蔡鍾協主演，劇本是來自第三屆教保文庫故事徵集比賽的獲獎作品，合共8集。故事以實現人們願望的餐廳為背景，講述魔女和兼職生等與客人們之間的奇幻故事。宋智孝在劇中飾演能實現人類願望的餐廳主人兼魔女一角。智孝的角色非常神秘，除了名字之外，年紀等都不為人所知， 擁有魔性魅力和美麗的外表。

（三）Netflix《屍戰朝鮮：雅信傳》（首播日期：7月23日）

Netflix原創韓國電視劇《屍戰朝鮮》（Kingdom）開播以來叫好又叫座，深受劇迷追捧，而由全智賢及在第二季中飾演「御營大將」的男星朴秉恩主演的特別篇《屍戰朝鮮：雅信傳》將會揭開不少謎團。特別篇講述全智賢飾演掌握能將人變成喪屍的生死草秘密的北方女真族後裔雅信，她與族人居住在朝鮮最北部鴨綠江附近的女真族後裔，並致力於尋找喪屍感染源的故事。劇集將繼續由第一季的金成勳導演執導及金銀姬編劇執筆，並以70分鐘製作的電視劇。

（四）KBS《警察課程》（首播日期：7月26日）

由車太鉉、Krystal、鄭振永主演的《警察課程》講述全力抓捕犯人的警察和頭腦聰明的黑客學生，在警察大學以教授和學生身份相遇，及後再一起調查在校園發生的事件。車太鉉在劇中飾演由刑警調到網絡搜查隊的警員，他在警隊隊先後在各個部門任職，並且擁有20年經驗的警察大學教授。而鄭振永和Krystal則飾演警察大學的學生，將與車太鉉一起進行調查。

7月韓劇｜全智賢《屍戰朝鮮》特別篇登場 智孝池晟回歸公仔箱

韓國有不少性感網紅，除了有人妻<a href="https://hk.appledaily.com/entertainment/20210410/6TQFEZCQY5CAFEHO5QUCVS3NYE/">申才恩</a>、撞樣女團少女時代成員允兒的<a href="https://hk.appledaily.com/entertainment/20210316/IOSEQOP2VFH6NIG4WDVRJZ5XTU/" target="_blank">DJ MIU</a>外，32歲的模特兒Ohttomom（原名吳太花）都是韓國出名的網紅。

現年32歲的Ohttomom身高1.69米，維持住約119磅的均勻身材，即使已經是一名兒子的媽媽，仍然keep住少女般的美貌。而早年Ohttomom跟老公離婚後，她就當單親媽媽照顧兒子，目前活躍於社交平台。回復單身的她不時於IG晒童顏美貌和弗爆身材。

昨日Ohttomom於IG公開穿上粉色比堅尼的性感新相，除了騷事業線外，又大晒結實腹肌及纖瘦長腿，獲網民激讚「不似生過孩子」、「性感又健康」等。

據知Ohttomom平時熱愛舞蹈，她曾坦言：「懷孕後體重上升了，但一直堅持Pilates和跳芭蕾舞等，所以維持到現在的身材。」

韓娛Ohttomom20210623

韓國單親靚媽Keep住好身材 風騷露腰晒事業線

並非每個人都愛聽事實，亦非人人受得住血淋淋的真相；但世上總有一群人，明知忠言逆耳，仍會冒險進諫。四月時，網媒主持張家希（Jonathan，又稱Jon Jon）就疑因據理力爭被解僱，事隔一個月，他接受《蘋果》訪問再次提及此事，Jon Jon直言無悔當初決定：「要我卑躬屈膝地覺得皇上你講嘅嘢係啱嘅，咁我保到份工 ，但係會失去咗自己，搵返份工係易，搵返自己係好難。」

港蘋娛樂-JONJON-001

一個網媒主持被解僱，本應不是甚麼大新聞，但因為Jon Jon在whizoo主持的節目貼近香港人口味，亦不避嫌說出近年香港大事，所以消息一出，旋即引發網民激烈討論，更為他大感不值。對於Jon Jon被解僱的原因眾說紛紜，其中一個說法是他在會議上跟老闆發生激烈爭執，Jon Jon笑說：「你又知我哋鬧交？我諗真係最老土嘅比喻係似情侶分手，行過咗三年嘅道路，大家一齊去由零開始。老闆睇嘅嘢就可能覺得，我要拍啲好受歡迎嘅嘢，但係我哋想拍嘅嘢係我哋心入面想講嘅嘢嘛，想講對呢個社會有貢獻有意義嘅嘢嘛，咁兩者有衝突時就會鬧交喇。」Jon Jon坦承最後的確有磨擦，直言覺得老闆「過咗佢嘅底線」，他說：「佢想做一啲改變，佢發現首先要犧牲一啲舊嘅人，咁我諗呢個係我哋會分手、會分開嘅原因。」

矛盾只因深愛着，越愛才會越痛心，用來形容Jon Jon貼切不過：「因為你要知道，喺每一個工作嘅地方，無論係我第一間公司STAKK，甚或乎係而家whizoo。每個地方我哋都係好鍾意，我哋畀咗好多感情落去，畀咗好多時間心機落去，你每次講意見嘅時候，其實你都係想佢好啫。」雖然難過但絕不後悔，Jon Jon說：「冇後悔過，因為當時點解會觸發到，我覺得我有啲說話要講出嚟。係因為我見到有位好年輕嘅同事，佢覺得自己有啲作品受到批評，或者被人否定嗰陣，佢好勇敢地講出去，可能直接同老細衝突或者係講返唔係咁樣。嗰一刻有少少觸動到我神經，佢咁後生佢都不怕一切去講佢覺得啱嘅嘢，我都做咗咁耐，如果我喺呢個時候，唔企出嚟挺身去支持佢的話，佢好無助好孤單架喎。」表達個人意見，甚至是頂撞上司，作為打工仔似乎難逃一炒，因此Jon Jon亦立即在事後降溫：「老實講，我都覺得自己處理得成熟。嗰日喺個會入面好唔開心，之後我係有send返個訊息，同返我老闆講話，大家可能嗰刻情緒上面激動咗，咁但係我希望大家明白就係，都係想為件事好嘅。你問我，都算係咁， 係咪呀？你唔係要我卑躬屈膝地覺得，『係，皇上你講嘅嘢係啱嘅，無錯！絕對係嘅！』即係，如果我保到份工，但係我會失去咗自己囉。我諗搵返份工係易，搵返自己係好難 。」

