馮盈盈把口一向唔收，之前喺佢主持嘅大台節目《後生仔傾吓偈》入面，已經講咗好多大膽兼露骨嘅言詞，估唔到佢喺早兩日播出嗰集主題為「男問女答」時，講到港姐嫁有錢人時又出事。

事緣當陸浩明提到做女人有嘅好處，其中一個就係嫁入豪門會俾人話係「做少奶」、「金絲雀」等，但男仔就會俾人話入贅、食軟飯……坐喺另一邊、同樣都係港姐出身嘅馮盈盈同麥明詩就即時搶住大叫：「如果我哋嫁俾有錢人，就會話『睇死佢鈞金龜』、『選港姐就係為咗咁』、『係X』…」而馮盈盈仲突然大叫咗一句：「公廁！」哇！身為港姐，但夠膽將港姐同呢啲網絡術語拉埋嚟講，馮盈盈都可算世紀第一個。

馮盈盈講完呢句之後，大家都好似冇事發生咁繼續拗，麥明詩就話：「女仔如果嫁入豪門又俾人鬧，你唔嫁入豪門又話你輸咗喎…」依乎好委屈咁。

呢集除咗講港姐夠精采外，當提到大胸女仔肩膊會因為戴bra「負累重」容易攰，馮盈盈就即時問當中身材最好嘅「波波」黃凱儀，會唔會被個bra勒到有痕，當波波答「會」之後，馮盈盈又問佢使唔使戴矯形內衣，麥明詩即話：「我嗰時同波波去咗日本，我同佢好詳談過縮胸手街…」全場靜晒。

之後馮盈盈又問：「你哋兩個都有需要？」麥明詩就話：「唔係，我覺得佢可以考慮，你諗吓如果你要孭兩個鹽水袋…即係當你孭住兩個背囊去跑步，你都會唔舒服啦，咁我話如果縮胸，其實佢可能會覺得舒服啲。」睇得出冇呢個煩惱嘅麥明詩，好為波波着想。

到後來又問到「作為有優勢嘅女仔，覺得大胸好定長腿？」當大部份嘅女仔都話長腿時，馮盈盈就好大聲爆出一句：「大胸！」麥明詩則諗咗一陣，都係揀大胸，佢話胸唔需要好大，有C（cup）就OK。

馮盈盈聽完，即時好驚訝地「吓！」咗一聲，當有人話C都好大時，馮盈盈就話：「所以話正常係C，個標準有啲高！」聽完之後麥明詩又即時扯波波落水：「我意思係正常大，而唔係嗰啲F，唔使好似波波嗰啲咁。」

而最後經過一番解釋同討論後，馮盈盈同麥明詩一致認為「大胸」同「長腿」唔可以用嚟做比喻，馮盈盈更直接地話：「應該要改做大胸同大屎忽！」睇怕性格同講嘢都咁直接嘅港姐，馮盈盈都係歷年第一個喇。

精選娛聞，喺晒《娛果》 http://fb.com/appledailyent

【麥明詩傾偈講Cup數】最基本都要C  31吋胸馮盈盈：吓！個標準有啲高

年年出iPhone，林志穎總係早著先機，喺新機上市之前搶先貼圖，But，今年林志穎完全冇咗影，風頭完全被王力宏蓋過。王力宏仲要係獲蘋果行政總裁庫克（Tim Cook）邀請出席發表會。

