提起Fujitsu好多人以為佢淨出Notebook，乜……手機都有麼？查實Fujitsu喺日本不嬲都有推手機，而且頻率同Sharp有得揮；最新F-01A唔止係一部好色、玩質感嘅電話，而且以防水為賣點！4隻色中，水貨佬最撐直紋藍，重金屬Feel之餘，日本廣告內木村拓哉都玩佢，難怪咁搶手！ 咪以為手機落水都要笠殼，F-01A有好多微細防滲漏設計，如USB充電位特別裝上膠粒，阻隔水份進入；電池位更採用雙重保險，亦即鋰電池以上仲有一層金屬隔膜，而裝上電池蓋後，亦要Lock多下確保安全。但即使提供晒妥善保護，每次開機時仍會再次提醒你，千祈咪無情情冲凉嗰陣拆蓋換電。

呢排Hit玩觸屏，F-01A喺正常摺機狀態下，屏幕並不支援任何Touch指令，但如果將個芒扭轉嚟用，唔止能直接篤芒操作，介面仲會由傳統九宮格，搖身一變成3D視點！利用橫屏影相、拍片等固然玩味十足，但可惜睇相嗰陣唔提供Multi-Touch，亦唔能夠直接喺屏幕上寫字，對比起PDAPhone，當然冇咁多花臣。 身為防水手機，特別係冲凉或洗碗嗰陣，即使整濕咗仍無阻通話。但如果去沙灘游水又點計呢？據NTTDoCoMo資料顯示，F-01A能夠喺水深1米環境下，連續停留長達30分鐘；照咁睇，亦即係話啟動相機後，仍可於水底進行拍攝，機身配備520萬像素及輕觸式對焦，似乎專為水底拍攝而設，但一般泳池已超過1米水深，當佢係潛水相機咁用，都係博唔過！

制式：WCDMA/GSM三頻 體積：111×50×17.5mm 重量：142g 屏幕：3.2"TouchScreen 通話時間：230（3G）/220（2G）分鐘 功能：防水設計、520萬像素、手指觸控對焦、16倍數碼變焦、支援8GBmicroSDHC、藍芽2.0 查詢：三禾電氣（23740618）

當年今日