雖然他甚受網民歡迎，但Jon Jon不認同自己是KOL：「KOL？咩嚟㗎？有影響力嘅人，正在影響這個世界嘅，要不就係講立法會啲議員，要不就係文化界嘅代表，要不就是明星，哪來KOL？完全唔敢諗啦。到我今日真係成為咗別人眼中嘅KOL，我都唔鍾意呢個名，因為我覺得KOL背負住嗰樣嘢，唔淨係五光十色，璀璨好繽紛嘅世界，真正KOL係要對呢個社會有某程度上嘅責任。」因此，同樣地在被炒風波上，Jon Jon亦從未想過消費事件：「冇諗過消費、冇諗過不停喺度講，我希望大家理解就係，當我哋被炒嘅時候，某程度上係因為我哋好愛嗰個地方呀，唔係話走就走得到。基本上係爭紮咗好耐，想去改變、想去爭取一啲嘢，爭取唔到，佢唔鍾意，於是有咁樣嘅結果。」

雖然不少網民對他的遭遇感到難過，但當然亦有負評、有是非，他說：「我係第一次感受到原來網絡世界嘅恐怖囉，以前睇人哋啲明星或者公眾人物，佢哋咪話受到網絡欺凌或者批評。以前都覺得隔靴搔癢啫，冇問題嘅，嚟到我哋自己度，輕鬆啦。 但係唔係喎，我終於明白到保錡所承受嘅痛苦係咩。我知道好多網民，會覺得所有嘢都係我背後操控，每行一步都係我計算過，但係我可以話畀你聽，我冇。我冇辦法操控到一千個連登嘅AC，冇辦法叫一萬個連登嘅人，同我帶風向講任何嘢，所以件事走到去最終呢個結果，觸目驚心。我哋如果係做錯任何一啲嘢，又或者人哋覺得我哋唔啱呢，佢就可以喺連登文革式，可以將我哋瘋狂咁殺害。」

關關難過關關過，事過境遷，Jon Jon在訪問的最後，想跟舊戰友說：「好多謝你哋捨命陪君子，估唔到你哋一班年輕人，係會咁願意陪我呢個老人家，葬身火海，我哋曾經一齊打過好美好嘅一場仗。我哋做嘅嘢並不是冇價值，總會有觀眾認同同鍾意我哋做嘅嘢，我哋繼續憑住自己熱誠，繼續做落去，所以多謝大家，未來多多關照，江湖再見。」

最後，如同Jon Jon於訪問內所言，多謝大家支持，冀望香港人珍重。

Jonathan無悔進諫被炒：搵份工好易 搵返自己好難

雖然我只是一名小小的《蘋果》攝記，由我最黃金28歲做到現在，十年有多，有小小感受……可能係雞髀打人牙骹軟。《蘋果》行內人工高、花紅多不在講，（由方向過去毒果純因為錢）每年生日有張肥佬賀壽餅卡，公司每日有新鮮生果麵包派，之前仲有杯麵零食機任食，食到飽仲可以上樓上做gym游水，邊有公司有泳池，仲真係有人游㗎？雖然長期喺出面跑無福消受，但係這些細微處，就已經感受到老闆對員工是何其重視。

一份做咗26年的媒體，可以係咁短時間內被「收皮」，呢個香港真係好好。今天《蘋果》並非經營不善而倒閉。有邊份報紙，唔係睇住《蘋果》來抄、睇住來做假想敵？有行家昨日說笑同我講，話佢公司啲阿姐最頭痕，因為之後冇人抄。我夠膽講《蘋果》係行業翹楚，我啲同事都係業界精英。

絕對不是因為做《蘋果》先咁講，我看《蘋果》APP，兩公婆都好鍾意睇果籽，冇得睇《蘋果》動新聞，比冇咗份工更難以習慣，難以接受。想都冇想過，呢幾日我會流過不少眼淚。打工啫，呢家唔做、做第二間，但我傷心絕對唔係因為冇咗份工，係點解香港會可以咁樣。

從來利益行先，絕不感性，但昨晚和我老婆說着，我又哭了。我說我老竇走時我都冇咁傷心，只係喊咗一次半次，佢反笑我話佢自己兩年前眼淚已經流乾了……可能有人話我做毒果做得耐中毒太深，但我從來都只知道僱傭關係，其實都只是建基於一份人工，一個月通知，我從不對任何公司有太大感情。

《壹傳媒》近千同事，有些一份工養幾口，很替他們擔心，希望佢哋盡快找到新崗位。也感謝保安、大堂同事、清潔姐姐、餐廳夥記，他們都是戰鬥到最後《蘋果》無名英雄。天下無不散之筵席，只不過係無想過可以咁快被摺埋，之後冇毒果睇更會養成我做隻優質港豬。多謝呢十年來，同事行家們的體諒，小弟不才，如有得罪，多多包涵。祝願老闆和被囚同事可大步欖過。遺憾未能和《蘋果》過埋我40歲生日，未能食埋肥佬黎今年比我張餅卡。以做咗咁耐毒果為榮，以上年踢《蘋果》贏記協盃而驕傲。

港蘋娛樂-

福壽娛樂

我是娛樂攝記丨以《蘋果》人為榮結業淚兩行 中毒深至愛果籽動新聞

珠寶品牌BVLGARI日前於線上發佈全新Magnifica高級珠寶系列，帶來一場意式華麗風格的頌歌。拍攝場地是米蘭地標艾曼紐二世迴廊，參與演出者包括由著名男高音Andrea Bocelli演繹自己創作的意大利文版貝多芬《快樂頌（Inno alla Gioia）》，並由國際知名意大利指揮家Beatrice Venezi指揮，多位知名模特兒，包括Lily Aldridge、Vittoria Ceretti、賀聰、Blesnya Minher及Solange Smith，以充滿電影感的方式展示最新高級珠寶系列。

眾人化身歌劇演唱會的聽眾，於美輪美奐的建築內從窗邊探頭，之後又與建築模型互動，透過疑幻似真的情節，營造出高級珠寶與雋永建築交叉的情景。最後她們在夢幻氣氛下，踏上長逾10米的天橋上行騷。至於Magnifica高級珠寶系列包括創歷來最精湛的百萬珠寶，包括鑲嵌全球第四大、重131.21卡尖晶石Imperial Spinel 頸鏈及鑲了五顆、共重500卡橢圓形枕形切割帕拉依巴碧璽、凸圓形祖母綠及鑽石的Mediterranean Queen頸鏈。

娛樂

add名人時尚 |  BVLGARI Magnifica高級珠寶系列 意式華麗頌歌

生有時、死有時、聚有時、散有時，今年58歲的黃文標，是TVB著名綠葉，亦被稱為「御用收數佬」，在電視台工作超過23年，數年前回復自由身的他，現時在好友游飈環境工程公司打工，已脫離幕前好幾年，誰會想到在20年後，古天樂埋班拍攝電影版《尋秦記》，黃文標再度歸隊，與劇中其他演員聚首。