林志穎是否被出局了？2017年，蘋果發表會獲邀嘅華人明星係JJ林俊傑，今年換成王力宏，網民就會問：「林志穎呢？」

其實都未必係出局嘅，之前佢每次搶先出圖，都係含糊其辭話係來自「秘密管道」，兩年前開始趨於低調，理由係「我不是代言人」。所以今年都唔出圖，亦不願多提蘋果。

不過，大家都好想知林志穎對新機嘅睇法，以其財力，買iPhone XS Max根本小事一樁，但林志穎話：唔買。

理由是：太大，放口袋不方便，且自拍功能畫素不夠高，會繼續用原本的iPhone X。被問到會否介意未被受邀見證？佢笑笑口話：「我英文不好哇。」

林志穎話，今次推出嘅新機裡面，對佢嚟講最「雙卡雙待」。依家佢部手機有三萬幾張相，一萬張係三個仔嘅，一萬五千張係架車嘅，五千張係自己，所以覺得512GB好吸引人。至於雙卡功能，對常往返台灣同大陸嘅佢，真係超方便：「因為每次在飛機上換卡，卡都會掉在椅縫中。」 但iPhone XS Max索價不菲，林志穎都話：「真的很貴，可是要想，都是用最好的。iPhone除非大改款，否則都猜得出來會有甚麼。我個人覺得，手機已經到極致，差不多了。」佢又話蘋果自拍功能畫素唔夠高，早被華為同三星超過。

原來林志穎期待指紋辨識，但結果失望了，「其實很多廠牌的硬件都很強大。」咁佢最鍾意iPhone邊隻機呢？原來係iPhone 3GS，因為「手感」最好。

【最愛iPhone 3GS】風頭被王力宏蓋過 林志穎拒買XS Max：太大

蘇志威嘅禮服店今日喺九龍塘舉行慈善服裝表演，太太劉小慧捧場，蘇老闆搵咗3個騎師當模特兒行Catwalk，活動將不扣除成本開支捐往3個慈善機構：「希望籌多啲錢，大家以往覺得騎師較輕磅細粒，我想話任何身材訂造西裝都咁有型。」而他特意找來專業人士指導騎士行騷。他更指自己是良心企業，稍後會獲其他機構頒發服務大獎。

早前日本分別打風及地震，蘇老闆的女兒蘇君蕎將到大阪讀書，他不擔心女兒：「應該打晒風又震完冇事，希望呢幾年唔再發生，到時太太會陪囡囡過去。」

精選娛聞，喺晒《娛果》 http://fb.com/appledailyent

【為善最樂】大女將去日本讀書 蘇志威話唔擔心

奧斯卡影帝丹素華盛頓（Denzel Washington）最近有新作《叛諜裁判2》(Equalizer 2) 上映，承繼上集大受歡迎嘅正義判官，丹素今次繼續打到飛天，難以想像佢已經年屆63歲！佢同於經典作《邊緣特訓》（Training Day）已合作嘅導演安東尼奎克（Antoine Fuqua）接受訪問時，更自爆今次再打到飛天：「今次打架場面係好重要嘅元素，我要用上我嘅拳擊技術。」另外導演安東尼亦指影帝唔易接戲，今次邀得佢再出山確實唔簡單：「再同丹素合作係我（拍續集）嘅原因，佢好揀擇，所以當佢打俾我話，喂，再做多次啦，我即刻好興奮，我感受到佢嘅熱情。」

【再次打到飛天】63歲影帝丹素華盛頓 用埋拳擊技術先夠砌

韓國型男趙寅成日前為宣傳新片《安市城》而進行直播活動，於直播中，趙寅成就提到自己帥氣嘅外貌，表示一開始怕被人叫做「花瓶」，不過由另一型男鄭雨盛身上得到啟發後，趙寅成亦開始接受自己長得帥一事。

據知鄭雨盛曾於某綜藝節目中表示：「長得帥最重要，每日都係不同嘅、刺激嘅。」呢句說話令趙寅成印象深刻，坦言：「真係對我影響好大。」又表示：「非常感謝父母將我生得咁靚仔，以前嘅我為咗唔令觀眾只見到我嘅外貌而非常努力，依家會將外貌當作係父母畀我嘅資產。 」

之後趙寅成更講笑地表示：「明日嘅我會比今日嘅我更帥，我會越嚟越靚仔，到臨終一刻應該係顏值巔峰。現時先鍾意我嘅人更會深陷其中，因為我聽日會變得更帥啊，無藥可救。」非常搞笑。

精選韓流，喺晒《娛果》 http://fb.com/appledailyent

【韓流】多得鄭雨盛啟發？趙寅成認靚仔： 明日嘅我比今日嘅我更帥

鄭欣宜、周汶錡（Kathy）同王曼喜等，今日喺中環出席首飾品牌活動，欣宜影相時夾喺中間，佢笑言好有壓力。嚟緊就嚟打風，欣宜就話本身要去首映，但依家取消咗，佢話：「我班麻雀group朋友已經開始活躍，雖然我唔賭錢，但係玩糖都好開心，到時留喺屋企玩。」

