今年 7 月 26 日，逾 300 人聚集在觀塘 apm 商場，眾人屏息凝視眼前的大螢幕，張家朗最後一劍乾脆利落刺中對手，力挫意大利劍手、衞冕金牌得主加羅素，全場掌聲雷動，有人高呼「We are Hong Kong」，甚至興奮得開香檳慶祝。當晚，更多市民在客廳、餐廳、商場等地見證這場歷史性賽事——港隊史上第二面奧運金牌 。

那刻，全城哄動，或成為大家今年最快樂的集體回憶。

2021 同樣是不容易的一年，但 7 月底揭幕的東京奧運，加上首次五台聯播，讓眾人久違地重新聚集起來。今屆奧運，港隊派出 46 &nbsp;位運動員參賽，贏得 1 金、2 銀、3 銅參賽以來的最佳成績，其後再於殘奧摘&nbsp;2 銀、3 銅。

目睹本地運動員創下一個又個精彩時刻，眾人一起喝采、鼓掌、相擁，這段日子，亦可能是香港人 2021 年無憂無慮的半個多月。

奧運掀起一股前所未有的運動熱潮，運動員 Instagram 的追蹤人數爆升至十萬人以上，但賽事完滿落幕至今逾 5 個月，支持者是曇花一現，抑或仍有留下來的人，身體力行繼續撐起港隊嗎？

《立場新聞》趁年末前，透過接觸忠實粉絲，以及東奧乒乓球女團銅牌得主蘇慧音，跟進這場世紀奧運之後的變化。「我會話唔係淨係一個熱潮，而係好似一支火柴點起咗，然後佢一路蔓延開去。」謝影雪 Instagram 粉絲專頁管理員 90 後「站姐」如是說。

聖誕假期第一天，中四的 Alex 睡眼惺忪地看到手機 Instagram 傳來新通知，「cheungkalonggggg 開始追蹤你」。他怔了怔，禁不住擦擦雙眼，緊張地解開螢幕密碼，花近數分鐘才相信偶像竟然追蹤了自己僅得 458 名的粉絲專頁（<a href="http://www.instagram.com/cheungkalong.fanspage/">@cheungkalong.fanspage</a>）。

「Wtf Wtf 我啱啱瞓醒，我唔係係度發緊夢嘛⋯依家個心跳得勁快 Wtf ，No wait 大家俾少少時間我冷靜下，成個身係度震緊。」他立即截圖分享到專頁，再傳訊息向記者形容心情「激動到嘔泡」，「但係一個好好嘅聖誕禮物」。

東京奧運開幕前，Alex 對體育新聞、運動員不大感興趣，直到男子個人花劍 16 強賽事，目睹張家朗面對世界排名第一的意大利劍手 Alessio Foconi 時，始終鎮定自若、鬆容不迫，每一劍鬥智亦鬥力，令 Alex 好不著迷開始「入坑」。

他猶記得，金牌戰當晚與家人一同見證香港歷史性一刻，「但跟住阿爸阿媽繼續執枱，我又唔可以叫「啊」一聲嗌出嚟，咁會好奇怪，總之我好興奮。」

從韓團追到香港運動員

事實上， Alex 身邊的朋友又或說大部分港人，可能不是「韓粉」就是「鏡粉」，持續緊貼運動員一舉一動，甚至成為忠實粉絲的人寥寥可數。於是，他萌生開設 Instagram 粉絲專頁的想法，既為圍爐取暖，也有顆純粹的心，「想多啲人留意佢（張家朗）多啲，鼓勵佢多啲，因為每個香港運動員都好需要香港市民嘅鼓勵。」

原來，Alex 過往追開韓國偶像女團，今次突然「轉軑」，卻比以往追星來得更虔誠。

自資印刷張家朗「應援小卡」

每當張家朗出現在雜誌封面上，哪怕是平日不曾翻開的時裝雜誌，他必定趕到便利店搜羅每一期；又試過放學後，獨自一人從天水圍飛撲出九龍，僅為見上偶像 15 分鐘；張家朗新出版的書他當然也有一本，現正珍藏在床下的盒子，「我唔想放係枱面，可能食個麵會整污糟，揭開每一頁嗰陣都唔敢太大力。」Alex 更將韓圈粉絲為偶像自製「應援小卡」的做法照辦煮碗，自資印刷張家朗的「小卡」，計劃舉行免費抽獎送贈其他粉絲。