港蘋娛樂-黃文標22062021

在20年前電視劇《尋秦記》中，黃文標飾演的「滕翼」是項少龍（古天樂飾）的好兄弟，雖然只是配角，但多年過去，古仔開拍電影版，亦惦記着黃文標並預他一份，黃文標日前接受《蘋果》訪問時，坦言感到十分感動。回想當年拍攝電視劇和古仔交手時，黃文標依然歷歷在目。「最深刻係同佢拍劇時，因為佢係現代人，對白同古代好唔同，我就要咬文嚼字，因為佢有時會出其不意講啲搞笑嘢，好似話你個樣幾似耶穌，我都唔知點答，佢話你唔使理我㗎。」黃文標指雖然古仔當時已是主角，但為人重情義，無論對任何同事都沒有架子，在照顧人方面更顯得細心。「我好記得拍劇嗰陣，因為好長時間，無論我新、舊曆生日、中秋都喺上面過，嗰日生日，大家出去食飯同我慶祝，古仔問我點解唔話佢知，之後都有同我食飯補祝！」

到今次拍電影，黃文標雖然和眾人已有多年無見，但大家感情如昔，猶如大家庭一樣。他憶述當時情況：「真係好warm，因為我同古仔住唔同酒店，車程都要10幾分鐘，所以我同佢哋唔係一齊食飯，有日我同宣萱講叫佢預埋我一齊食飯，之後佢話畀古仔聽，古仔同我講『冇人同你食飯話我知嘛，我搵司機嚟接你。』講完之後就一齊食飯。」黃文標舉另一個例子，他指拍戲地點在貴州，由於日夜溫差很大，有日自己拍外景時，只穿了一件單薄的外套，結果宣萱和古仔一個窩心舉動，令黃文標的暖意上升。「宣萱見我有啲震震吓，就將自己攬住嘅暖水袋畀咗我叫我頂住先，古仔經過，就叫自己個助手拎古仔着開嘅羽絨畀我着，大家真係對我好好。」

以往在劇中做慣奸人反派的黃文標，表示自己當初入行最大推動力，是由於現實中未能做到其他各行各業，年輕時曾考警察的他，最終遭爸爸反對，結果選擇做演員。歷年他多次扮演警察，算是圓了自己心願，直至現在，他最想扮演皇帝，笑言：「最想做個風流倜儻嘅皇帝，唐朝最好，清朝都唔錯，因為啲戲服靚。」

黃文標坦言唔介意演歹角，但卻因為反派角色太深入民心，間接令他錯失一段好姻緣。他透露去年和拍拖接近10年的女友分手，黃文標說：「我同女朋友係喺網上識嘅，我大佢24年，我識佢嗰陣，佢只係得16、17歲，到佢20幾歲先真正拍拖。」他坦言這些年和女友媽咪幾乎是零交流零溝通，就算上女友家中整電腦，亦要偷偷摸摸。問到他和女友有否想過結婚，他說：「結婚？對我嚟講只係一張紙，我大佢咁多，唔敢講我有幾長命，有幾多時間照顧佢，如果用一張紙綁住佢，到時我走（離開）咗，咁佢點算呢？」

分手導火線，黃文標指並非單憑一件事，除了年紀和伯母問題外，收入不穩定亦是「死因」之一，他說：「我當然有挽留佢，但到佢下定咗決心，我唔知用咩去挽留，因為有幾樣嘢係改變唔到，第一；我年紀大佢咁多，第二；我收入唔穩定，第三：媽咪唔鍾意，我點去改變呢三樣嘢呢？年齡冇得改，收入方面，我最多搵份收入穩定啲嘅工，佢媽咪唔鍾意，我點樣可以改變到佢鍾意我呢？」

外形粗豪的黃文標，訪問談吐卻出奇地斯文溫柔有禮，他所揹的真皮袋，更是自己一針一線縫製出來的，為他增添一份文青氣息。「整皮具都係受女朋友影響，佢嗰時學整皮具，見佢返嚟縫，我話使乜畀錢去學呀，佢話點解唔使呀？咁我用啲皮碎整咗個passport套，雖然唔係好靚，但幾得意，款式又唔同人撞，之後就開始整散紙包同手袋，有時朋友見我整得靚，都會畫啲款叫我整，雖然自己係業餘性質，但就幾有滿足感！」

TVB「御用收數佬」黃文標《尋秦記》再做古仔兄弟 遺憾同細24年女友分手

最後一口《蘋果》！娛樂新聞通常被睇低一線，狗仔隊追蹤藝人更經常被罵侵犯私隱，但在《蘋果》文化，娛樂新聞都要尋求真相，不求高深，但求傳真，揭露藝人在糖衣下的真面目，成就了多宗獨家C1猛料，其後更發展至全民皆記者，出現了「爆相爆片」，2019年轟動全港的「安心偷食」事件，就是由讀者提供。

《蘋果》狗仔隊於1999年成立，最初叫娛樂突發組，高峯期超過10位記者，當年甘比（劉鑾雄太太）加入《蘋果》都是「狗仔」一名；今日來到最後一天，工作多年的狗仔隊感慨萬千，腦海裏湧現各種追訪辛酸。在《蘋果》17年的狗仔隊資深記者Leo monster：「《蘋果日報》四個字令我聯想到狗仔隊，有幸到世界各地東征西討，國安法令公司出現變數，感激風雨同路，願與香港人一起到老。」在《蘋果》9年的最瘦Terry：「《蘋果》嘅同事做嘢真係黐嘅，入職差不多十年，一個癲過一個，能夠跟大家共事，不枉此生。」

港蘋娛樂-20210622狗仔出更

2012年7月，當年舒淇和馮德倫秘密復合，《蘋果》收風兩人蜜遊東京，派兩名記者到當地追訪，剛巧在成田機場直擊兩人返港，「公司叫我哋去日本搵馮德倫同舒淇，但只係得酒店名，唔知佢哋去邊；嗰日落機後，同事話去食支煙先，我喺大堂行吓，點知同事離開唔夠十步，我見到兩人戴黑超同帽出現，由機場入口行去check in，我即刻打電話畀同事，一人一邊影到佢哋合照，之後兩個分開上機、落機、返屋企。嗰次我哋喺日本即日來回，早機去晚機返，老婆本來畀咗張單叫我去買嘢都冇時間，最後返嚟忍唔住笑同事：『淨係食支煙就返嚟香港。』」