提到好友周秀娜同公司打官司，欣宜就話有留意，佢話：「啱啱睇到新聞，喺呢啲時候緊係唔好搞佢，雙方都係大人，自己識處理。」但係欣宜話平時同Chrissie平時好少講公事，講嘅都係買嘢扮靚同食嘢：「我知佢攞咗寧波電影節影后（編按：憑《29+1》在《十大華語電影盛典》摘「年度女演員」殊榮），我啱啱又去咗大馬，冇乜見佢。」

欣宜又稱，因為自己大頭蝦，所以公司合約都會寫得好清楚，仲會搵埋律師，又會坦白同老闆講清楚，以免將來誤會。

另外，Kathy性感現身，佢笑言今日開始輪住湊兩個仔返學，感覺好充實，佢話：「終於要湊仔返學，好犀利呀，湊完哥哥返學，跟住去買餸，之後湊細佬返學，然後返屋企煲湯，再接大仔再接個細放學，真係鐵人咁，我助手話我終於有今日，等我投入吓做媽咪嘅感覺。」

Kathy又話：「之前未返學都可以hea吓，依家大仔讀local school，好多通告，因為全中文，所以係我一個負責，對佢都好挑戰，個仔都仲未習慣，唔鍾意、扭計唔返學，又喊，好傷心，要適應嘅，我就好鍾意好忙嘅感覺。」Kathy仲話會堅持，每朝7點幾就起身，仲話啱啱瞓醒就送返學，好怕影相。

＿＿＿＿＿＿＿＿＿＿＿＿＿＿＿＿＿＿＿＿＿＿ 相關新聞： 周秀娜與經理人Roy擘面 入禀追討逾355萬元欠薪 https://bit.ly/2Obo6Wl

經理人擬反告周秀娜：就續約事宜進行民事訴訟索償 https://bit.ly/2x7QYZj ＿＿＿＿＿＿＿＿＿＿＿＿＿＿＿＿＿＿＿＿＿＿

【合約由律師處理】周秀娜與公司合約糾紛 欣宜：大人識自己處理

前日先至喺機場見到富察皇后——秦嵐著跌膊衫短褲仔露大腿，轉眼今日皇后就要走喇！今日佢改為戴白色cap帽，斜孭袋，牛仔褸（長袖），下半身呢，就係一條超短褲，又露腿喇。

晚上7時，做完晒訪問之後嘅秦嵐抵達機場，先去櫃枱check in，好多fans都來送機索簽名，面對傳媒追訪秦嵐亦來者不拒。秦嵐話今次香港之行時間好趕急，但見咁多Fans都鍾意佢，所以都覺得好開心。

一講到同偶像周慧敏見面（新聞連結：　 https://bit.ly/2NF7vxa　），秦嵐忍唔住話自己細細個已經好鍾意聽佢嘅歌，依家仲送咗隻CD俾佢，令佢「超級超級開心」呢！ 

秦嵐又謂呢幾日喺香港嘅行程真係排得好密，大部份時間都係工作，都冇機會外出大啖香港美食。佢又話本月23號會再來港、為無綫宣傳《延禧攻略》，屆時劇中其他演員都會來港，應該有機會出下去食嘢喎。

此外，何超蓮今日就喺ig中post咗張同秦嵐嘅合照，而且仲寫住「你們看我遇到誰，皇后娘娘吉祥～本人真的好美好溫柔」，咁點解超蓮會見到娘娘呢？佢喺tag度就解釋咗自己係去送外賣，仲表示娘娘鍾意食滷味添。

【狗仔出更】有始有終 富察皇后離港 熱褲又晒腿

日本女星石原聰美主演NTV電視台劇《高嶺之花》，講石原聰美與峯田和伸展開美女與野獸嘅故事，首播獲得11.1%收視，可惜播映以來收視麻麻。噚晚劇集播出大結局，眾人都有個happy ending，石原成立咗新嘅花道派流，石原與峯田和伸亦喺番埋一齊，千葉雄大與芳根京子呢一對都有情人終成眷屬，大結局收視就錄得11.4%，創下劇集收視新高。

