大台炒冷飯真係會上癮，王祖藍嗰套《老表》再次回歸，第三輯會喺25號播，祖藍仲惡搞吳若希嗰首洗腦歌《越難越愛》，反轉再反轉整咗首《越辣越愛》，歌詞密集式只有4個字「咖喱魚蛋」，祖藍以「蔡芯若希」look着背心短褲披白紗拍MV，翻炒吳若希縮埋一嚿嘅甫士，仲邊唱邊嘔泡泡，認真抵死。

問到點解揀中吳若希惡搞？祖藍就話因為冇得揀：「TVB冇乜其他歌可以有版權，而我又熟嘅。」歌詞唱嚟唱去得4個字，係咪偷懶？祖藍大笑：「哈哈，唔係，其實靈感係嚟自《雞全部都係雞》，我覺得好無聊，好好笑，咪照辦煮碗囉，我只係要求盡量似番吳若希原本嗰個。」將吳若希搞成咁，驚唔驚佢嬲？祖藍話：「我唔驚佢嬲，佢抵抗力好強，點玩佢都冇事，佢分分鐘仲玩埋一份㖭，我都好期待可以同佢合唱呢隻歌。」

【咖．喱．魚．蛋】王祖藍翻炒吳若希《越難越愛》 四個字唱晒成首歌

情侶拍拖會做的傻事，包括拍情慾照／片。

分手不出惡言，曾經相濡以沫，最後可以相忘於江湖，但那些嬉春片段，處理不好，就會變成災難。今日有疑似李姓前女星的情慾照在網上廣傳，相片應是攝於六、七年前，未知相片是刻意爆料，抑或維修電腦後意外外洩。

其實久唔久就有都市傳說話有女／男事主喺thisAV「搵番自己」，但激情嘅嘢……嗯。

今晚趙碩之到又一城出席《求生走佬Family》「一人一票撐基層」慈善首映，就講起一件往事……

「我都有啲驚，我都有拍過片，當時係同男朋友好Sweet嘅時候拍嘅，不過唔流出嚟就冇問題0架喇。」問她是哪時拍？趙碩之謂：「大約20歲，我係20至24歲同呢個男仔拍拖。啲片keep喺男朋友度，我自己就冇。」又苦笑：「我都覺得自己危危地。」

那兩人分手後可有聯絡？趙碩之謂：「都有聯絡，嗰陣我啱啱出道，唔知個男朋友係真係鍾意我呢個人，定係『趙碩之』呢個人，但我好信任佢，佢就好似我屋企人咁，我同佢屋企人都好熟。」

趙碩之自言不擔心情慾片流出(黑人問號…應該拍咗唔止一條啩)，點知佢下一句仲爆：「啲片keep喺佢阿哥部電腦度。」嘩………咁，舊愛信得過啫，咁舊愛嘅哥哥……一陣佢開心share或者俾朋友睇點算？趙碩之話：「我冇特別去諗呢樣嘢呀，唔發生事，冇諗，就當冇嘢0架喇。」咁不如要求ex 刪咗條片啦，趙碩之又話唔會喎，「我冇特別去諗呢樣嘢。」之後有冇同新男朋友拍？「冇喇。」

雖然未知網上流出嘅圖是否李姓藝人or移花接木，但趙碩之都話會安慰對方：「希望佢儘快平伏心情，唔好受影響。最緊要自己夠強大，其他嘢唔好諗。」

溫馨回帶……09年，趙碩之曾經同大家分享佢一段感情……佢話當年有個男仔追求佢，身邊朋友都以為今次十拿九穩，點知個男仔突然同趙碩之好朋友拍拖，最慘仲係，呢個好朋友不時同趙碩之分享佢同男友嘅床照………

認同前男友影過情慾照  趙碩之：20歲最正嘅時候

【鬼故嚟？】趙碩之自認曾拍情慾片 仲keep喺男友阿哥度！

王灝兒（JW）今日嚟到商台為明年一月初紅館演唱會作宣傳，佢透露已落實演唱會名叫《Never too early》，仲話覺得今次紅館機會係上天畀自己最好禮物添！這些機會，陳曉東都等唔到…