2017年3月，陳展鵬山頂夜會單文柔，記者上前影相，陳展鵬驚到心急開車走，退後時不慎撞到採訪車，令採訪車右方車頭凹陷，負責這單新聞的記者，慨嘆採訪有時要搵命博，負責追訪的輝豬：「雖然當時天色較暗，但記者經常衝鋒陷陣，有一定嘅危險，如果當時有同事喺後方亦非常危險，當時陳展鵬可能比較心急走，只係講咗句『聽日叫記者搵我』後即時離開，所以我哋有時候拍攝真係搵命博！之後因為交通意外要落口供，記者足足去咗三次交通部，由於陳展鵬期後轉鬼佬律師，成份口供變英文，仲記得繙譯員講笑話唔知以為呢一單係刑事案件，因為口供非常詳細，唔似一宗交通意外。之後陳展鵬認罪及有一個美滿家庭，每次見到《蘋果》記者已經認得我哋，佢會話：『又係你哋呀，《蘋果》吖嘛！』」

2016年5月，陳冠希與秦舒培及友人在楊秀惠店舖打躉吹水，因陳冠希與其司機基本上與狗仔隊長期不和，他們的警覺性算係首屈一指，負責追訪的輝豬：「為咗拍攝目標，記者要喺街趴喺地上影相，目的為咗不被發現，而陳冠希亦『不負眾望』當街𢱑下體；其後佢哋返洒店亦冇發現記者追蹤，仲影到佢哋情深一吻！到第二次追訪問回應時，陳冠希突然非常暴躁，同記者發生口角又反拍記者，之後仲放記者相上IG，話要做記者樣貌嘅衫賣，好在最後擺平咗件事。」

2012年9月，栢芝和霆鋒雖然離婚了，但一家三口到深灣遊艇會游水，被《蘋果》狗仔隊獨家影到，之後栢芝接受有線訪問，唔信是狗仔隊拍攝，「我重複又重複睇啲相，唔係普通狗仔隊影嘅相，因為好近，好有角度，好有鋪排。」負責採訪的狗仔憶述：「當時係夏天好熱，為咗避保安，記者匿喺停車場，全身濕晒，每有保安行過，記者扮喺車尾搵嘢，終於影到獨家相。好開心，原來喺栢芝心目中咁難影到，呢單嘢之後，深灣遊艇會好嚴格，見陌生訪客都問三問四。」

2012年9月，韓國人氣組合BIGBANG成員勝利來港拍劇時，被《蘋果》狗仔獨家影到秘撻房祖名日籍舊愛久保杏奈，兩人當街拖手又攬又啜，打得火辣辣。負責追訪的輝豬：「勝利當年來港，收到風去灣仔譚魚頭食嘢，嗰時我哋臨時OT，上去見到拉晒屏風，等到深夜11點勝利出現，45分鐘後食完落樓，見到有日模久保杏奈，佢喺街拉件低胸衫時幾乎走光。因為當年勝利好紅，新聞出街後好多人留意，記者都收到fans朋友打電話嚟鬧：『做乜影偶像負面新聞？』其實狗仔隊正面負面新聞都要報道。」

20多年，狗仔隊難忘又出色的採訪又豈只得幾單！還有2014年導演彭順背影后老婆李心潔，偷食「Sing之天使」李悅彤（Liddy），兩人肆無忌憚在圓方拖手、啜嘴、搣胸、搭膊、攬腰，之後直落返將軍澳愛巢，當年報道轟動全港；2000年6月，當年34歲的郭富城和20歲的名模Amanda S.打得火熱，《蘋果》狗仔影到城城冒險夜訪Amanda香閨短敍兩小時，她僅穿白色背心內衣襯小內褲送城城離去，臨別前還goodkiss好甜蜜。

2000年還踢爆了楊其龍和何超瓊的戀情，狗仔隊追蹤到泰國布吉採訪楊黛詩婚禮，影到超瓊和楊其龍拖手擁抱；另外，譚玉瑛拍拖38年的初戀男友曝光，都是被狗仔隊影到相，負責記者憶述：「從來冇記者影過，好多行家問我哋點跟到？我話：『唔係跟，真係撞到。』」還有昔日女神王祖賢於2013年現身香港，當年46歲的她不敵歲月催人，雙眼變得浮腫兼出現大細眼，女神崩壞；有無綫新一代「姣精」之稱的朱智賢，背男友謝東閔車廂偷食已婚港男黎振燁，結果兩人被無綫勒令停工，負責追訪的都是輝豬。

<b>「爆相爆片」踢爆李澤楷戀港姐</b>

除了「狗仔出更」報道精采外，近年《蘋果》成立的「爆相爆片」制度，成功讓讀者變身狗仔隊，同樣踢爆了很多藝人的秘密戀情，其中2019年許志安和黃心穎的「安心偷食」轟動全港，心穎主動攬啜安仔，令兩人形象破產；還有2016年2月，李澤楷孖郭嘉文東京度情人節戀情爆光。

娛樂福壽

娛樂狗仔丨東征西討踢爆藝人糖衣面目 偷食無所遁形

韓劇《奇皇后》的46歲男星朱鎮模，前年跟年輕10歲、有「醫學界金泰希」之稱的女醫生閔惠妍在濟州島<a href="https://hk.appledaily.com/entertainment/20190601/GLAB7RCVAFESRPJB25SCKGFPYI/" target="_blank">結婚</a>，雖然去年朱鎮模爆出遭<a href="https://hk.appledaily.com/entertainment/20200110/6LY4G5CEN7YE5WDFNSYRTF3JGU/" target="_blank">黑客入侵手機</a>，更遭黑客爆他曾狂send大胸女性相片給同行，並勒索金錢。事件爆出後，朱鎮模和妻子的感情未受影響，而閔惠妍目前亦在YouTube開設頻道，分享健康心得，近日她就公開了有關「減肥中不可避免的酒席，就這麼吃吧！」的片段，大談如何適當地飲酒也不會致胖。

閔惠妍解釋說：「酒是高熱量食品，每克酒精有7個卡路里，碳水化合物和蛋白質每克是4個卡路里，脂肪9個卡路里。即使酒喝多了，轉換為脂肪的比率也很低，反而一起送酒食物對吸收和儲藏脂肪會產生影響，好似高熱量、高脂肪食品，炸雞、五花肉會急劇影響健康。」閔惠妍推薦食芹菜、青瓜、紅蘿蔔等低熱量的送酒食物，水果方面就最好是莓類：「最好選擇水分含量高、膳食纖維豐富的食物。像我的話，減肥過程中喝酒的話，最常吃是用豆腐做的食物，因為蛋白質含量高，所以不用擔心會肥。」閔惠妍表示喝醉酒的話，中樞神經系統功能會全面下降，人亦會變得遲鈍，所以即使進食也不會覺得飽，而在解酒的過程中需要很多糖，像吃雪糕一樣甜的東西絕對不是對身體有幫助的行為。