【大團圓結局】石原聰美《高嶺之花》大結局 創收視新高

林芊妤（Coffee）今日大住肚現身九龍灣，參觀將軍澳日出康城新盤LP6示範單位，最終決定入票認購。《蘋果》今日搵過Coffee，佢話之前買樓個經紀俾資料叫佢去睇吓，睇完覺得幾吸引同幾抵就去抽吓籤。問Coffee算唔算係老公送畀佢嘅結婚禮物？佢笑住回應：「老公唔知㗎，我同佢財政獨立，自己諗住買嚟投資嘛，可能今晚同佢講吓，唔係結婚禮物呀，邊有呢啲嘢㗎，同埋我唔鍾意人哋買嘢畀我，鍾意自己買畀自己。」

不過，Coffee話估計自己未必抽得到，佢話：「冇所謂喇，之前嗰間買嚟自住，o依家屋企人住緊，咁見呢度都近屋企，覺得環境都幾好就抽吓。」至於如果買唔成有冇其他目標？佢就話：「冇呀，買到就當係送畀自己生日禮物，買唔到都冇所謂。」

【幫老公慳咗筆】大肚Coffee入票抽將軍澳新盤 私己錢買樓投資

今年亞姐主題係「鼓動・真我」，為展現亞姐真我嘅一面，大會安排10位候選佳麗進行儀態、舞蹈、談吐、化妝等，一連串密集式訓練。日前一眾佳麗着住4吋高踭鞋，跟名模兼亞姐形象總監陳嘉容（Eunis）學習儀態及台上catwalk技巧，期間陳嘉容要求佳麗逐一望鏡示範catwalk動作，Eunis對班佳麗好嚴格，稍有差池即遭「面斥」。

由於一眾佳麗冇catwalk經驗，Eunis希望佢哋更專注學習，於是採取嚴厲態度，佢話︰「可能惡少少先會聽媽咪話！」回想自己做模特兒之前，Eunis曾接受嚴師指導，佢話：「以前老師仲惡，我細個學catwalk時成日被鬧，因為被鬧會更驚，所以表現就更差，不過我知道佢係為我好，之後我真係好努力練習，就算喺屋企做家務，任何時候都着高踭鞋行來行去，克服對高踭鞋嘅恐懼，慢慢成功咗，點行點擺甫士都唔驚。」

首次擔任選美形象總監嘅陳嘉容，首次見班佳麗，第一件事要佢哋學習「挺胸收腹」，佢話︰「只要挺胸收腹，整個體態會變得修長，5呎6都變5呎7。」問到覺得10位佳麗有何地方要改善，Eunis話︰「佢哋比想像中條件有優勢，個個都幾靚女，如果化妝、服飾、髮型改進下，會有更大進步。catwalk方面，有兩、三個佳麗行得差少少，其餘都OK、好自然。」

至於一班佳麗，問到身型最高、有1.73米嘅2號梁雪瑤（Sheryl）對行catwalk可有感到困難？Sheryl直言：「好難呀！因為我本身高，好少着高踭鞋，平時多數着平底鞋，需要時間去習慣，唯有着多啲、行多啲，有一堂我着4吋鞋行，真係handle唔到，今日減咗2吋，由少少踭開始。」至於有跳舞底嘅4號張右雨（Gloria）行catwalk時，被陳嘉容大讚有節奏感，事後Gloria話：「可能我之前做dancer時，都行好多catwalk，當時老師要求都好嚴，行得唔好會被鬧。」

精選娛聞，喺晒《娛果》 http://fb.com/appledailyent

【亞姐特訓】10位佳麗學儀態行得差 形象總監陳嘉容當面鬧

有「韓國第一大美人」之稱的41歲女星金喜善，跟31歲男星金英光及金海淑合作嘅tvN新劇《Nine Room》，將於29日首播。

新劇講述死囚張華沙（金海淑飾），當佢打算放棄生命時，竟跟著名律師乙智海（金喜善飾）互換身份，獲得繼續活下去嘅機會，而奇有鎮（金英光飾）則係乙智海嘅戀人，同時係手握命運鑰匙嘅重要角色。

