楊千嬅和側田昨日以KFC代言人身份，與執導廣告的陳果出席記者會。千嬅前晚欣賞舊愛鄭中基（Ronald）的個唱，觀眾不停呼喊她的名字，千嬅說：「點都唔係叫我，係觀眾一廂情願，可能多年嘅印象，係時候要刪除啦。」

對於Ronald做口形指她不是啱feel對象？千嬅大方說：「梗係唔介意，完全正確，係佢人生最正確嘅事，開咪講都冇問題。」 至於拖緋聞男友側田入場示威，千嬅笑指單拖入場很核突，側田聞言說：「唔關我事，我哋唔啱feel，佢係女人，我係男仔。」 此外，有指千嬅失意最受歡迎女歌手獎，扭計不與無綫續約，她對此表示合約事宜由經理人黃柏高負責。黃柏高承認千嬅約滿無綫，會留待她三個月後拍畢內地劇再傾續約。 採訪：馬建華攝影：葉君海

側田嫌千嬅係女人

現年二十六歲的吳浩康，甫出道即被視為後起之秀，可惜前年一單藏毒事件令他形象受損，事業至今未有起色，反而緋聞卻愈見精采。吳入行至今曾先後與Kawaii、鄭希怡（Yumiko）、唐詩詠及胡定欣等較他年長的圈內人傳緋聞。 九九年吳與同期參加新秀歌唱比賽、年長他兩歲的胡定欣混熟，有傳二人熱戀時一度共賦同居，惟戀情反反覆覆，至今年初吳始親口承認戀情。與胡定欣相戀期間，吳浩康仍與多位女星傳出緋聞，○三年經介紹下認識年長他十歲的港台DJKawaii，以細心攻勢追求成功發展地下情。 未幾，吳又背着Kawaii狂追無綫舞蹈員Sime，二人高調拍拖半年，戀情無疾而終；前年吳浩康又因拍攝無綫賀年節目邂逅唐詩詠，但拍拖數月便分手。去年吳與同門的鄭希怡傳出戀情，有指二人經常以情侶檔姿態宣傳，因此日久生情。

藏毒新人王偏愛大姊姊

原子鏸繼周汶錡和譚小環後，成為Bella皮膚護理中心的代言人，日前穿上一襲噴血緊身裙拍攝廣告，猶如性感女神。

當日Marsha到南生圍的河流拍攝，由於該處鄰近民居，水中含有居民的排泄物和煮食用過的水，工作人員甫到場便聞到惡臭，難得Marsha仍應攝影師要求，赤足下水拍攝，戴上臍環的她站在污水中央，腳踏木櫈，單靠一支長竹竿支撐整個身體，由於竹竿太幼，頻頻出現搖搖欲墜的驚險場面，幸好最終亦順利完成拍攝。 Marsha接着躺卧破艇上，漫遊「屎海」，以及獨坐已荒廢的化糞場三個小時，承受着超級惡臭，鏡頭前仍保持燦爛笑容，當中苦況實在不可言喻。 其後Marsha又換上粉紅色性感短裙，以鮮艷奪目的大花襯托，展示其可愛一面。形象指導特別為Marsha選用米黃色麻布及碎布等物料製造服飾，與現場糜爛的環境形成強烈對比，更能展示Marsha的美好身材。 撰文：比華利

女神誤墮污水區 原子鏸蕩漾屎海臭熏天

劉嘉玲對故鄉蘇州真係有好深感情，每年都會抽時間返家鄉探吓親朋戚友，上年仲好豪氣咁用成千萬喺當地買咗間萬呎別墅，聽聞係買嚟度假用。咁又係嘅，嘉玲成日返去度假，咁就唔使住酒店喇。

日前嘉玲又去咗蘇州，幫家鄉嘅旅遊推廣活動做宣傳之餘，仲抽時間去咗當地著名嘅寒山寺參拜。呢間寺廟香火好鼎盛，上個禮拜五，寒山寺咁啱舉行祈福會，嘉玲當然去參加啦。因為嘉玲係大明星，佢喺寺廟出現時，啲人見到佢即刻好興奮，而寺院就喺門口掛晒歡迎橫額，仲出動十幾個和尚為嘉玲誦經。嘉玲喺祈福時好誠心，就算俾其他人望住，佢都冇任何反應。 其實嘉玲同寒山寺好有淵源，上年年初，寺內嘅秋爽大師送咗兩幅親筆書法畀嘉玲，祈求佢家宅安康。