閔惠妍直言酒本身十分利尿，所以亦會導致出現脫水狀況：「但是體重並沒有減少，也沒有減掉脂肪。因為水分流失，喝酒後第二天體重暫時減少，看起來像是消腫一樣。但是前一天喝完酒的糖或送酒食物等東西就會在血液中游蕩，如果放鬆警惕的話，體重好似減輕了，但幾天後就會變胖。所以第二天要多喝水，適量的有氧運動比較好。如果減肥的人有酒聚，最好制定幾個原則，第一種是吃大量食物，如果晚上有酒聚的話，最好是早上或者中午盡量吃得輕鬆些。早午餐吃得太少的話，在空腹狀態下去飲酒會變成暴飲暴食。在酒聚之前，最好是輕鬆填飽肚子，飲少量牛奶、雞蛋、杏仁，防止暴飲暴食，保護胃部。」

同時閔惠妍更分享個人經歷，強調一定要多飲水，又指自己會規定自己飲一杯酒的話就飲一杯水，又說：「我學會了酒精中唯一的抗興奮劑是水，水是可以減緩酒精的吸收，降低濃度。邊飲酒邊飲水的話，肚子很快就會飽的。」又笑指最佳的送酒菜是水，並表示：「喝含糖份少的酒也很好，酒的種類最好由本人指定，但果酒或發酵酒的熱量較高，減肥時最好還是喝蒸餾酒，燒酒、威士忌、伏特加等雖然好，但度數較高，需要調節量，湯力水熱量高，不能混着一起飲。喝酒後的第二天需要解酒，好好解酒有助於宿醉，但是很多人都喜歡吃拉麵或者海鮮麵等刺激性、辣及鹹的食物，高卡路里或鹽含量高的食物會刺激胃腸，容易長肉，對解酒亦沒有幫助。最好的解酒食物是水，離子飲料也好，礦物質豐富的蔬菜和水果也好，比起果汁，推薦用新鮮水果來攝取。我喝醉後的第二天用番茄或青瓜來解酒，如果非要喝湯的話，豆芽湯和明太魚湯會更加好。」

港蘋娛樂-韓娛20210604閔惠妍

朱鎮模索妻分享飲酒唔易肥心得：水係最佳送酒菜

今年40歲的李尚正，樣子有點木木獨獨，說話慢條斯理，平凡外表卻有着不平凡的遭遇，原因是他遇到人生伯樂─星爺周星馳。日前他接受《蘋果》訪問，說起這段奇遇，李尚正又要多謝另一個人─林海峰，他說：「當時我同林海峰做有線節目《有個娛樂乜人台》，佢自己一個人做半小時節目，除咗佢之外，公司搵我呢個做幕後嘅人同佢一齊做。林生當時好唔滿意，點解會搵個冇人識嘅人同佢做拍檔，可能佢覺得一個咁重頭嘅節目，都應該用多一千幾百萬，去搵啲人返嚟拍住做，搵埋周星馳吖笨，點知都冇。哈哈！」

港蘋娛樂-李尚正22062021

由於資源有限，一直在節目做下把位的李尚正，除了出鏡，還要負責剪片，節目設計，甚至打字幕，他笑言以現今的標準其實相當抵用。雖然做節目「1個打7個」，不過亦因為抵得諗關係，造就李尚正認識星爺的契機。「我又唔靚仔、唔好笑、唔識着衫，唔係姜濤咁靚仔，又唔係ERROR咁嘅樣。所以周生（周星馳）想知『點解呢條友甩皮甩骨嘅』，佢真係咁講！，佢問『點解你要出鏡？』，可能係好奇心勾起佢興趣。其實嗰時個台唔係好多人睇，但估唔到原來好多行內人睇。我唔知周生點解咁得閒睇咗。其實佢冇睇中我，我諗係睇中林海峰，可能掹車邊見到側邊條靚仔幾得閒，叫埋嚟幫手。」

據李尚正所說，第一次見星爺的心情極度忐忑。「周生打畀一個有線嘅導演，導演識我，佢同我講話周生想搵你，周生喺電話咩都冇同我講，淨係話『係呀係呀，上嚟先啦』。上到去，見佢同編劇、監製、投資方傾緊劇本，如果我一爆啲橋肯定瀨晒嘢，但周生見到我，問我覺得個劇本點，叫我講兩句，好尷尬！」他說着抓抓頭皮。

李尚正透露星爺頗喜歡集合一班人開會，但未必要在會中得出結論。他說：「佢講唔到好多嘢，有時會叫『阿正，你講吓啦』，我就求其講啲嘢，唔會中point，或者複述佢，佢會話『係呀冇錯』，可能就係你講多一次，幫到佢思考。」

在星爺的電影公司期間，李尚正再次發揮「全能」本色，除了陪星爺開會外，頭幾年在電影公司幾乎甚麼都做。「度劇本、making of、做老細私人事務，就算要拍戲，未埋班之前都要搞埋道具。」星爺出名嚴厲，尤其在拍攝過程中，傳聞逢人都鬧，又愛整蠱人，李尚正說：「佢冇整蠱過我，反而記得有次周生同李健仁住喺同一間房，有日周生返到房發現有篤屎喺廁所板上面，佢就百思不得其解，點解有篤屎喺上面？點解要咁整蠱？」問星爺有冇嬲，李尚正就好認真說：「佢冇嬲，而據我所知，佢都冇認真整蠱過人。」

李尚正在星爺旗下拍過多套電影，其中拍攝《西遊·降魔篇》時，更要犧牲色相全裸演出。對於這幕戲是否星爺臨時加插，他笑笑口說：「未必係加插，可能係一早諗到，或者佢瞓覺時諗好咗。但最慘係佢好多時唔記得咗，會話『喂，嗰時咪話咩嘅……』，佢明顯係諗過，只係唔sure有冇講過畀人知。」他憶述《西遊》戲中村民圍觀自己全裸的境況時，至今依然記憶猶新。「老實講，如果有講呢場戲就唔會接㗎喇。記得拍嗰時，佢叫人畀咗一條同我皮膚一樣色嘅三角褲，但因為鏡頭見到少少底褲邊，所以就除埋囉，周生都好窩心，一嚟就畀條褲我，可能第二take先叫我唔着囉，呢啲招數都熟口熟面囉！」