上次JW喺Star Hall舉行嘅演唱會安排咗廿多位舞蹈員伴舞，今次JW決定唔用太多舞蹈員，想將焦點集中自己身上，佢話：「我已經開始排舞，用三個月時間去排，我諗過想著波鞋或赤腳咁跳，咁先可以展示自己活力，不過未同公司講。」跳舞導師指好大機會雙腳起水泡，問到男友會否見佢攰而主動按摩？佢話：「有時我哋肩膊攰，都會互相按下肩膊，又會一齊出去按腳。」

JW今次開騷除咗獲男友體貼支持，男友父母亦表示會支持，佢話：「Uncle Auntie好支持我，好鍾意我嘅音樂，o依家同公司傾緊點合作，之前佢哋已經支持江若琳個騷，所以佢哋好支持香港樂壇。」搞掂紅館騷後，之後係咪會出嫁？佢甜笑話：「未呀，暫時專心紅館，嚟緊希望有機會到廣州、清遠同佛山同Fans見面。」上次演唱會請唔到舊老闆黎明任嘉賓，佢話：「會再邀請，始終係佢帶我入行，係恩師，如果做唔到嘉賓都想邀請佢嚟睇。」

【男友支持】落力排舞準備紅館開騷 JW話會再邀請黎明做嘉賓

「我利用紐約的創意和樂觀作為我的出發點。」Coach於2018春夏新季帶來閃閃發亮的一個系列，無論是慵懶飄逸輪廓的連身裙、中性棒球外套、服飾上的刺繡，以及腳上的短靴，都以閃亮姿態登場，設計注入大量水晶與珠片，又用上金屬色皮革和亮面的色丁面料，又揉合懷舊復古的草原印花，賦予女人柔美性感的魅力。

男裝方面，靈感來自Lou Reed與William S.Burroughs的不羈叛逆形象，重新定義美式風格，將屬於美國經典文化中的夏威夷與大草原風格印花，與皮褸搭配，營造layering，穿出個性與態度。

美國知名塗鴉大師Keith Haring的藝術風格成為今季的重點所在，其充滿童趣的標誌性圖案貫穿整個系列，tee、針織、外套、手袋通通都可以找到其影蹤，甚至可以在男裝tee上見到Keith的頭像，街頭藝術變成天橋上的焦點所在。

身為品牌代言人的Selena Gomez當然有現身睇騷，率先穿上2018早春系列，以皮褸搭配牛仔褲一身中性型格look亮相。另外，睇騷的還包括男性香水代言人James Franco、美國女星Emma Roberts、韓國女星朴信惠和中國女星唐嫣等。

【add即時．尚】紐約時裝周：Coach結合Keith Haring塗鴉圖案 美式風格新定義

韓劇《Doctors》女星朴信惠日前由韓國飛去美國，出席飛紐約出席時裝周，當中佢就喺當地時間噚日下午現身2018春季Coach時裝騷。日前朴信惠現身機場時，已被指疑似發福，到佢出席Coach時裝騷時，粗壯嘅手臂再次成為焦點。

今次朴信惠就包到冚現身，未有大騷好身材，而穿上有少少袖嘅連身裙嘅佢，就似乎令粗壯嘅手臂更明顯，慘遭網民留言指佢發福、需要keep fit等。

另外，朴信惠近日心情非常好，見到粉絲時都有微笑打招呼，之後被影到跟工作人員齊齊去名店，未知佢最終有冇收穫呢？

【韓流】唔騷有料身材 朴信惠手臂粗壯成焦點

成功轉型做時尚女王的Victoria Beckham，自家時裝品牌叫好又叫座，去年更與Estée Lauder合作推出限量彩妝品亦大受歡迎。今季再度合作，不得不提當中定價超過＄11,000的限量版美妝寶盒，每個美妝寶盒均有獨立編號，並附上碧咸嫂個人簽名便箋，雖然定價驚人，但相信忠粉也會中招吧！