記者好奇，他會走去學劍嗎？他失望指學校要下學期才開班，但立馬澄清並非要成為下一位劍神，「我想知道比賽點得分、點解個比賽會咁食腦，好想嘗試下，比自己一個新嘅經驗。」

「金牌」精神食糧

他兩位好朋友 Gigi 和 Angel 異口同聲說，「佢之前都追過好多韓國明星，但唔會咁熱情，我冇見過佢咁 all in 一個人⋯我（本身）覺得佢過完奧運就會唔鍾意，以為 10 月就冇㗎喇。」她們笑言，Alex 性格向來三分鐘熱度，但近半年見證他對張家朗的支持熱度不減反增，同時令他生活改變不少。

被張家朗堅韌意志打動

與其說張家朗奪金吸引 Alex，不如說這位少年 9 年來不斷練習，中途毅然放棄學業轉全職打劍，甚至在最高世界舞台上，即使比分大幅落後，仍然展現出堅韌意志，種種堅持真正打動了這位少年。

何詩蓓於東奧贏得港隊首面女子 200 米自由泳銀牌時曾說，張家朗摘金令她知道努力都可以有成績，「可能你哋見到嘅就係台上，我哋比賽嗰幾分鐘，如果幸運嘅去到頒獎台，咁 glorious moment （輝煌時刻），可能大家見唔到我哋背後好努力嘅訓練機會。」

誠然，大部分運動員站上頒獎台後，付出才被予以肯定，手執的那枚獎牌，卻是由數之不盡的汗水、淚水鑄造而成。

正值中四的 Alex，經常被沉重的學業壓得踹不過氣，唯有繪畫張家朗畫作時，躁動的情緒才能得以撫平。一幅幅劍擊港隊坐在奧運五環前的合照、比賽舉劍的勝利姿勢，就是他最好的充電時間。

「呢排學業都會因為佢再努力啲去做，做嘢嘅熱誠多咗。」

撇除奧運，今年同樣是本地體壇的大豐收：飛魚何詩蓓成為真正「世一」，於世界短池游泳錦標賽奪 2 金 1 銀兼打破世界紀錄，羽毛球混雙組合「鄧謝配」和空手道劉慕裳同樣在年尾的世錦賽雙雙摘銅。

持續追蹤運動員每場比賽的動向，不只新聞機構，還有設立謝影雪粉絲專頁（<a href="http://www.instagram.com/allforsuet_1109/">@allforsuet_1109</a>）的 90 後「站姐」。

她向記者笑著承認，東奧前也是網民口中的「忽然球迷」，但今屆全港關注的熾熱氣氛卻讓她逐漸變成「忠粉」，「我唔想（往後）每四年啲運動員出一出嚟，過咗一陣就唔記得咗佢。」

混雙羽毛球銅牌戰中，「鄧謝配」最終憾負東道主日本僅獲第四，即使已創下羽毛球港隊歷史，但現實終歸現實，站姐說，而攞唔到獎牌最容易俾人遺忘，獎牌嘅運動員會有光環，有大肆報道，但四強都好勁喎，爭少少攞唔到個牌都算，仲要大家唔記得咗佢哋，我唔想見到。」

憑藉這份信念，站姐將一個平平無奇的 fans page 打造成「體育台」。

由零開始　真正撐起港隊

隨著「鄧謝配」今年 10 月出戰羽聯世界巡迴賽，專頁由轉發謝影雪的生活動態、站姐親自拍攝的宣傳活動相片，到被一張張自家製的賽程預告、比賽直播連結、成績排名表取以代之。打開她的 IG，賽程設計簡潔有序，每場比賽更新及時，讓人差點以為是體育消息的專頁，原來全部出自最初對羽毛球一竅不通的站姐手中。

「個嚴重程度係我連羽毛球有發球線唔知，有分單雙打線又唔知，所有呢個關於羽毛球比賽嘅嘢都一啲都唔知。」她尷尬一笑，「心諗點解個名隔離要括住個數字，完全唔知種子（球手）有咩優勢。」