維基上說李尚正在中學會考時，考獲 4A、5B 及 1C，在高級程度會考時則考獲 3A、1B 及 1C ，優異成績絕對見得人。順利入讀香港大學修讀建築系的他，選擇這一科其實是受電影影響：「曾願望做律師、醫生、消防員、太空人。後來選讀建築是因為電影《玻璃之城》，覺得香港大學好靚，看電影感覺校園風氣好自由。」可是，當年距離畢業還有半年，李尚正面臨學生最苦惱的「畢業論文」，由於修讀建築系要升讀碩士的話，中間要有1年的工作時間，他為了暫避論文的壓力，經朋友的介紹下進入有線娛樂新聞台，亦因此被星爺發掘。他說：「你問我如果中六合彩係10分，我覺得星爺搵我，係有16至17分。一個人大包圍都可以中六合彩，但周生打畀你嘅機會唔可以強求。據我所知有好多人拎住錢上去搵周生，但周生都唔會理，而家周生搵我幫手喎，除咗受竉若驚、驚喜莫名外，簡單一句，就係此生無憾！」

李尚正笑談星爺奇遇記：佢問我點解咁甩皮甩骨

《蘋果》在過去26年來，獨家報道過不少震撼性的娛樂新聞，如藝人結婚、婚變、偷食、生仔、受傷等，其中獨家訪問「大劉」劉鑾雄，從細講到老連載刊登，令人津津樂道。娛樂新聞多姿多彩，睇《蘋果》報道知真相。

邱淑貞和沈嘉偉於1999年10月31日在日本舉行童話式婚禮，《蘋果》當年獨家直擊報道，兩人還坐着法拉利駛過日劇《戀愛世紀》浪漫場景「彩虹橋」行大運，成為經典一幕。當時多位紅星飛往日本觀禮，包括張國榮和好友唐鶴德、張曼玉、梁家輝、張智霖、吳君如、曾志偉等，星光熠熠。

採訪手記：當年往日本原本採訪東京電影節，落機後收到call要做邱淑貞結婚，當時只有一間酒店名字，通宵與攝記同事揭黃頁睇地圖，找到有三間同名酒店。帶去的錢有限，不能坐的士，翌日坐JR去到酒店，酒店內宴會廳行了幾圈，完全查不到，怎料臨離開lobby時，見到沈嘉偉，bingo！攝記拍照後，即被保安趕離場。打返公司，阿頭豪氣一句︰「walk in入去住，公司唔畀，我畀。」翌日一早見酒店停了多部法拉利花車，一對新人與賓客落樓上車，沈嘉偉揸車，記者乘的士追法拉利，在彩虹橋上，邱淑貞笑笑口拿住DV反拍記者。難得粒粒巨星任拍唔嬲，梁家輝還拿食物給記者，這次採訪之旅，一生難忘。

港蘋娛樂-20210622蘋聞重溫

2009年朱麗倩父親離世，劉德華以女婿身份現身，其後被《蘋果》發現兩人早於2008年已在美國賭城註冊。之後連環報道楊千嬅和丁子高、黎明和樂基兒同樣在美國註冊，至報道後才承認婚事。2010年3月，《蘋果》再發現鄭中基和蔡卓妍早於2006年1月在美國洛杉磯秘密結婚，翌日兩人現身記者會解畫，同時宣佈離婚，隱婚變離婚，震驚娛樂圈。

梁洛施當年以15歲之齡加入英皇娛樂當藝人，直至2007年邂逅城中超級王老五李澤楷，翌年梁洛施與英皇解約。與李澤楷年齡相距21年的梁洛施，於2009年4月為男方在多倫多誕下兒子李長治。產子消息，直至同年6月由《蘋果》以A1頭版獨家報道，當時獲兩人證實喜訊，報道出街後轟動全港。

2008年1月底正要迎接農曆新年之際，有人在網上發放男星陳冠希與女星鍾欣潼（阿嬌）的親密床照，事件爆出後，阿嬌的玉女形象幻滅，震驚全港。初時雙方指是合成照及惡作劇，但隨着流出「淫照」越來越多，更涉及多名女星，包括陳冠希的前女友陳文媛、張栢芝等，而照片中的女星幾乎全身赤裸或進行不雅行為，事件震驚中港台娛樂圈，涉事的陳冠希演藝事業被封殺。

無綫的節目、劇集及新聞每況愈下，令觀眾失望，2013年11月台慶前夕，有網民發起「萬千熄機賀台慶」，而當年的46周年台慶收視僅得29點，是19年來收視新低。因此觸怒無綫的神經，於同年11月21日無綫發表聲明指《蘋果日報》及動新聞趁無綫台慶「歇斯底里謾罵，煽動全港熄機，製造白色恐怖。」下令即時封殺壹傳媒旗下刊物，拒絕其記者進入電視城及一切採訪，至今仍未解封。

混血名模Mandy Lieu於2014年爆出與太陽娛樂老闆、已婚的洗米華（周焯華）的戀情。直到同年11月《蘋果》率先報道兩人在澳門VIP房豪賭百家樂的短片流出，片中Mandy穿着黑色性感裙真空上陣，露出東西半球，跟洗米華共坐一張凳，Mandy甘願做人肉梳化讓他坐大髀，洗米華背倚Mandy的咪咪帶醉玩百家樂。

2015年6月20日是《蘋果》20周年報慶，當年請來9位紅星為《蘋果》拍了一段「蘋果嚐一口，真相第一手」的片，參與的紅星有劉嘉玲、鄭秀文、周慧敏、陳慧琳、陳奕迅、陳志雲、李嘉欣、吳鎮宇及周秀娜。

一直是道地代言人的劉德華，於2017年1月16日在泰國郊區拍廣告，不慎墜馬受傷，事隔兩日《蘋果》率先獨家報道。當時華仔拍攝一場騎馬場面，馬匹忽然發狂，華仔不慎墮馬落地，而馬匹更踩到華仔的腰脊，令他的腰脊骨裂，廣告暫停。當時華仔立刻由泰國乘坐醫療專機返港，回港到醫院時，華仔全程卧床。

華人置業前主席，人稱「大劉」，有股壇狙擊手的劉鑾雄，於2016年成功換腎，並發聲明與呂麗君斷絕關係後，同年11月《蘋果》率先報道大劉入紙與甘比（陳凱韻）再婚。2017年3月大劉接受《蘋果》獨家訪問，其訪問以連載方式，由他親自細說六十年的傳奇歲月。同年10月周潤發太太陳薈蓮，接受《蘋果》獨家專訪，同樣以連載方式登場，剖白與發哥的情和事。

前商台DJ蘇耀宗（細So），去年9月被爆背妻偷食KOL練美施（Macy），秘密交往了兩年，Macy默認為細So做人工流產，以及惹性病給老公，細So好爸爸，好老公形象破產，細So演藝事業玩完，但最終仍獲太太陳頴楠（Wing）原諒。細So承認感情上確有做錯及處理不當，令大家痛心失望，實在難辭其咎，他感謝太太的原諒和愛護，並向太太承諾，努力維繫家庭，有指舉家離港重新開始。