馮仁昭四圍超： 劉嘉玲蘇州寒山寺參拜鄉里瘋狂

【上海直擊】孫燕姿、蔡依林、趙薇、王力宏、張韶涵及五月天等昨晚齊集上海大舞台，盛裝出席《2005MusicRadio中國TOP排行榜》頒獎晚會，港台、內地最佳男女歌手分別由王力宏、蔡依林、孫楠及陳琳奪得，而林俊杰、張韶涵、趙薇及何炅分別奪得港台、內地最愛歡迎男女歌手。 整晚賽果中，以孫燕姿憑《完美的一天》大碟奪「最暢銷女歌手」令人感到意外，因《完》碟既非燕姿最佳銷量唱片，與不少年輕歌手銷量相比，亦不見突出。早前橫掃多個頒獎禮的周杰倫缺席，他僅憑《夜曲》奪得港台年度十大金曲，及「最暢銷男歌手」獎項。 採訪、攝影：盧健

孫燕姿爆冷贏銷量

莫文蔚最近幫時尚雜誌《men'suno》影相，同兩名着住泳褲嘅猛男合照，相當火辣。莫文蔚話：「舞台上離經叛道的時刻，才是真正做自己。」談到愛情觀，莫文蔚又話：「最理想的伴侶關係應該像是最好的朋友，無話不談、互相分享。愛情若要維持長遠，懂得信任彼此是最重要的養份。」

莫文蔚火併猛男談情

梅小惠打算下月五日佛誕假期，聯同張國強同曾華倩一齊去維園佛誕嘉年華做司儀，順便可以祈吓福。小惠仲有份策劃呢次嘉年華，提到工作感受，小惠話：「好開心幫佛教嘅工作人員做嘢，佢哋好友善，而自己都會覺得好平靜、開心同祥和。」

梅小惠為佛誕忙碌

林一峰的一連五場「CampinginHongKong」演唱會前晚在灣仔順利完成。安歌時，他跟表演嘉賓謝安琪換上狀似睡衣的便服，十分搞笑。一峰對謝安琪的表現亦十分滿意，還讚對方有勇氣，他笑說：「因為佢係香港開埠以嚟第一個戴牙箍唱歌嘅女歌手。」令台下觀眾哄堂大笑。

此外，林一峰全以英文歌會友，其中第四晚更邀得關淑怡擔任嘉賓，他說：「好開心，因為係Shirley（關淑怡）幾日前打電話畀我，話做我演唱會嘅嘉賓，簡直有啲不可置信，後嚟至知係真嘅，我哋合唱咗《You'vegotafriend》和《TrueColor》等歌曲。」而林一峰很滿意今次自己投資製作演唱會，還笑稱有錢賺。 採訪、攝影：張俊銘

關淑怡獻身林一峰

將於下月一日播映的無綫重頭劇《火舞黃沙》前晚在中環IFC戲院舉行製作特輯試映會，主角陳豪、林保怡、黎姿、蔡少芬和佘詩曼均盛裝出席，上次撞衫失威的黎姿今次行頭最勁，總值超過二十三萬，成功將佘詩曼和蔡少芬等人比下去，挽回面子。

黎姿早前拍攝無綫劇集《火舞黃沙》製作特輯，所穿的RolandMovret吊帶裙，跟湯盈盈之前出席活動時相同，認真失威！她前晚出席《火》劇試映會時明顯有備而來，全身由頭到腳均由名牌LV贊助，單是全港獨一無二的手袋已值逾十萬元，而紅裙、手鏈和手錶等亦總值十多萬元，全身行頭約二十三萬，成為眾女星之冠，挽回不少面子。

問黎姿身為Moiselle的代言人，卻穿上LV服飾，會否有牴觸？黎姿笑說：「唔會有衝突，因為LV係國際性品牌，性質唔同。」 而蔡少芬身上的紅裙乃意大利品牌，由其舅父所買，價值五位數字，原本她已飛往歐洲傳道，但為了出席前晚的試映會，於是自掏腰包花費五位數字買機票回港，隨即再飛往瑞士和法國等地繼續傳道。 問佘詩曼有否信心憑《火》劇在今年台慶夜奪獎，她謙虛地說：「好難喇，個個都做得幾好。」那該劇是否其代表作？她即笑道：「一日未退休，一日都未有代表作。」

而前晚播映的二十多分鐘製作特輯中，剪輯了不少劇中片段，讓傳媒一睹為快，除佘詩曼和陳豪在井中激咀外，邵美琪跪在地上喪喊，但同場的蔡少芬卻不停NG以及佘詩曼從山坡跑下，差點失平衡撞向樹的片段，均令現場人士捧腹大笑。 採訪：卓寶花　 攝影：陳慧安