金喜善今次跟細十年嘅金英光演情侶，劇組今日就公開金喜善及金英光於雨中約會嘅新劇照，令外界都非常好奇呢一對姊弟戀將會有咩發展。

更多韓流，喺晒《娛果》 http://fb.com/appledailyent

【韓流】相差十年 41歲金喜善孖金英光演姊弟戀

61歲嘅張國強（KK)、麥家瑜及黃允財等，今日去到銅鑼灣出席「香港復康力量嘉年華2018啟動禮」。KK表示，近年積極參與慈善活動，今次除咗唱歌表演，還會參加拔河比賽籌款，KK話：「自己體力未衰退，平日有踢波、跑步、跳繩鍛鍊。」

KK年底會赴泰國拍攝無綫新劇《曼谷唐人街》，KK話：「喺劇中飾演唐人街大佬，有好多動作場面，幾乎要同每位演員對打。」KK早前到泰國拍攝新戲《掃毒2天地對決》，佢話獲劇組優良待遇，食及住宿都有很好安排，加上拍攝環境優美，非常享受拍攝。

【寶刀未老】演唐人街大佬 61歲張國強：有好多動作場面

ViuTV嘅《全民造星》早前公佈咗最後十強，節目監製花姐仲唔小心透露咗總決賽會喺下個月14日喺九展搞，入圍名單入面唔少得呢個名－－姜濤。（新聞連結：  http://bit.ly/2x6VbfO  ）

19歲嘅姜濤喺ViuTV嘅《全民造星》節目中，絕對係相當吸睛一個，雖然佢自爆曾經係一個200磅肥仔，甚至公開從前「肉騰騰」嘅相片，但擁有小鮮肉年紀嘅佢，已經由昔日嘅醜小鴨變為靚仔，唇紅齒白加上標緻外形，唔駛聽聲，齋睇畫面已經冧爆一班少女，加上被形容為「嫩版彭于晏」，未來發展真係有無限可能。

最近就有護膚品牌睇中呢隻「潛力股」，邀請姜濤處男下海拍廣告，負責穿針引線嘅就係《全民造星》其中一位導師馬天佑，而佢亦係今次廣告嘅創意總監。馬天佑話，佢同姜濤雖然唔同組，但係大家成為咗好朋友。馬天佑仲話男神姜濤拍廣告嗰日，明明落緊雨最後都出太陽，相當神奇。

姜濤今次為護膚品牌拍硬照廣告，亦打正旗號以青春同靚仔樣做「兇器」，事關全程只需坐喺放滿粉紅色汽球前，大擺可愛甫士「放電」便可，現場唔少姐姐級都俾佢電親，至於個廣告，今晚就有得睇。

【率先跑出】「嫩版彭于晏」姜濤拍處男廣告 粉紅氣球為決賽造勢

紅姑鍾楚紅最近低調搞咗個攝影展，地點係喺灣仔聖佛蘭士街，一幢3層高嘅品味小店La Petite Maison XXII 3樓，噚日女首富甘比同好友Sammi就齊齊去撐場，Sammi仲拍埋片放上網，大家都睇得好開心！最搞笑嘅係Sammi「宣傳」時話相展3秒就睇晒！仲叫人唔使去添！

原來小店係紅姑幫襯開嘅，尤其係地下嘅花店，紅姑鍾意親自挑選嚟自荷蘭嘅特別花卉，亦同老闆好老友。今次紅姑嘅作品同小店嘅理念相近，就成功合作。

小店嘅構念係來自法國南部橄欖樹，店嘅各部份就係人嘅五感，所以店內有唱片、食物同日用品等發售。

而紅姑嘅作品只有9張相片，放置喺店中22 Studio工作坊內，分為普羅旺斯同教堂兩個主題，全以法南嘅美麗景物為主。相展現在至本月24號擺放，大家有興趣感受吓紅姑嘅品味人生或想碰碰運氣，睇吓同紅姑有冇緣份，就不妨過去睇吓啦！