港蘋娛樂-福壽

娛樂C1丨《蘋果》獨家娛樂新聞 發哥發嫂連載訪問掀熱話

我於1998年尾加入《蘋果日報》，自問是《蘋果》老人，不是說自己年資久，而是對老一輩藝人較為熟悉，《蘋果》歷年前輩藝人和失蹤人口專訪，自己也參與不少。

清楚記得第一日上班，便見識到《蘋果》採訪新聞如何chur到盡。當日八両金前妻八両菜被傳日本賣淫返港，《蘋果》一早派人飛到日本追訪，再安排另一記者即日來回東京，跟八両菜搭同一班機返港，然後總動員包圍香港機場，結果成功邀得八両菜到將軍澳蘋果日報大樓做獨家訪問，全港傳媒只能在大樓外守候。

《蘋果》作風就是不賣賬，凡事去到盡，不過，有時去得太盡，過了火位，最深刻一次，是以「航空母艦」來形容肥姐沈殿霞寶貝女欣宜，當日我與多位同事極力反對用字如此涼薄，但主管堅持出街，結果受千夫所指，肥姐次次見到《蘋果》記者都要爆粗問候洩憤。另一次，遭章小蕙介入婚姻而跟陳曜旻（白頭陳）離婚的鍾璧澤（Susanna）病逝，主管黐線到要同事透過問米婆訪問「Susanna」，新聞出街後，淪為全城笑柄，被堅哥葉一堅鬧到狗血淋頭。

加入《蘋果》頭幾年，我曾被派到外地參與突發新聞採訪，最難忘一次，是1999年赴美追訪行使假信用卡入獄的無綫藝人「大騎樓」鍾慧儀及李連杰與利智婚禮；當年為取得鍾慧儀放監第一手消息，與同事膽粗粗夜闖三藩市聯邦監獄，之後由三藩市追車追到去洛杉磯……鍾慧儀出獄後，緊接採訪李連杰與利智在洛杉磯豪宅舉行的婚禮，由於婚禮初期不安排傳媒採訪，眼見對家報館租用直升機高空拍攝，我情急下未請示主管便自把自為租用直升機……結果這個多月的美國trip花掉21萬。

好記得返港後拿着大疊單據文件給主管簽名批核，主管怕被堅哥責怪，要我親自遞給堅哥「送死」，堅哥一睇銀碼即爆粗問候，將整疊單據「劈」在我面前大罵：「戴彩煥，你破晒《蘋果》紀錄！我唔會簽架！」最後，自己「哽」了2萬多，勉強過到堅哥一關。

對於出埠採訪，《蘋果》過往都相當積極，除了派人採訪名人藝人外地婚禮，農曆新年亦會派狗仔隊飛到拉斯維加斯或者日本「辣更」，相當揼本，畢竟當年有廣告有收入，但過去10年《蘋果》受廣告商封殺，收入大減，狗仔隊如今連買票入迪士尼追訪藝人，都要左度右度。

今年4月，自己因為健康問題提早退休，告別《蘋果》，誰想到兩個月後，會是《蘋果》告別？心很痛，很難過，想向一班戰友說句「多多保重」，我為自己曾經是蘋果人為榮。

前蘋果日報娛樂名人版總採訪主任戴彩煥

我是娛樂記者丨98年入職見證高低起跌 以自己是蘋果人為榮

黃家駒1993年在日本意外身亡，他的一生短短31年，其樂隊Beyond留下來的作品卻影響了幾代人，特別是在大陸，Beyond受歡迎程度與日俱增，歌迷層面由15歲到60歲都有，還組織了Beyond交流會。我想家駒沒料到，自己出事前為Beyond作曲詞的歌《海闊天空》成為了港澳台三地的民主之歌，常在大型集會、遊行響起，象徵對自由和理想的堅持。相信他泉下有知，應該會感到欣慰。

不經不覺，家駒原來已過身28年了，記得第一次認識家駒是1987年，當時Beyond開始宣傳《亞拉伯跳舞女郎》這張唱片，他們經理人陳健添（Leslie Chan）把這個新組合介紹給我和幾位行家認識，這時候他們有5位成員，在一間燈光很暗的卡拉ok房，還穿上亞拉伯服飾，Leslie逐一介紹成員名字，我當時叫停了他：「呢度咁黑，你介紹完我都唔知邊個打邊個啦！不如播佢哋啲歌嚟聽吓啦！」

聽完這首歌後，我問了Leslie：「入面有把聲唱得好滄桑同沙啞嘅，係邊個唱嚟！呢隊組合嘅音樂同時下流下歌好唔同，幾有風格，應該可以殺出一條路！」後來他就告訴我主音是黃家駒，後來我開始訪問他們，其實主要都是家駒發言，他很健談，對音樂很有理想，說話率直不賣賬，我行我素的作風經常批評香港扭曲的主流音樂體制，討厭歌手「俾面派對」，為了得獎，就得出席頒獎典禮或與音樂無關的娛樂節目。家駒經常強調Beyond不走這套，只希望用音樂贏得大眾認同。

Beyond的歌迷都很認同家駒的理念，有位女記者行家M小姐有次向我提起家駒一些往事，她說：「家駒對Fans真係好好，90年時我哋經常喺Beyond出沒地方等佢哋，有晚12點幾，佢哋係廣播道做節目，我哋成班歌迷喺度等佢哋出嚟，結果真係等到家駒行出嚟，但佢當時似個爸爸鬧女咁一邊說話，一邊喺個銀包攞一叠20蚊紙派俾我哋一人一張話：『快啲走！聽日唔使返學呀！攞啲錢去搭的士，我一陣出嚟唔好俾我再見到你哋呀！』當時我哋好聽Beyond話，所以家駒發咗話，仲俾埋的士錢我哋走，咁我哋咪走囉！唔敢留低！」

後來M小姐由歌迷變成娛樂記者後，在一次與Beyond碰面時，家駒告訴她：「你做乜走去做記者！呢行咁陰險，你唔好做啦！辭工啦！」M小姐問他：「吓！唔做？咁做咩好呀！」家駒想了想說：「你留番長啲頭髮，去選港姐啦！」M小姐回他：「娛樂圈咪仲陰險！」最後M小姐沒有聽他，但收工還是會跟其他歌迷如常去追蹤Beyond，1992年有晚她們在紅館外等Beyond出來，M小姐回憶說：「嗰晚家駒叫住我哋行埋一邊，然後同我哋講：「話畀你哋聽，Beyond好快要去日本樂壇發展，我哋好開心，我希望Beyond可以成為國際化樂隊，可以去世界各地巡迴開演唱會。」之後Beyond去到日本發展算是有一個不錯的反應，家駒的衝出香港的夢想是邁進了一步。