贏番阿佘、蔡少芬 黎姿23萬LV裝身

一班歌手昨日出席網上行的活動，大會要求各人穿上大會T恤，鄧麗欣（Stephy）與吳雨霏（Kary）因為貪靚，起初不願就範，記者會開始時才見二人乖乖變身，反觀2R就算穿上T恤後，打扮如何不配，亦冇扭計，認真識做。

郭富城、鄧麗欣、吳雨霏、Twins與鄭希怡（Yumiko）等，昨日出席在數碼港舉行的「網上行．MOOV.now.com.hk」發布會，眾星都穿上大會T恤，有部份歌手到達現場才拿到T恤更換，所以未能配合服裝。

Stephy與Kary可能因為貪靚，收到大會T恤卻沒有即時換上，只在身上貼上貼紙，其後記者會開始，才見二人換上T恤，相信是難抵大會壓力。相反2R雖穿上彩色絲襪加高跟鞋，與大會T恤格格不入，仍乖乖穿上T恤，非常識做。 而Yumiko與Twins在前一晚已收到大會T恤，更將T恤改裝搶鏡，Yumiko的T恤更令其身材突然升級，她也禁不住笑說：「可能件衫太窄，所以先覺得勁咗。」城城身為是次活動的大使，所以他所穿的T恤是獨一無二的。

城城稍後會夥拍Twins及何韻詩等，於七月舉行音樂會，城城謂：「可以同唔同嘅歌手合作都幾好。」而阿詩得知城城有份演出是次音樂會，即刻應承演出，阿詩說：「城城跳舞咁勁，我都想跟佢學吓嘢，叨吓光嘛。」 此外，對於楊千嬅捧場鄭中基演唱會，鄭中基在台上表示千嬅並不是他的另一半，問蔡卓妍有甚麼回應，她只說：「你哋問啦，我係唔會回應。」 採訪：胡比　攝影：林德雄

大會T恤難襯衫 Stephy、Kary貪靚起革命　衰咗

容祖兒（Joey）昨日雙眼滿布紅筋到商台接受訪問，原來Joey近日為籌備下月演唱會而大感壓力，更搞到發怪夢。Joey笑說：「之前我喺布拉格嗰時就發咗個有關concert嘅怪夢，有啲到場睇嘅嘉賓仲以芭比同筋肉人嘅造型出現。」

今年Joey的工作已編排到密麻麻，除了下月自己的個唱外，六月又要為劉家昌演唱會擔任嘉賓，七月及年尾亦分別有音樂會，她說：「啲時間真係好緊迫，好多嘢同時進行，又要錄國語碟，自己又要求高，所以都會有少少壓力，惟有浸熱水涼同睇舞台劇、《IQ博士》嚟鬆弛壓力。」 採訪、攝影：駱華齡

祖兒為個唱怪夢纏身

韓國變性人河利秀昨日在台灣宣傳新唱片時，穿上低胸裝配性感熱褲，載歌載舞，非常狂野。河利秀談到保養嗓子的心得，就是吃五花豬肉，有清肺作用。

河利秀自爆剛剛與年輕五歲的男友分手，姐弟戀玩完，河利秀表示花了三個月的時間才治癒失戀之痛，她說：「男友很渴望結婚，然而我的演藝事業忙碌，無法給對方一個完整的愛，於是就向男友提出分手。」河利秀更表示不願讓男友一直等待，不能辜負所愛。 採訪、攝影：黎寶蘋

河利秀姐弟戀玩完

鄭中基前晚演出尾場個唱，與歌迷跳辣身舞時，他情緒高漲得即興捐女觀眾裙底。作為新一代笑匠的鄭中基感謝家人親朋支持時，忍不住淚流滿面，然後與全場觀眾大合唱《無賴》，場面感人。

鄭中基（Ronald）三場個唱前晚在紅館圓滿結束，張達明與李璨琛任嘉賓時，又請座上客梁家輝上台跳辣身舞，家輝說：「做演員隨時裝備好自己，辣身舞就辣身舞，怕你呀？」他當場除剩背心跳起舞來。 輪到Ronald與歌迷跳舞時，他突然叫穿短裙的女歌迷擘腿，然後捐過其裙底扮狂野舞蹈員，令全場嘩然兼捧腹。事後Ronald笑說：「我冇向上望呀。」

