制式：GSM900/1800/1900三頻 顯示器：26萬色/128×128像素 鏡頭：130萬像素 記憶體：內置60MB、miniSD記憶卡 功能：40和弦、MP3播放/鈴聲、收音機、JAVA、GPRS 備用時間：85-150小時 通話時間：170-300分鐘 體積：66×66×20.7mm 重量：106g  今次BenQ喺北京搞嘅發布會，一切以音樂為主，主要原因除咗新產品乃MP3手機及MP3機之外，更邀請台灣樂隊「五月天」作為代言人，所以會場內外都掛滿「Qube」及「五月天」海報，未入場已經感受到BenQ的音樂氣息！而今次新產品以內地市場為主，所以亦邀請咗全國各地傳媒，人數多達數百，令會場水洩不通！

外形四四方方嘅BenQQube，類似嘅手機外形有Nokia7600，不過7600玩嘅係時裝Feel，而Qube就大玩影音娛樂，兩者對象完全唔同！論手感，66×66×20.7mm嘅Qube算恰到好處，無論男女拎上手，唔會因為四四方方而覺得難拎。兼且支援換殼設計，前後殼都可以更換，用嚟襯衫都冇問題！講明播放音樂乃Qube重要任務，表現當然要有番咁上下，隨機已經有線控，就算唔用線控，機背亦都有個大喇叭，播放質素係「重質不重量」，音質相當清澈，聲量方面就唔係「拆天」咁嘈，不過已經相當足夠，聽歌啫，開到拆天咁大聲做乜！播放功能上，Qube亦交足功課，有搖滾、爵士等多種音效之外，亦都有3D音效，更重要就係有埋歌詞顯示！另外，聽歌之外亦可以聽收音機，點會再怕悶。

除咗播放MP3之外，Qube另一重要功能就係影相，機背設有130萬像素鏡頭，旁邊重有閃光燈，影相時可以啟動之外，有需要亦都可以當手電筒用，火力都唔弱！機頂設有影相掣，一如DC般操作！顯示器方面就配上1.5吋26萬色芒，不過解像度較低，只有128×128像素，睇相時就略嫌線條粗咗少少。但係記憶體方面，Qube就非常出色，內置60MB記憶體之外，更支援miniSD記憶卡，聽歌影相都綽綽有餘！由於採用四方形機身，所以聽筒位就設於機角，若果係Nokia7600用家，相信會好快適應到！

同場加映 Joybee220　MP3機擺上床

雖然Qube好似搶咗唔少風頭，不過會場上所擺放嘅三部全新MP3機，一樣有吸引力！當中較受注目就係Joybee220，就咁睇MP3機身好似較為平凡，不過配上個2.1聲道專用機座就即時升價十陪！內置容量未有透露，不過睇睇Joybee220喺MP3機之外，更加做埋睇相、錄音機、USB硬碟、收音機及床頭鬧鐘，相信容量都以GB計！

羅小姐（廣州電視台）我會揀Joybee220，自己鍾意白色，所以一見已經好鍾意，而且聽歌亦都好方便。

Tina（廣東電視台）自己不嬲都鍾意黑色，所以我會揀Joybee720，機身又黑又銀，真係非常有型。

各大MP3機廠商都推出數以GB計MP3機，目的都係追住iPod嚟打，所以Joybee720都唔例外。一身鋼鐵硬朗造型，金屬質感非常強烈。不過功能上就強得多，用上彩色顯示器，以及內置5GB硬碟，可以播放MP3及收音機之外，更支援SD記憶卡，順理成章做埋讀卡器、電子相簿及流動硬碟機。  推出日期：6月 售價：未定

用上特大6萬5色彩芒嘅Joybee230，當然唔單止聽歌咁簡單，支援BMP、JPG、GIF及LGO多種格式檔案，所以睇相先至係Joybee230嘅職責！另外，亦支援電子書格式檔案，將Joybee230變身做電子書都冇問題。Joybee230共有128MB、256MB及512MB3種記憶體容量，支援USB2.0，過歌過相都特別快！  推出日期：6月 售價：未定

當年今日