歐洲巡迴賽首站是丹麥公開賽，站姐當時處於轉新工的空窗期。開賽前兩星期，她每日花上 7、8 小時在網上惡補羽毛球知識，又進行「考古之旅」重看謝影雪多年來的比賽片段、新聞報道，並嘗試利用網上製圖軟件設計不同版本的賽程，以應付歷時三個月的巡迴賽，「嗰陣瘦咗 2kg，好最難捱同崩潰，我已經要唔識，仲要加埋班唔識嘅人（ fans）。」

履新後，站姐的「工作量」卻未曾減少，她憶述 11 月印尼羽毛球大師賽期間，比賽通常在下午 3、4 時舉行，「 係公司都要偷做，萬一佢哋打頭場，fans 又等緊我條（直播）link，我真係要去廁所出 story update。」

羽毛球世標賽　一人包辦港隊&nbsp;12 人賽程更新

但年終的羽毛球世界錦標賽才教她「難忘」，一人獨自包辦港隊全隊 12 人的賽程更新，「最瘋狂一日有 6 場，我係由朝到晚都要做同一樣嘢，我係崩潰到好驚自己唔記得任何一場，set 咗佢哋賽程做手機 wallpaper。」不過，因為西班牙與香港有時差，比賽大多在凌晨時分舉行， 「我覺得自己好似打緊兩份工，一日訓得兩三個鐘，6 點幾起身返工。」

奧運只是「熱潮」嗎？

每日應付雙重工作量，長期睡眠不足，體重更輕掉幾公斤。明明不是其他球員的粉絲，她為何要「攞苦嚟辛」？

在站姐眼中，#撐起港隊 不應該流於口號，認為港人可以「看到」其他同樣出色的運動員，「我想見到大家百花齊放的畫面，生態會好啲」。她分享，謝影雪早前於德國賽 32 強提前出局後，有網民緊張問會否暫停更新該站賽程，「你會見到，唔係淨係雪姐嘅 fans 先 follow 我，其他李卓耀、伍家朗嘅 &nbsp;fans 原來都係度，大家都好關心香港羽毛球。」

「本身睇波就係一件好快樂嘅事，係有種大家一齊為咗同一個目標去歡呼，贏波大家聚埋一齊，就算只係網絡聚埋，輸波就一齊圍爐取暖，安慰大家唔緊要喇，我覺得係好 warm。」

大家常說，奧運只是每四年一次的熱潮，然後無人關心、留意運動員的去向和福祉，跟著四年過後，再來一次全城哄動。但今屆東京奧運本來就與別不同，疫情緣故而延遲一年舉辦，至於對香港市民，遭受社會環境劇變、疫情困港後，我們終於迎來生活中久違的悸動。

「尤其是呢幾年喺香港咁低迷嘅氣氛下，有一樣野可以俾大家寄託到，係一件開心事，可以凝聚返大家個股力量。」站姐如是說。

她不禁自豪笑言，自己和其他粉絲絕對為「忽然球迷」平反，「我覺得好開心好似一把車落佢哋（批評的人）度」。接著說，「我會話唔係淨係一個熱潮，而係好似一支火柴，點起咗，然後一路蔓延開去。」

如同香港近年娛樂圈發展蓬勃，站姐樂於看到體壇有相同的趨勢，「點解運動員都唔可以有個地方、平台去支持翻佢哋，你話明星佢哋就會搞演唱會，如果香港運動員打比賽都會有好多球迷、粉絲去睇，會係我最想 achieve 嘅效果。」

比賽過後，運動員的情況如何？

適逢拆禮物日，乒乓球運動員蘇慧音走入旺角商場擺賣自家設計的產品，為流浪貓狗籌辦慈善義賣，不少市民經過特意與她合照，有人主動慰問其傷勢，又好奇她獲獎的難忘時刻。Minnie 向記者透露，第一次與客人介紹產品理念時有點措手不及；以往一眛只懂訓練和比賽的她，近幾個月完完全全踏出舒適圈，開始代言廣告、到校分享、與胞姊進行網上直播，一切的新嘗試全部源自奧運的延續。