Ronald父親鄭東漢應兒子要求發言，他說：「佢話要多謝我，我只係畀咗個音樂環境佢長大，其他嘢佢自己做嘅，我冇叫佢俾人仆頭。」全場拍手大笑，Ronald笑說：「早知唔叫你講嘢。」 演唱會尾聲時，Ronald感謝家人、朋友支持，他說：「我知我唔係一個乖仔，好想多謝屋企人，一路有乜唔好新聞，我阿媽就為我祈禱，多謝媽咪同所有好朋友。今晚我唱得唔係幾好，但已經盡力。」Ronald此時淚如泉湧，張達明與李璨琛上台為他打氣。

Ronald前女友楊千嬅前晚與側田捧場，當Ronald唱她的《可惜我是水瓶座》時，台上螢幕影着千嬅，見她尷尬以口形說：「死啦！死啦！」又扮豬鼻。Ronald與千嬅都表現感觸，事後他謂首次對着千嬅唱該曲。但到Ronald唱Twins的《愛情當入樽》時，千嬅即避席到後台，等該曲完結才返回座位。Ronald女友蔡卓妍大前晚捧場，他表示並非刻意安排新舊女友在不同日子捧場，因不是他派飛。 此外，陳曉東曾因前女友張栢芝與鄭中基傳不和，前晚東東與陳秋霞同來捧場，證明二人仍然老友。其他圈中捧場客還包括梁家輝一家、王馨平夫婦等。 採訪：李珮洳　 攝影：陳志嵐

鄭中基捐裙底完騷滿面淚

陳可辛同吳君如嘅囡囡出世冇幾耐，佢就去咗美國做嘢，前晚又單拖去紅館睇鄭中基演唱會。馮仁昭問陳可辛個女啲嘢，陳可辛笑晒話幫個女諗咗名，但未決定用邊個，問佢點解唔陪君如同個女，自己走嚟睇騷，陳可辛話：「人哋（鄭中基）十年一次，嚟捧吓場囉！」問陳可辛有冇打算擺滿月酒，佢話：「點解要擺？自己喺屋企慶祝就得啦。」

陳可辛苦思B女名字

鄭中基前晚在演唱會中突然從穿短裙的女觀眾裙底穿過，究竟是否有影響？堪輿學家李丞責昨日在電話中說：「男人捐過女人胯下，比捐過同性胯下仲衰。因為女性有月事，傳統係代表污穢，如果男人捐過女人胯下，運氣必定有影響，短則衰四十九日，長則沒有定數。」至於化解方法？李丞責說：「用百解或溪錢掃打全身，或者用碌柚葉或七色花煲水沖涼，可以趕走衰氣。」 而堪輿學家麥玲玲則表示胯下受辱只是傳統禁忌，對財運和賭運有影響，她在電話中說：「肖鼠嘅鄭中基有桃花劫，一生要小心女人，佢做娛樂都算偏門行業，所以傳統禁忌要奉行。」 撰文：比華利

胯下受辱可大可小

早前才公開承認與無綫姐仔胡定欣拍拖的吳浩康，上周凌晨背着女友一拖二到銅鑼灣唱K，還風騷地與其中一女在街頭搭膊拖手，表現極其親暱，二人被撞破好事即左右彈開，十分狼狽。這位「第三者」原來正是男子組合EO2成員Eddie的女友，四角感情關係認真錯綜複雜。

曾被判藏毒罪成又涉傷人案的英皇歌手吳浩康，近日表現低調，加上早前承認與無綫姐仔胡定欣拍拖，表面上似乎已修心養性，不過繼日前成為女子組合2R成員黃婉伶（Race）口中「花心蘿蔔」男歌手嫌疑犯之一，被歌迷勸喻他切勿一腳踏兩船後，私底下吳浩康依然花弗，上周三凌晨更瞞着女友胡定欣，一拖二唱K消遣玩餐飽。

當晚凌晨約十二時，戴黑超及穿上印有Playboy兔頭圖案T恤的吳浩康，由兩名妙齡女郎駕駛平治房車接載往銅鑼灣CEONeway附近，他落車時已笑至「四萬咁口」，明顯心情極佳。與吳浩康同行的兩女均身形纖瘦，其中一女穿白衫及短褲，露出一雙長腿，另一女伴則穿啡色衫襯穿窿牛仔褲，一行三人步往卡拉OK期間，滿臉風騷的吳浩康一手搭着啡衫女伴香肩，另一手拖實對方手仔，言談甚歡，態度十分親密。 但當吳浩康在溫柔鄉享受之際，有記者忽然從路旁衝出拍照，吳浩康與啡衫女伴即分頭彈開，女方以手遮面，並貼近同行的白衫女子，狀甚尷尬，而擠出牽強笑容的吳浩康則狼狽地匆匆走進卡拉OK，兩女頭耷耷尾隨。