新作除10款熱門貨外，更一次過推出18款新產品，價位親民，深棕色、酒紅色、黑灰色等調子，切合秋冬氣氛，亦可輕易駕馭。碧咸嫂早前自然在自己社交平台上載化妝片段，不論是在廁所，還是車上都落力推銷新系列。今季系列靈感來自碧咸嫂最愛的5個城市：邁阿密、倫敦、紐約、洛杉磯及巴黎，品牌早前專誠找來城中星二代，包括謝玲玲女兒林心兒、王敏德女兒王曼喜、鄭丹瑞女兒鄭瑤、林俊賢女兒林鈺洧及關禮傑女兒關楓馨演繹不同城市彩妝的美態。

【add．Beauty】$11,700美妝寶盒! 碧咸嫂X Estee Lauder 聯乘再現 

大陸嘅綜藝節目多到數唔晒，好似江蘇衛視《蒙面歌王》咁，就有好多人鍾意估到底面具之下嘅係邊個歌手，其中包括15年李克勤以「白棱鏡」look上陣，巫啟賢話完全估唔到係邊個歌手，造就咗一幕好搞笑，但佢本人唔笑嘅場面。（新聞連結：  http://bit.ly/2w7Th01  ）

節目去年再推出，改咗名叫《蒙面唱將猜猜猜》，o依家已經做到第二季喇，節目早排喺官方微博，貼咗一張宣傳海報，海報上寫咗好多歌手嘅名，除咗田馥甄、張韶涵、宋茜、杜麗莎咁，最搶眼都係謝霆鋒。不過記住喎，官方從來冇講過有乜嘢人會現身節目嘅，據知歌手同歌手之間都唔會知道有乜人會參與。

不過，今日官方就啱啱出咗一條宣傳片，宣傳今個月17號嗰集節目，嘩！明福俠呀！無睇錯，真係見到一個戴住同出道一年，由黎明掌管靈魂嘅明福俠喎，咁當然呢個係咪明福俠呢？直到呢刻係唔會有答案嘅，之但係網民都好醒，全部人已經留言，估到佢就係黎明喇，唔知呢輯同樣會做主持嘅巫啟賢，會唔會又「估唔到」呢？

片喺呢度：　 http://bit.ly/2woRDSJ 　

【難估過「送禮勤」呀！】呢個上《蒙面唱將》嘅 係咪明福俠？

唔經唔覺，已經嚟到農曆七月尾，中國傳統嘅鬼節已經嚟到尾聲，怕鬼嘅朋友可以暫時鬆一鬆，但係如果你係天生膽生毛，天不怕地不怕嘅話，都可以開始準備迎接十月份嘅萬聖節喇。

話說十月份將近，意味住一年一度嘅萬聖節又到喇，而各大主題樂園都開始鋪排好各類玩樂設施，俾大家過番個又驚又喜嘅萬聖節。而最近海洋公園搵嚟羅蘭姐幫手拍攝萬聖節宣傳短片，咁多年嚟海洋公園嘅萬聖節短片都好有創意，吸引到唔少網民討論，而羅蘭姐都幫咗好多年手，不過今次睇嚟羅蘭姐要被人搶晒鏡喇！

今年海洋公園搵嚟高海寧幫手拍攝，一開始高海寧仲以一身性感護士Look出場，以為咁就完？最驚喜嘅都未到，高海寧今次竟然玩埋自己一份，以「真身」《恐懼鬥室》系列嘅公仔Billy look出場，短片會喺聽日出街。

【出現了】同羅蘭姐拍萬聖節宣傳片 高海寧現「真身」

大陸藝人王寶強去年自爆「戴綠帽」，指經理人宋喆同太太馬蓉搞外遇(新聞連結： http://bit.ly/2h1dbjX )，雙方離婚官司未解決。2016年8月14日，王寶強突然發離婚聲明，稱妻子馬蓉出軌，並決定解除同馬蓉嘅婚姻關係，停止與宋喆合作。

距離此事過咗一年幾之後，今日《北京青年報》稱王寶強前經理人宋喆因涉王寶強離婚案相關問題，於近日被警方扣查，有傳罪名可能涉嫌職務侵佔，「職務侵佔」係指公司、企業或其他單位嘅人員，利用職務上之便利，將工作上財物非法據為己有，屬於數額較大嘅犯罪行為。