地址：Studio 22 La Petite Maison XXII 聖佛蘭士街15號

【法南風情】鍾楚紅9張相的展覽 3秒睇完

韓國型男蘇志燮跟女星鄭仁仙主演嘅MBC新劇《我身後的陶斯》，將於本月26號首播，劇組今日繼續公開新劇照宣傳。

公開嘅相中，只見飾演國情院情報員嘅蘇志燮，不時變裝進行任務，甚至化身成清潔工人，或手持望遠鏡留意目標人物，令劇迷更加期待劇集開播。

精選韓流，喺晒《娛果》 http://fb.com/appledailyent

【韓流】蘇志燮化身清潔工人收集情報

由金牌監製梁家樹打造嘅網劇《蝕日風暴》，將會喺呢個月22日晚上8點喺「黃Viu煲劇平台」播出，呢套劇搵咗張智霖及王陽明合作，薛凱琪（Fiona）與梁靖琪（Toby）等主演，今次仲係Fiona當年拍完電視劇《學警雄心》後，相隔13年再拍港劇，飾演重案組高級督察嘅Fiona話︰「好親切，女警好有型，對我嚟講係一件好superhero嘅事，雖然時間天氣等因素，仲有劇本內容令到體力有啲透支，但係都好開心嘅！」

Fiona同Toby喺劇中有一場對打戲，一埋位打到拳拳到肉，一啲都唔錫身，Toby話：「其實之前為咗呢套戲，已經特訓咗一段時間，拍完呢場戲之後，要借藥油俾Fiona療傷！」Fiona亦都話：「現代片嚟講，今次係打得最多嘅一次，頭一兩日已經因為打而屈到手指，指骨有啲移位，之後睇咗一段時間骨醫，西式、消炎、刮痧都有做，但係無乜嘢，我唔係好怕呢啲傷。

除咗打戲，Fiona仲有唔少跑戲，為咗追捕張智霖由香港跑到馬來西亞再跑到布達佩斯，佢仲笑住話：「拍完令我變咗做職業跑手，明明係車快啲，可能係為咗效果好啲，所以冇安排車追！」Toby仲自爆喺娃娃兵村拍攝期間發生嘅瘀事︰「嗰娃娃兵村係冇廁所，劇組就租流動廁所畀我用，記得嗰日落大雨，我去廁所時唔小心跣低，好彩係跣低落啲泥度，冇跌落馬桶。」

【Toby差啲周身屎】喪打喪跑體力透支 薛凱琪：係好Superhero嘅事

鄭俊弘(Fred)今日到旺角一間唱片店擔任一日店長，為新專輯造勢，近半百Fans一早到埸等幫襯，排頭位Fans更送上鲜花，現場人仕大叫「靚仔店長」。女友何雁詩之前表示買二十隻支持，問到為何不現身支持？佢笑說:「佢分散投資，每間賣幾隻，聽公司講第一日銷量都唔錯。」

Fred仲話之後會舉行簽唱會，盡量在下月中前宣傳，之後便接拍新劇。佢話仲有新歌未拍好MV，問到有冇似公司女歌手一樣出外拍攝？佢話:「有呀，之前去咗緬甸度拍，嗰首歌叫《雲彩》，係一首慈善歌，喺當地探訪小朋友，仲助養咗三個女仔，我冇特別揀男女，係緣份，好想快啲再有機會去探望佢哋。」

【做店長宣傳】女友逐間舖買碟 鄭俊弘：佢分散投資

江嘉敏（Kaman）今日喺中環出席「漆黑起動」活動，現場踩室內單車，雖然着住白色外套，但係依然露出豐滿身材，問到點解唔除咗件外套？佢笑話：「我驚嚇親人呀，除咗衫全場人會走晒。今次係我第一次做呢一項運動，平時都有做gym，會同妹妹一齊去公園打羽毛球同踩單車，但係因為佢返緊學，我亦都開緊劇，所以時間難就啲，o依家多數喺屋企做sit up。」

問到Kaman有邊啲部位需要改進？佢就話：「拜拜肉啦、腹肌都好難練，好多地方都未firm，面部肌肉都要。」佢仲話希望可以接多啲打女角色，乘機keep fit，o依家同時拍緊《過街英雄》同《殺手》，搞到自己混淆兩個角色。