親教泰拳 「𠵱家佢唔敢同我玩」

記者發現吳浩康所攬的啡衫女伴，原來正是男子組合EO2成員彭懷安（Eddie）的女友Cara，另一女伴則為模特兒Christine。兩個月前，本報曾拍得Eddie與Cara親熱箍頸返男方大埔寓所過夜，豈料與Eddie份屬老友的吳浩康竟敢當街「勾義嫂」，一腳踏兩船之餘更是罪加一等。 對於又攬又拖Eddie女友，吳浩康昨日在電話中回應說：「個女仔係Eddie嘅好朋友，嗰晚Eddie有嚟唱K，佢有嘢做遲咗，你哋見佢唔到啫。我哋成班都係friend，好普通，又唔係博佢懵，佢（指Cara）都有跟我學泰拳㗎。」問吳浩康會否擔心被指勾義嫂？他即說：「我有女朋友㗎！但個女仔俾人咁影，𠵱家佢都唔敢出街，亦唔同我玩，我都唔好意思，影響到朋友。」吳浩康又聲稱Eddie絕不會有所誤會，至於有否向女友胡定欣報案？他只說：「佢知㗎。」

大呻走寶 「我唔喺度冇得上報」

吳浩康自稱與Eddie女友如此好感情，為何被拍照時二人會心虛彈開？他說：「人哋唔係藝人，正常都會彈開啦，我哋係好親密嘅朋友，但都擔心啲動作會令人誤會，我當佢係男仔friend，嘻嘻哈哈，真係要追一個女仔就唔會喺銅鑼灣做呢樣嘢啦。」 Eddie昨日亦在電話中說：「我嗰晚都有去唱K，阿Deep（吳浩康）都有同我講，話：『死啦！被人影到。』搞錯呀，被人影晒，我又唔喺度，冇得上報紙！講真呢排我哋成日一齊玩泰拳，諗住一齊參加三項鐵人賽，個女仔鬼妹仔性格，佢喺外國返嚟嘅，好男仔頭。」 問Eddie會否提醒女友在公眾場所收斂熱情？他說：「佢係我好朋友啫，喺香港攬攬錫錫好似好大件事，鬼叫佢係鬼妹仔咩？我就扮鬼仔，冇問題呀。」再問Eddie會否呷醋？他笑說：「點會？friend就係friend啦！」 採訪、攝影：娛樂突發組、朱倬誼

當街拖攬　自認親密 吳浩康背女友偷嗒朋友妻

繼陳凱歌執導嘅《無極》早排俾人鬧破壞雲南自然生態，𠵱家又輪到張藝謀俾人鬧，因為佢搞大型實景舞台劇《印象．麗江》，呢齣劇十月喺雲南公演，本來幾有意思，但日前雲南麗江納西古樂領軍人物宣科話，因為張導演嚟雲南搞舞台劇，有唔少人借佢名義搞旅遊工程，認真勞民傷財兼破壞生態景觀喎。呢次張藝謀俾人鬧，仲話佢係罪人，馮仁昭覺得佢都幾無辜。

張藝謀無辜成罪人

陶晶瑩（陶子）上個禮拜六喺台灣生咗個囡囡，佢老公李李仁將整個生產過程拍低留念，佢話囡囡嘅鼻最似太太，噚日已經識食人奶。而陶子亦喺噚日出院，之後即刻入住坐月中心。陶子話翻睇生產錄影帶，佢對老公話：「以後你可能會走不動，因為左右兩腳都被我和女兒抱住，要爸爸不要去工作。」

陶子生下餅印女

車婉婉和孫耀威最近不停宣傳合唱歌《再見亦是戀人》，昨日便到新城接受訪問，被問到是否以後都會以情侶姿態宣傳，車婉婉笑說：「根本就係拍拖啦。」問婉婉怕不怕孫耀威的另一半呷醋，大家均意會是指應采兒，車婉婉說：「得佢一個有另一半呀？我都有十個另一半喎。」

車婉婉又談到日前跟孫耀威拍新歌MV時，原本導演要求拍咀戲和床上戲，她說：「我事前都唔知要親熱，我覺得MV唔使咁激，所以婉拒導演要求，冇拍咀戲，但都有床上戲。」由於二人一上床就忍不住大笑，最後惟有用眼神交代，不用做親熱動作。 採訪、攝影：張俊銘

當年今日