據大陸法例，貪污或受賄數額在三萬元以上不滿二十萬元，應當認定為刑法第三百八十三條第一款規定「數額較大」，依法判處三年以下有期徒刑或拘役，並處罰款；貪污或者受賄數額在二十萬元以上不滿三百萬元，應當認定為刑法第三百八十三條第一款規定「數額巨大」，依法判處三年以上、十年以下有期徒刑，並處罰款或沒收財產。

呢件事真係未解決，王寶強發離婚聲明，王寶強去法院起訴其妻馬蓉要求離婚，去年10月，馬蓉就委託律師去法院起訴王寶強侵犯名譽，要求刪走微博有關撰寫出軌一事嘅留言並道歉，又有傳馬蓉帶仔女移民(新聞連結： http://bit.ly/2xZgM81 )，不過審理期間孩子撫養權仲未判，王寶強同馬蓉仍有官司在身。

【綠帽餘波】傳王寶強前經理人被扣查 或涉職務侵佔 最高刑罰坐監十年

柯震東同房祖名喺2014年於北京吸毒被行政拘留，前者拘留咗14日，後者加多一條藏毒罪，被判處刑期6個月先放番出嚟。之後廣電總局正式下發被稱為「劣跡令」的通知文件，佢兩個參與製作嘅電影、電視劇、電視節目、廣告節目、網絡劇、微電影等，都列入暫停播出範圍。

不過解封呢啲嘢，同人類心理一樣，好難捉摸嘅，好似舊年房祖名同佢老竇成龍主演嘅《鐵道飛虎》可以如常上映，證明佢已被解封。

至於犯事比佢輕、講過「吸毒一世留疤」（新聞連結：  http://bit.ly/2wYw1hZ  ）嘅柯震東就冇咁好彩，傳過被解封，但之後又好似唔係，佢舊年仲被拍到喺橫店影視城開工時黑面，心情唔多好咁（新聞連結：  http://bit.ly/2xkdM9a  ），就連佢舊年拍嗰套大陸劇《舞櫻》好似都冇運行，該劇早排送檢俾廣電局叫停，原因係柯震東仲未解禁，由於呢齣劇大陸投資方用咗億幾嚟拍，如果真係上唔到，損失都幾慘重。

【點止一世留疤…】涉毒案仲未完？ 柯震東或累劇商蝕逾億

憑出演韓國選秀節目《PRODUCE 101》男團版而出道嘅限定11人男團Wanna One，現時喺韓國及亞洲各地都勁多粉絲，佢哋亦食住個勢，即刻到各地舉行粉絲見面會，當中喺香港同台灣都會開騷。

香港一站已落實喺下月3號同4號於亞博館舉行，由於頭場反應熱烈，門票迅速售罄，所以主辦即宣佈加開4號一場，已門票今日就公開發售。當中截至約下午2時，最貴嘅$1,480門票只剩下單丁位，粉絲想約埋朋友一齊睇騷都撲唔到相連位置。

另外，Wanna One成員之一黃旼炫日前完成表演後，就被粉絲拍得清理垃圾嘅情況，當中佢見音響位置上有唔少垃圾，即時將啲垃圾攬晒上身，然後清理掉它們，認真有家教。

【韓流】Wanna One下月尾場騷今公開發售 貴飛只剩單丁位

現年51歲嘅日本女星齊藤由貴被爆搭上同樣篤信摩門教嘅已婚醫生，姦夫日前接受電視台訪問，承認同齊藤由貴嘅婚外情長達五年之後，齊藤由貴都轉軚發聲明公開道歉。點知雜誌《Flash》再度爆料，公開50幾歲嘅醜聞男主角頭笠女裝底褲嘅照片，似足《變態超人》主角，照片被指於齊藤由貴寓所內拍攝。

齊藤由貴婚外情被連環爆料，形象破產，連日嚟廣告商同事務所都收到大量投訴，而佢亦早已有心理準備被廣告商考炒魷同停工，不過齊藤由貴接拍嘅劇集暫時未有影響，佢都有參與拍攝下周二播放嘅《神奈小姐》大結局，而18年大河劇《西鄉殿》，佢仍然係演員之一。