提到前緋聞男友余德丞噚日去筲箕灣食牛腩（新聞連結：  http://bit.ly/2x6TON6  ），Kaman聽到後即刻話：「咁重味嘅唔好啦，乖乖哋啦！」Kaman又話喺《危城》個group入面，余德丞都有報平安，Kaman話：「佢話喺劇入面自己要摺紙鶴，點知現實係要收番大家送嘅，個個都有份摺，就連松松姐姐唔喺香港都摺，好有心。」

【好博呀！】江嘉敏谷Pat Pat胸踩單車 白色運動Bra唔聽話移位

Rihanna 事隔一季又重返紐約時裝周，她的內衣品牌 Savage X Fenty 與其講是時裝騷，不如說是歌頌女性主義的內衣大滙演。 女性內衣就是為不同女人而做，和Victoria’s secret 羽毛、蕾絲世界大不同，Rihanna 的系列表達了現代、獨立、不同的女性美。Gigi Hadid、Bella Hadid、Joan Smalls 美女紅模外，場內還有不同身型、各種膚色的新鮮面孔、紋身女郞、dancers 、媽媽級模特，更有兩位大肚婆行騷！大家一時在中間水池玩、做伸展，一時或三三兩兩跳下舞，音樂響住名曲「love me tender 」，再手拖手謝幕，滿滿都是愛。 為女人而做的內衣系列一樣包羅萬有，多彩但絕大部分是她愛的啞色調、nude color、greyish pink、橄欖綠，蕾絲內褲配boxer 褲頭、黑絲絨睡服、性感corset 等。

【add即時．尚】紐約時裝周：Rihanna 性感內衣騷 歌頌女性主義

曾於去年喺香港舉行演唱會嘅英國「新人王」歌手Dua Lipa，噚晚於中國上海開個唱，當中好多歌迷於場中企起身跳舞，點知竟被現場保安指罵、毆打、暴力拖出場外，引發歌迷及網友震怒，Dua更因無力阻止傷心落淚。

據指噚晚有唔少歌迷都於演唱會中，企起身跟住音樂跳舞，點知就立即被數名保安上前喝令坐低，甚至有人直接被拖出場外，仲有女歌迷以為保安係上前互動，點知被保安直接抱起撻落地後拖走，又有觀眾被保安帶出場外後遭到一群保安圍攻毆打。

Dua於台上都發現情況，但似乎無力阻止，更數度哽咽表示：「我本來希望為歌迷提供一個安全嘅環境，等大家可以唱歌跳舞，仲有最後幾首歌，希望大家能夠好好享受。」又有歌迷指帶來嘅LGBT彩虹旗被保安搶走。事件除咗令樂迷震怒，外媒都紛紛報道，引起國際關注。

【上海騷被維穩】歌迷遭保安拖走毆打 英國「新人王」Dua Lipa無力阻止

陳法拉今年喺美國以全科A成績，獲頒MFA（Master of Fine Arts）戲劇表演碩士，成為該校首位華人碩士生（相關新聞： https://bit.ly/2Nc5qJA）。目前佢決定留係當地，睇下有乜嘢荷李活電影或者電視劇可以演出。 

學戲同時，法拉早前都自編自導自演咗套短片《人來人往》，仲係今屆「辛丹斯電影節：香港短片比賽」，9部得獎短片其中之一。法拉嘅短片題材取材香港嘅露宿者，故事講述一名年輕人行經一條天橋時，見到一個女露宿者迷糊醒來，好奇心驅使下問起佢嘅境況，從而勾起女露宿者回憶，而呢個女露宿者，就係陳法拉喇！喺戲入面法拉要瞓街、瞓天橋，都咪話唔大犧牲，而同劇演出嘅，仲有吳肇軒同羅樂林。

至於辛丹斯電影節係荷李活影星羅拔烈福喺81年創立嘅辛丹斯學院有關，學院透過比賽致力推廣獨立電影及發掘新晉導演，昆頓塔倫天奴嘅《落水狗》同基斯杜化路倫（Christopher Nolan）的《凶心人》都曾經參展。香港喺14年引入「辛丹斯電影節：香港」，3年前再舉辦短片比賽。今個月20號嘅電影節開幕禮，會由9部得獎片選出一部大獎得主，有機會參加明年喺美國舉行嘅辛丹斯電影節。

當年今日