回想這趟夢寐以求的旅程，對蘇慧音來說，今年是由痛楚與奇蹟交織而成。

港隊奪得的其中一面東奧銅牌，由女子乒乓球代表李皓晴、杜凱琹、蘇慧音在團體賽中連番苦戰下贏得，當時尤其以「粉紅色頭」的蘇慧音狀態大勇，個人連羸 2 局，為獎牌打下重要基礎。但在鎂光燈的影子下，蘇慧音的右手神經線早在奧運前一年已經受傷，練習時難以控制右手的動作，加上早前腰部的傷患，她形容這段時間是「乒乓生涯最難捱嘅一年」。

「我本身係啱啱出嚟嘅新星，仲覺得好多希望，但自從一傷之後，啲傷勢係連續嚟，我覺得自己係由一個 start 逼到去懸崖邊，成日都好驚自己去唔到奧運。」

運動員的日常彷彿是學習與傷患共存，蘇慧音從負傷上陣當中，學懂接受不完美的狀態，「就係有啲困難先令到你做啲你做唔到嘅嘢，如果我冇受傷，可能就拎唔到呢塊牌⋯我唔會有咁大嘅決心、無咁堅強。」

感激支持　自信、士氣大增

她說，看似堅強的背後，全靠有一班香港人無條件支持和鼓勵。迎戰團體銅牌賽前，單打 64 強早早出局令她信心大減，「輸一場比賽感覺只係輸場比賽，但對運動員來講好似輸咗個世界，好似個天塌落嚟咁，你係輸咗教練、父母、身邊嘅人對你嘅期望，輸咗比你自己嘅努力。」感到泄氣、灰心期間，她收到一個又一個打氣訊息，看似簡單不過的文字，卻讓她重拾心情，鋪下於團體賽中無懼傷勢，奮力一戰的畫面&nbsp;。

「有陣時唔係偶然，今年真係特別多人睇奧運，港隊亦都特別多獎牌，對運動員士氣好有幫助。」

寄語港人：保持初衷，堅持到底

支持者的數量多與否，顯然不是蘇慧音最關心的事情，她渴望將場上大聲叫嗌的正能量、熱血澎湃傳遞予每一名市民，「香港真係唔容易，疫情係對大家嘅心理上都會覺得好 negative，甚至睇新聞又會覺得好攰，疫情又唔知幾多宗。大家長期都處於一個好沮喪，甚至我自己有時都唔睇新聞專注打波，今次奧運我哋終於有啲令到大家都好開心嘅新聞！」

如果運動係可以為大家帶嚟希望，我覺得係最開心嘅事。/ 蘇慧音

她笑著說，「如果運動係可以為大家帶嚟希望，我覺得係最開心嘅事。」

這趟走往世界最高舞台的旅程，除了收獲一枚銅牌，她切身感受到：咬緊牙關堅持下去，原來力量可以變得很強大，「特別係好難嘅事，你堅持一定會有一個終點，我都同自己講：我都想放棄，身邊嘅人又質疑我、又覺得對唔住我嘅隊友。」她發現，成就一件事的過程越難，結果可能會越好，因為每個困難都是令自己更加堅強。

距離 2021 年尚餘數天，蘇慧音希望勉勵香港人「Keep Fighting，Keep Believing」，「有陣時係要保持個初衷，堅持到底。一開始你相信自己做到，去到最後你都要相信，繼續向前行。」

廿三歲的她肯定語道，「有時人生係好多好難嘅嘢⋯但個世界係點，其實係取決於自己。」

再見 2021，盼望港人來年會如運動員們繼續堅持，Keep rolling。

今年 7 月 26 日，逾 300 人聚集在觀塘 apm 商場，眾人屏息凝視眼前的大螢幕，張家朗最後一劍乾脆利落刺中對手，力挫意大利劍手、衞冕金牌得主加羅素，全場掌聲雷動，有人高呼「We are Hong Kong」，甚至興奮得開香檳慶祝。當晚，更多市民在客廳、餐廳、商場等地見證這場歷史性賽事——港隊史上第二面奧運金牌 。那刻，全城哄動，或成為大家今年最快樂的集體回憶。2021 同樣是不容易的一…

昔日立場