至於由齊藤由貴主持嘅電台節目《All Night-NIPPON MUSIC10》，電台方面今日就宣佈齊藤由貴將會無限期停工，電台社長今日見傳媒時話考慮到齊藤由貴現時嘅狀態難以再做主持工作，將會由明日開始停工，停工幾耐就未定，至於齊藤由貴會唔會退出節目，電台方面都話暫時未有定案。

【反口認婚外情】齊藤由貴搞不倫戀收投訴　電台節目工作叫停

張韶涵同范瑋琪曾經係圈中一對好姊妹，簽約福茂唱片做歌手，係公司吸金力強嘅姐妹花，特別係張韶涵，佢哋當時有合唱歌，又成日孖住上綜藝節目，開個唱必定互相撐場，點知後嚟因為爭公司資源鬧不快，更有傳范瑋琪喺張韶涵生日當日發微博指桑罵槐，暗寸張韶涵學歷，自此之後，佢哋都係零交流。

點知冤家路窄，張韶涵同范瑋琪最近成為同一檔音樂節目嘉賓，二人當年不和嘅傳聞再次被提起!

張韶涵轉發自己參加節目嘅新聞稿，張韶涵原文寫道「每個人身邊都有可以交心的朋友，虛偽的世界待久了會生病，最終只發現自己孤獨一人。雖說人不為己天誅地滅，但太以自我為中心也遲早要滅，要懂得有同理心是我們一生的課題。而人生不應該是在探討，可惡的你，可憐的我，應該是接下來我該怎麼做，過去不存在，是因為今天的你才能決定過去的譜寫，時間不留給過去只留給現在的你。願我們都有更多的勇氣去面對當下的問題和面對真實的自己。」疑示自己同范瑋琪嘅關係。

雖然過去經歷令人唔開心，但字裡行間都睇得出張韶涵想忘掉過去，重新出發，抱住積極態度，對此fans回覆支持同鼓勵，叫佢做好自己，fans永遠都係佢最堅強嘅後盾。

【冤家路窄】張韶涵疑回應同范范多年積怨 談交心朋友：不要太自我

上個月啱啱過咗47歲生日嘅宣萱，自從拍完大台劇《不懂撒嬌的女人》後，網民紛紛驚嘆佢嘅凍齡五官同細緻皮膚。

嚟緊新劇《使徒行者2》出街，宣萱趁宣傳期殺到前，早排就先到新加坡拍另一套英語處境喜劇《奉子成婚》。其實11年前，宣萱已經拍過呢套劇，劇中佢飾演Auntie Ling，同多位當地童星合演。如今宣萱再拍劇，劇中小朋友已經變成大朋友。今日宣萱就喺微博貼咗兩張前後對照相。留言話：「此行最開心的是和朋友敘舊。三位小朋友是當年在新加坡拍攝認識的，11年後Parental Guidance《奉子成婚》.....Miss you all!」

相中3位當年仲係小朋友嘅童星，都變晒大人，但不變嘅係坐喺中間嘅宣萱，難怪網民都笑宣萱「逆生長」。

【小朋友變大朋友】11年前後冇變過 網民讚47歲宣萱逆生長

玩具大王蔡志明兒子蔡加讚（Karson）今日喺九龍灣出席香港品格日啟動禮，Karson仲代表爸爸上台交贈200萬元嘅捐款支票。

Karson同汪圓圓育有3個小朋友，兩公婆都認為品格培育係最緊要，Karson話：「細細個就要佢哋起身執床，會教佢哋有禮貌，幫助人，希望可以教好佢哋。有時佢哋好忟發脾氣，我會俾佢發咗先，但如果好開心都突然發脾氣就唔得，唔可以吹毛求疵。」問佢哋邊個比較嚴格？Karson就話同太太同一陣線，萬一兩公婆有意見分歧，就係慢慢傾去解決。

