外國記者會於四月九日中午辦咗一場辯論會，現在講番，好似過時，但因為題目冇時間性，家先至寫，仍有趣味性。<br/>FCC當日特別邀請咗股壇長毛DavidWebb與前《南華早報》專欄作家JakevanderKamp（下稱DW與vDK）對壘，講「延長董事禁售期」，DW素來鼓吹嚴控上市公司，一向贊成延長禁售期（black-outperiod），而vDK就係市場派，觀點比較接近「獅子山學會」，大力反對。<br/>左丁山坐在一位西人隔籬，佢以前係政府官員，退休後做「仲裁、調解」，專門處理建築、工程方面案件。佢問左丁山贊成還是反對，左丁山話反對，佢就話贊成，於是台上未開始，我哋已經辯論咗先。點解會有時間呢？因為DW隨身帶住電腦，偏偏呢日佢嘅powerpoint以密碼言語編寫，FCC電腦投射無法啟用，故此佢急急返屋企攞過另一個無密碼版本，場辯論於是延遲開始。<br/>DW首先發炮，指反對者其身不正，別有用心，引美國JP摩根董事例子，人哋自願不在業績公佈前買賣公司股票，又話延長禁售期可以逼使公司提早宣佈業績，有益投資者，講到尾，佢認為公司董事擁有大量資訊，與股民得到之資訊極為不對稱，延長董事禁售期，有助解決「不對稱」問題。（按：DW冇講到美國根本沒有業績宣佈前禁止買賣股票呢回事，花旗集團董事在三月初買入花旗股票，之後CEO大力唱好，而第一季業績要等到四月十七日先至宣佈，但美國冇傳媒批評花旗董事。美國的月亮不一定圓。）<br/>vDK冇DW咁多準備，亦冇powerpoint，但以前投資銀行（大摩）分析師身份，佢講得好實際，不講理論，佢指出：（一）在投行工作，如果你夠膽同上司講：「阿媽教我唔好咁做」嘅話，想升級就幾難。對冲基金與投行最喜歡上市公司大股東在某段時間內不能買賣公司股票。（二）香港與亞洲上市公司，好多由家族控制，不似英美，延長董事禁售期就係忽視本地情況。（三）公司董事如果因為資訊不對稱而買賣股票獲利，就係內幕交易，可以拉人，何必延長禁售！vDK猛問DW提供確實證據在美國、英國、香港，有冇公司董事買賣股票獲利而非（ａ）做假賬或（ｂ）內幕交易？一般買買賣賣，公司董事好少賺到大錢。而（ａ）或（ｂ）根本與延長禁售期無關。DW冇直接回答。

當年今日