官恩娜昨日在尖沙嘴出席星級ShoppingBag展覽，她親自設計購物袋，藉着母親節表揚母愛偉大。現年27歲的她盼三年後生BB，她說：「我希望30歲前成為媽咪，母親係一項偉大工作，有時我都會同媽咪嗌交，佢就會話『遲啲你做咗人媽咪，你就知幾勞氣！』相士話我會有七、八個仔女，我覺得生三個就夠，今個母親節我會送份大禮畀媽咪。」

對於緋聞男友吳卓羲涉辱罵球迷撩交打，問官恩娜覺得對方是否脾氣暴躁的人？她說：「我唔知呢件事，其實我唔會再講關於佢嘅事，講咗太多次。」 採訪：魯萍 攝影：陳慧安

官恩娜盼30歲做阿媽

梁洛施日前穿上A/T黑白灰春夏新裝配襯Jacob&Co.腕錶，任內地時尚雜誌《WFD國際服裝動態》5月號封面女郎。才18歲已入行兩年，又經過公司雪藏的梁洛施，在訪問中表示自己工作時獨立，休息回家則依賴，她說：「工作時我係全程投入，性格一定好獨立，不過返到屋企，我又變得好依賴媽咪，我同佢感情好好，乜都可以分享，惟獨工作有唔開心嘅事，我唔會提及。」

訪問中，梁洛施承認自己情緒化，但感情豐富更方便演戲，她說：「演戲可以用動作語言服飾去表現，唱歌只會用聲音，演繹起嚟較困難。」提到感情事她只是輕描淡寫，至於理想男伴，她說：「要有事業心、熱愛家庭、有智慧、有才華。」

梁洛施自認雙面人

阿Net向來對化妝品廣告興趣唔大，事關十居其九都只係女星嘅大頭特寫，不過韓國美女金泰希嘅化妝品HERA新廣告就幾有噱頭，呢個廣告𠵱家喺網上有得睇喇！希妹喺廣告中化身布拉格公主，為咗見愛郎逃出古堡上咗郵輪，仲迷倒船上所有男士，但最終都俾屋企派嚟嘅手下搵到，見佢做出驚慌神情，演技似乎進步咗喎。 網址： http://www.youtube.com/watch?v=e9X3tLP_34Q

環球片場 金泰希公主大逃亡

動畫《史力加3》（Shrek3）前日在洛杉磯舉行首映禮，為日版費安娜公主配音的日本女星藤原紀香專程飛往當地出席盛會，身穿墨綠色露肩長裙的她更在紅地氈上重遇聲演英語版費安娜的金美侖戴雅絲（CameronDiaz），兩人甫碰面即大談近況，將於本月30日與丈夫陣內智則舉行婚宴的紀香更大晒婚戒，並接受金美侖的祝福。 另一方面，老婆不在身邊的陣內，日前為綜藝節目與性感女星星野亞希同遊車河兼浸溫泉，認真艷福不淺。

紀香向金美侖晒幸福

今年是無綫40周年台慶大日子，威足幾十年的無綫，過去先後在佳視、麗的和亞視三個年代的電視大戰中成為贏家，稱霸本地電視市場。不過面對今年亞視和有線兩台聯手夾攻，無綫能否穩坐電視台一哥寶座，則要拭目以待。

無綫眼見亞視和有線正部署大舉進攻，正好趁40周年台慶借勢揮軍還擊，先在7月舉行明剃亞視眼眉的首屆無綫版電視廣告頒獎禮作戰前熱身。其實亞視《十大電視廣告頒獎典禮》已有13年歷史，節目意念本來不錯，惜大多藝人與無綫有約未能出席，基於無綫具大卡士藝人擔任嘉賓的優勢，遂照辦煮碗兼踩亞視一腳。無綫綜藝科高層何麗全昨日在電話中說：「我哋喺7月係會搞廣告頒獎禮，係TVB自己製作，喺無綫賣過廣告都可以參選，最紅嘅藝人都有拍廣告，我哋都可以請到。」據知被邀出席的藝人名單包括周星馳、周潤發、章子怡和鞏俐等。 有指無綫此舉明抄亞視，何麗全說：「咁有好多嘢都做過㗎，有新構思擺落去嘅，例如我哋會分衣、食、住、行嘅廣告頒獎。」除此之外，無綫會在10月重新製作《歡樂今宵》，並反挖約滿亞視的何守信和李香琴加盟，何麗全說：「我哋係搵緊佢哋，仲有好多舊人，葉尚華同盧大衞都傾緊。」

當年今日