【企老婆同一陣線】從小培訓子女品格 蔡加讚嚴禁吹毛求疵

韓國男團東方神起早前合體來港為下月15號喺澳門新濠影匯舉行嘅《TVXQ! Special Comeback Live - YouR PresenT - in MACAU》演唱會造勢。

而主辦今日就公開宣傳短片，當中就以歌曲《Top Of The World》為背景，等粉絲率先回味東方神起於當兵前喺首爾嘅演唱會精彩畫面。至於下月澳門騷，門票將於後日公開發售，門票分為$680、$980及$1,680三種，並於中港澳三地同步發售。

【韓流】後日開售！  東方神起公開宣傳短片力谷下月澳門騷

由兩位設計總監Laura Kim與 Fernando Garcia主理的Oscar de la Renta 2018春夏系列，從pop art和Mr. De la Renta所寫的一封信擷取靈感 ，打頭陣的是彩色潑墨和牛仔潑墨裝，另外又有心形、抽象花卉圖案，配合粉紅、紅色、黃色、藍色等的色塊對對碰，呈現出濃濃藝術氣息。

Mr. De la Renta所寫的一封信則變身成為時尚印花，出現於恤衫裙、jumpsuit、西裝外套，甚致浪漫禮服之上。中段的幾襲浮誇珠片裝，閃爆登場；禮服一向是品牌的拿手好戲，設計同樣可以見到pop art影子，大玩加大碼英文字；薄紗禮服利飾上珠片與閃石，呈現浪漫仙氣的紗料禮服，最近由幾襲漸變色禮服，畫上華麗的完美句號。

【add即時．尚】紐約時裝周：Oscar de la Renta穿上身的一封信 

今年踏入10周年嘅大型音樂及藝術節Clockenflap，將於11月17日至19日假中環海濱舉行，大會已公開第二輪演出陣容。

繼首輪公佈嘅英倫Trip Hop班霸Massive Attack同加拿大獨立搖滾女神Feist之後，新嘅演出陣容包括英倫狂野Breakbeat電音天團THE PRODIGY、Neo-Soul共同體JUNGLE、新晉迷幻樂隊 TEMPLES、Dubstep 先鋒才子 SKREAM以及<br />披頭四致敬名團THE BOOTLEG BEATLES、來自蘇格蘭嘅另類Hip-hop組合YOUNG FATHERS，以及澳洲迷幻樂隊POND等。

至於日本3人前衛組合水曜日Campanella（Wednesday Campanella）亦已落實會參加今年嘅Clockenflap，喺2012年出道嘅Campanella，由主音KOM_I慵懶可愛嘅呢喃式饒舌，以及獨具風格嘅表演樂隊成為潮流的指標，KOM_I都有喺Instagram宣傳，佢哋將參與18日演出。

【第二輪嘉賓】水曜日Campanella  The Prodigy來港撐Clockenflap

樂瞳今日喺新城宣傳佢本處女寫真集《See La Cilla》（新聞連結：  http://bit.ly/2xjOyrk  ），身材由32B升級至33C，被取笑去韓國整形，她指自己常飲全脂奶的效果（新聞連結：  http://bit.ly/2xYWhs2  ），佢話：「見啲網民留言話整咗，我個化妝師同出版社嘅女仔幫我換衫影相，佢哋話摸過晒就知（真），我都唔知講乜好喇，真係肥咗又唔得嘅。」

笑言自己變得虎背臂粗嘅樂瞳，指冇工作要求佢性感，但反而因為本寫真集而吸引導演搵佢參演賀歲片…咁搞笑笑？

反而佢媽咪則擔心個女要改行性感路線：「今日阿媽先審問我，我要應承佢，同埋都要向鄉親父老交代，呢本寫真只係留俾自己留念，抓住青春的尾巴，唔通等我結婚生仔後更厚背先影咩？」

另外，陳明憙今日喺新城宣傳新歌《白》，呢個係佢三部曲歌曲入面嘅第二部曲，呢首歌會配合夏天旋律較輕快，佢話唔會配合舞步，因為自己冇呢方面天份，反而想挑戰吓拍戲：「如果拍戲做番自己年紀去追尋夢想，又或者挑戰極端性格分裂啲都好玩，最希望可以同到彭于晏合作。」但佢話自己本身性格唔識發惡，平時鬧完人人地都唔知，好難拍火爆嘅角色。