1987年開始Beyond開始演出電影，家駒姊姊小黃（黃小瓊）是做製片的，她就找過Beyond客串劉德華主演的電影《肝膽相照》，小黃當時也不懂欣賞弟弟的音樂才華，她說：「家駒13、4歲已經喺屋企攞住個結他彈幾粒鐘，後來儲夠錢買到個電子結他更一日彈到黑，佢真係好努力！好熱愛音樂。」不過當時黃媽媽每日放工回家見到家駒和家強兩兄弟由朝到晚拿住結他彈，曾忍不住勸兩子說：「佢兩個不如踏實地搵份工做，唔應該玩呢啲無聊嘢，浪費時間同錢！」

雖然家人都不認同他倆兄弟追求音樂的理想，家駒中五畢業後，曾任職辦公室助理、鋁窗、五金、空調、水電工程、電視台布景員等工作，又在葉世榮介紹，加入保險公司任職推銷員。但他們還是堅持向音樂發展，父母阻止無效，他雙親又怎料到兩個兒子真的成了名，而且天天引來大批歌迷在家門守候，對家人造成滋擾，為免影響到父母生活，孝順的家駒後來就遷出了，不過他太喜歡母親煲的老火湯，所以他經常會帶女友Kim回老家吃飯。家駒是1984年邂逅了潘先麗（Kim），兩人都非常喜歡搖滾音樂，加上兩人經常在一起玩音樂，所以兩人便慢慢走到了在一起。當時家駒除組成Beyond外，還與弟弟、家強、Jackson、李俊雲和女友阿Kim 5人組成地下樂隊Unknown，而阿Kim就是Unknown樂隊的主唱。

Kim與家駒拍拖時，兩人極少獨處時間，因家駒喜歡任何活動都叫上兄弟們，他像大哥般照顧各兄弟，Kim說過：「家駒唔算係浪漫體貼嘅人，而且佢好鬼多嘢講，但佢真係好有音樂才華，而且好努力，又鍾意睇書，睇完又會同人分享。我哋約會好少單獨兩個人，多數係一堆人活動，佢同我拍拖去得最多係逛廟街，睇人翻筋斗，平時佢都唔多鍾意出街，喜歡喺屋企玩結他，作吓歌，佢一攞起支結他可以玩幾粒鐘，我咪睇電視唔打擾佢。」喜歡一個人時，不會介意對方的缺點，所以家駒喜歡晚睡、時常賴床貪睡、抽煙抽得很兇及愛漂亮，一頭短髮都要花上半小時來吹頭髮，Kim全部照單全收。

家駒一生幾段情當中，Kim是最得到家駒家人認可的女友，連家強都讚她是很好的女生，只可惜拍拖4年就因第三者介入而分手。Kim曾在網台自爆：「我唔想分開架，但有第三者介入冇辦法唔分。」但Kim沒有恨家駒，分手後依然保持朋友關係，後來家駒想着阿Kim往日的溫柔與美好，心中感慨萬分，於是為紀念這段情就寫下了這首感人的《喜歡你》。

家駒寫的每首歌背後都是有原型，好似《真的愛你》就是為母親而寫，《光輝歲月》是寫給南非總統曼德拉，《命運是你家》是以九龍皇帝曾灶財為原型，他對於做音樂是要求真情實意的。雖然《真的愛你》非常入屋，為Beyond拿下不少金曲獎，紅到連杜琪峯都請他們參與賀歲片《吉星拱照》演出，但其實這首歌是他們最不喜歡的作品，純粹為市場而創作的商業歌，完全不是他們的風格，Beyond的歌大多是在說理想、信念，批判社會及關心世界上之不公平現象。

杜琪峯是十分欣賞Beyond，1990年他監製的《天若有情》，除了主題曲由羅大佑作曲，新進女歌手袁鳳瑛主唱外，其他3首插曲《灰色軌跡》、《是錯也再不分》和《未曾後悔》都是由家駒作曲，Beyond成員分別主唱。其實阿杜搞這片的歌曲時，男主角劉德華曾經拿了一首杜自持寫的歌給阿杜，希望能放在戲中，但最終被拒絕了，華仔是很失望，有次去探他班，有聽他為此申訴過，後來我曾為此問過阿杜，他解釋：「華仔是好意，如果啱用，我一定會用，但佢交嚟隻歌真係唔啱部戲風格，Beyond家駒寫啲歌比較適合，到時你睇完部戲就明架啦！」看完這部戲後，我是認同阿杜的決定。

Beyond因為對香港樂壇感到失望，故在90年代初期Beyond決定發展東南亞、台灣、大陸、日本等亞洲市場。此時，日本經理人公司對Beyond感到興趣，與他們簽約，帶Beyond往日本發展。家駒是希望有更大自由度去玩音樂，以擺脫香港樂壇的束縛及題材限制。1992年，Beyond開始長居日本發展，但沒想到為宣傳即將發行的日語唱片，Beyond還是要配合，一樣要上電視台綜藝節目玩遊戲，結果在狹窄並沾滿水漬的台上奔跑時不慎滑倒，墜落2.7米的台下導致身亡，香港樂迷未傷痛完，4個月後連陳百強也因昏迷引發的逐漸性腦衰竭離逝，一年內2位音樂才華出眾紅歌星英年早逝，怎不教人欷歔。

由於公司停刊，這是最後一篇，感謝大家捧場，後會有期！

作者介紹：白露眉，縱橫娛樂圈35年的資深記者，看盡圈中人情冷暖；這年頭，地球病了，娛樂圈轉慢了，白露眉是時候出手了，在《蘋果》分享【非常人•非常事】，跟「蘋民」圍爐取暖。這次會一周寫兩期，每逢周三和周日刊登，不過周日不會開名寫人物，我會以秘聞方式寫娛樂圈的有趣事。

蘋果App大升級 更簡潔更就手！<a href="https://hk.adai.ly/e/OtW3tq3FBfb">了解更多</a>（<a href="https://hk.adai.ly/e/yuOejIPKBfb">立即下載體驗</a>）

非常人●非常事丨黃家駒擔心Fans夜歸 每人派20元趕緊搭的士回家

兩大意大利名牌Prada及Ermenegildo Zegna集團，昨日破天方宣佈成為合作伙伴關係，雙方會以各40%股權收購意大利羊絨(Cashmere)生產商Filati Biagioli Modesto。

昔日蘋果