【媽咪擔心行性感】升Cup惹整容疑雲？ 樂瞳：真係肥咗又唔得嘅？

44歲嘅海俊傑今年3月升呢做人夫，同化妝師Effie喺澳洲舉行婚禮（新聞連結：  http://bit.ly/2xkcPxj  ），一對新人後日將於北角補擺喜酒。海俊傑比老婆大13年，身為化妝師嘅Effie曾跟劉嘉玲、陳浩民合作。兩人拍拖4年，經過幾許風雨，2013年疑因感情問題發生爭吵，女方企圖輕生及時獲救（新聞連結：  http://bit.ly/2f3DGXS  ），自此兩人更加珍惜對方，決定廝守終生！

海俊傑接受《蘋果》電話訪問表示：「會擺30圍，心情有啲緊張，要諗有乜節目，因為婚宴一般都係播由細至大嘅幻燈片，覺得比較老土，我都係做戲，不如拍下短片，五分幾鐘介紹我哋點相識，我同老婆喺片中有咀嘴。」

近年轉戰大陸嘅海俊傑，為咗擺酒提早10日返港：「婚紗、裙褂要再試，因為我老婆瘦咗，佢一直係肥妹仔，盡減啦，呢幾個月瘦咗20幾磅。」記者笑問係咪嫌老婆肥？佢坦言：「為健康、為靚靚，着婚紗出嚟都想見得人，我鍾意佢時，佢已經係肥㗎啦，哈哈。」有冇陪老婆keep fit？佢笑說：「我一直有運動，我要增肌，唔係減肥，我都冇脂，瘦到條柴咁樣。」

至於傳統嘅接新娘儀式都會照做，海俊傑話：「其實我好怕呢part，但佢媽咪話需要嘅，接完佢去東廊兜個大圈行好運，之後返酒店同兄弟姐妹影相，搵咗彭敬慈做伴郎，陳國坤做兄弟，伴娘係傅穎。」問到婚禮花費幾多錢？海俊傑笑說：「幾十萬啩，唔係好多，希望唔使蝕啦，哈哈哈！」心急造人嘅佢仲話：「希望快啲生BB，但呢樣要睇個天。」

【後日補辦婚宴】大過老婆13年 海俊傑花六位數娶妻：希望唔使蝕

20歲「偽AV女」麥紫莉(Chili)，AV拍唔成，今日佢就宣佈參加ViuTV《G-1格鬥會》。從未打過拳嘅佢，就話參賽係想挑戰吓自己。「學識多啲嘢，唔使一味行性感路線，証明自己嘅實力，雖然之前未學過拳，但答應參賽到o依家，已經學咗個幾月。」講到個36G胸範圍大，容易成為攻擊目標，Chili話唔擔心，自己會識去擋。

講到俾人標籤做「大話精」，Chili就先後講咗4次自己係「有實力」，亦可以憑實力，挽回自己唔好嘅形象。「其實怕唔怕俾人話，我做得呢樣嘢，就預咗㗎啦，咁我再澄清呢件事後，都預咗更加多唔好嘅評價，預咗更多更難聽嘅批評。真係冇得介意，惟有用實力話俾人知，自己唔係一味性感。」

一味話自己有實力嘅佢，就透露o依家物色緊新公司。講到自己究竟有咩實力俾人睇，Chili就變得語塞，諗咗一陣先話：「講到賣點，打拳啦（吓，明明頭先講未打過拳喎！）雖然好多女仔會打拳，但我有外貎身材，o依家又識打拳，應該係賣點嚟嘅。」

講自己實力、賣點就口窒窒，不過調轉頭要求新公司所俾嘅條件，Chili就變得口若懸河。「咁錢係重要嘅，大家都知我有咁嘅需要啦，同埋就係睇吓呢間公司俾到幾多嘢我囉。」講到如果新公司都係要佢sell性感，問佢制唔制，Chili忽然岳高頭嬌嗔一聲：「呀！呢個問題，我都冇諗過，但係都冇得唔好㗎啦！」

<br />對於今次終於可以去得成日本，麥紫莉就話自己都開心，亦唔擔心之前條AV屎橋會令日本人唔鍾意。佢話：「唔怕到時日本人噓我，其實做到咁樣，我都預咗，香港有好多人已經係咁樣啦，如果去到日本都係咁嘅時候，我應該都會慣咗㗎啦。做好自己就OK，唔需要理會其他人嘅噓聲。」8個參賽者中，20歲Chili年紀最細，講到有機會同年紀最大嘅麥家琪對戰，體力上或者有着數，Chili就話打拳唔關年紀事。而現場所見，Chili左腳大髀有一細撻瘀傷，未知係咪操拳時整傷。

【大髀有瘀傷】36G上圍易成攻擊目標 麥紫莉：會用手去擋

【大髀有瘀傷】自揭係大話精 麥紫莉：預咗更難聽嘅批評

黃翠如、袁偉豪、廖碧兒、陳美詩、江若琳、梁靖琪等今日喺又一城出席護膚品牌活動，席上，當黃翠如同袁偉豪試搽潤手霜時，黃翠如即笑對方：「你o依家好潤！」袁偉豪及後指女友張寶兒除咗識得打理自己皮膚之外，仲有佢嘅滋潤。

問到袁偉豪見咗家長未？佢話：「auntie見過一次，有次我有演出，我邀請佢嚟睇，節日可以食飯聯誼下。」在旁嘅黃翠如笑笑口咁恭喜對方有拖拍，袁偉豪話：「佢嬲我，佢喺我失意嘅時候，成日都同我傾偈，但我識咗新朋友就冇話佢知。」袁偉豪表示跟張寶兒拍拖只有幾個月時間，仲未過試用期，黃翠如即笑對方係女人湯圓。

講到黃翠如以低胸露事業線示人，黃翠如話：「知佢性感，我唔可以畀佢獨美。」男友蕭正楠畀唔畀性感？佢指男友不在港，亦冇打算send相畀佢睇。黃翠如早前雖然否認婚訊，不過佢指將來結婚，如果由妹妹為佢設計婚紗，佢會覺得好sweet，袁偉豪笑住話：「我戥你開心呀，你唔係去澳洲註冊吖嘛，做嘢啫！」問到黃翠如會唔會已經秘密註冊？佢話：「冇呀，未了解，我相信外地註冊係好繁複。」

【同張寶兒發展快】拍拖未夠半年已見家長 袁偉豪：仲未過試用期

黃翠如、袁偉豪、廖碧兒、陳美詩、江若琳、梁靖琪等今日喺又一城出席護膚品牌活動，估唔到活動會變成一個「戰場」，幾位女士鬥晒事業線。除咗陳美詩保守啲，淨係露肩之外，黃翠如、廖碧兒揀咗條低胸裙露微波，梁靖琪最有睇頭，兩邊肩帶跌到落手臂……連着西裝外套嘅袁偉豪都係真空上陣。

陳美詩提到老公孫耀威開設嘅禮服專門店，周日會舉行時裝展，不過佢哋為咗係咪一齊行騷，而出現分歧，佢話：「我又着婚紗，覺得好悶，所以我哋仲爭拗緊我要唔要出。」佢仲表示老公嘅財政，全部過佢手，佢話：「女人睇財政會精打細算啲。」

此外，廖碧兒有份參演一部以教育為主題嘅新加坡劇集，佢透露有場戲要用籐條打小朋友：「已經度咗位，係打唔到佢，但係小朋友好難控制，我一打就一條痕喺佢隻腳度，佢又喊又笑，在場嘅心理醫生指呢個小朋友見到咁多大人喺度，又驚自己做錯，所以以笑遮醜。」將來有小朋友，係咪唔畀做童星？廖碧兒話：「除非同家燕姐唱歌表演下都OK。」對於有傳佢有個隱形富豪，廖碧兒立即否認，仲話現時根本冇時間識男仔。

當年今日